Read Shona Union Version 2002 Vatongi 17 Bible Online

Vatongi 17 - Shona Union Version 2002 bible

Vatongi 17

¹Zvino kwakanga kuno murume panyika yamakomo yaEfuremu, wainzi Mika.

²Iye akati kuna mai vake, “Mashekeri aya esirivha ane gumi ramazana nezana rimwe amakabirwa, mukatuka mubi wazvo, mukataurawo izvozvo ini ndichizvinzwa, tarirai sirivha iyeyo iri kwandiri; ndini ndakaitora.” Ipapo mai vake vakati, “Mwanakomana wangu ngaaropafadzwe naJehovha!”

³Akadzosera mashekeri esirivha ane gumi ramazana nezana rimwe kuna mai vake; mai vake vakati, “Zvirokwazvo, sirivha iyi ndinoitsaurira Jehovha, kuti mwanakomana wangu aite nayo mufananidzo wakavezwa nomufananidzo wakaumbwa; naizvozvo zvino ndichakudzosera iyo.”

⁴Zvino wakati adzosera mari iyo kuna mai vake, mai vake vakatora mashekeri esirivha ana mazana maviri, akaapa muumbi, iye akaita nawo mufananidzo wakavezwa nomufananidzo wakaumbwa; zvikagara mumba maMika.

⁵Zvino murume uyu Mika wakanga ane imba yavamwari, akaita efodhi neterafimi, akagadza mumwe wavanakomana vake kuti ave mupristi wake.

⁶Pamazuva iwayo kwakanga kusina mambo pakati pavaIsiraeri; munhu mumwe nomumwe waiita sezvaakafunga kuti ndizvo zvakanaka.

⁷Zvino kwakanga kune jaya raibva Bheterehemu-judha, weimba yaJudha, waiva muRevhi, wakanga agerepo.

⁸Murume uyu akabva paguta, paBheterehemu-judha, kundozvitsvakira nzvimbo yokugara; pakufamba kwake akasvika panyika yamakomo yaEfuremu paimba yaMika.

⁹Mika akati kwaari, “Wabvepiko?” Iye akati kwaari, “Ndiri muRevhi weBheterehemu-judha, ndinotsvaka kwandingagara.”

¹⁰Mika akati kwaari, “Gara neni, uve baba vangu nomupristi wangu, ndikupe mashekeri esirivha ane gumi pagore nenguo dzokupfeka nezvokudya zvako.” Ipapo muRevhi akapinda.

¹¹MuRevhi akatenda kugara nomunhu uyu; jaya rikava somumwe wavanakomana vake.

¹²Mika akagadza muRevhi, jaya iro rikava mupristi wake, akagara mumba maMika.

¹³Zvino Mika akati, “Ndinoziva kuti Jehovha uchandiitira zvakanaka, zvandava nomupristi wangu ari muRevhi.”