Read Shona Union Version 2002 Vatongi 16 Bible Online

Vatongi 16 - Shona Union Version 2002 bible

Vatongi 16

¹Zvino Samusoni wakaenda Gaza, akaonapo mukadzi waiva chifeve akapinda kwaari.

²VaGaza vakaudzwa, zvichinzi, “Samusoni wasvika pano.” Ivo vakamukomba, vakamuvandira usiku hwose pasuo reguta, vakaramba vanyerere usiku hwose, vachiti, “Mangwana kana kwaedza tichamuuraya.”

³Samusoni akavata kusvikira pakati pousiku, akamuka pakati pousiku, akabata masasa esuo reguta, namatanda aro maviri, akaavhomora pamwechete nomuzariro waro, akaaisa pamafudzi ake, ndokuatakurira kugomo riri pamberi peHebhuroni.

⁴Zvino pashure akada mukadzi wakanga agere pamupata weSoreki, wainzi Dherira.

⁵Madzishe avaFirisitia akakwira kumukadzi, akati kwaari, “Munyengetedze, uone kuti tingamukunda sei, kuti timusunge timumanikidze; ipapo mumwe nomumwe wedu uchakupa mashekeri esirivha ane gumi ramazana nezana rimwe.”

⁶Zvino Dherira akati kuna Samusoni, “Ndiudze hako kuti simba rako guru rinobvepi, uye kuti ungasungwa neiko, umanikidzwe.”

⁷Samusoni akati kwaari, “Kana vakandisunga namarunda matsva manomwe achigere kuomeswa, ndichashaiwa simba, ndikava somumwe munhu.”

⁸Ipapo madzishe avaFirisitia akamuvigira marunda matsva manomwe achigere kuomeswa, iye akamusunga nawo.

⁹Zvino wakanga ana vavandiri vakanga vakavandira muimba yomukati. Akati kwaari, “Samusoni, vaFirisitia vasvika!” Iye akadambura marunda, sezvinodamburwa rwonzi rworuchinda kana rwanzwa moto. Naizvozvo simba rake harina kuzikanwa.

¹⁰Ipapo Dherira akati kuna Samusoni, “Tarira, wandidadira, nokundirevera nhema; zvino chindiudza hako kuti ungasungwa nei?”

¹¹Akati kwaari, “Kana vakangondisunga havo namabote matsva, asina kumbobatisa, ndichashaiwa simba, ndikava somumwe munhu.”

¹²Ipapo Dherira akatora mabote matsva, akamusunga nawo, akati kwaari, “Samusoni, vaFirisitia vasvika!” Vavandiri vakanga vakavandira muimba yomukati. Ipapo akaadambura pamaoko ake soruchinda.

¹³Dherira akati kuna Samusoni, “Kusvikira zvino wakanga uchingondidadira, uchindirevera nhema; chindiudza hako kuti ungasungwa nei?” Akati kwaari, “Kana ukarukira mhotsi nomwe dzevhudzi romusoro wangu pamwechete nomucheka unorukwa.”

¹⁴Iye akarisunga nembambo, akati kwaari, “Samusoni, vaFirisitia vasvika!” Ipapo akapepuka pahope dzake, akavhomora mbambo yedanda pamwechete nomucheka wakarukwa.

¹⁵Iye akati kwaari, “Zvino ungataura seiko uchiti, ‘Ndinokuda, kana mwoyo wako usinganditendi? Zvino wandidadira katatu, usingandiudzi kuti simba rako guru rinobvepi?’ ”

¹⁶Zvino wakati achingomutambudza mazuva ose namashoko ake, achigombedzera, mwoyo wake ukanetswa kusvikira pakufa.

¹⁷Akamuudza nomwoyo wake wose akati kwaari, “Musoro wangu hauna kutongoveurwa nechisvo, nokuti ndiri muNaziri waMwari kubva padumbu ramai vangu; kana ndikaveurwa, simba rangu richabva kwandiri, ndingashaiwa simba, ndikaita somumwe munhu.”

¹⁸Zvino Dherira wakati aona kuti wamuudza nomwoyo wake wose, akatuma munhu kundodana madzishe avaFirisitia, akati, “Kwirai henyu kuno nguva ino, nokuti wandiudza nomwoyo wake wose.” Ipapo madzishe avaFirisitia vakakwira kwaari, vakauya nemari mumaoko avo.

¹⁹Iye akamuvatisa pamabvi ake, akadana munhu kuzoveura mhotsi nomwe dzevhudzi romusoro wake; akatanga kumumanikidza; simba rake rikabva kwaari.

²⁰Akati, “Samusoni, vaFirisitia vasvika!” Ipapo Samusoni akapepuka pahope dzake, akati, “Ndichabuda nguva inowo sapane dzimwe nguva, ndikazvisunungura;” asi wakanga asingazivi kuti Jehovha wakanga abva kwaari.

²¹Zvino vaFirisitia vakamubata, vakamutumbura meso, vakaburuka naye Gaza, ndokumusunga nezvisungo zvendarira, akakuya mutorongo.

²²Asi vhudzi romusoro wake rakatanga kurebazve shure kwokuveurwa kwake.

²³Zvino madzishe avaFirisitia akaungana pamwechete kuzobayira Dhagoni mwari wavo chibayiro chikuru, ndokufara; nokuti vakati, “Mwari wedu wakaisa mumaoko edu muvengi wedu Samusoni.”

²⁴Zvino vanhu vakati vachimuona, vakarumbidza mwari wavo, nokuti vakati, “Mwari wedu wakaisa mumaoko edu muvengi wedu, nomuparadzi wenyika yedu, wakauraya vazhinji vedu.”

²⁵Zvino mwoyo yavo yakati yofara, vakati, “Chidanai Samusoni, atitambire.” Vakandodana Samusoni mutorongo, akatamba pamberi pavo, vakamuisa pakati pembiru.

²⁶Zvino Samusoni akati kumukomana wakanga akabata ruoko rwake, “Nditendere kuti ndibate mbiru dzakatsigira imba, ndisendamire padziri.”

²⁷Zvino imba yakanga izere navarume navakadzi; namadzishe avaFirisitia akanga arimo ose; napamusoro pedenga pakanga pana varume navakadzi vanenge zviuru zvitatu, vakanga vachitarira kutamba kwaSamusoni.

²⁸Ipapo Samusoni akadana kuna Jehovha akati, “Ishe Mwari, ndirangarirei henyu, ndisimbisei henyu nguva ino bedzi, imi Mwari, nditsivirwe meso angu maviri kuvaFirisitia.”

²⁹Samusoni akabata mbiru mbiri dzapakati, dzakanga dzakatsigira imba, akadzisunda, imwe noruoko rwake rworudyi neimwe noruoko rwake rworuboshwe.

³⁰Ipapo Samusoni akati, “Ngandife hangu pamwechete navaFirisitia.” Akakotama nesimba rake rose, imba ikawira pamusoro pamadzishe, napamusoro pavanhu vaivamo. Naizvozvo vakafa vaakauraya pakufa kwake, vakanga vari vazhinji kuna vakaurawa naye achiri mupenyu.

³¹Zvino hama dzake, navose veimba yababa vake, vakaburuka, vakamutora, vakakwira naye, ndokumuviga pakati peZora neEshitaori, pabwiro yaManoa, baba vake. Iye wakatonga vaIsiraeri makore ana makumi maviri.