Read Shona Union Version 2002 Vatongi 19 Bible Online

Vatongi 19 - Shona Union Version 2002 bible

Vatongi 19

¹Zvino namazuva iwayo kusina mambo pakati paIsiraeri, mumwe muRevhi waigara mberi kwenyika yamakomo yaEfuremu, akazvitorera mukadzi murongo paBheterehemu-judha.

²Zvino murongo wake akafeva, akabva kwaari, akaenda kumba kwababa vake paBheterehemu-judha, akagarako mwedzi mina.

³Zvino murume wake akasimuka, akamutevera, ano muranda wake nembongoro mbiri, akataura zvakanaka naye, kuti amudzoserezve kwaari, iye mukadzi akamuisa kumba kwababa vake; zvino baba vomusikana vakati vachimuona, vakafara kusangana naye.

⁴Mukarahwa wake, ivo baba vomusikana, vakamudzivisa kuenda, akagara naye mazuva matatu, vakadya, vakanwa, vakavatapo.

⁵Zvino nomusi wechina vakamuka mangwanani, iye akasimuka achida kuenda; baba vomusikana vakati kumukuwasha wavo, “Simbisa mwoyo wako nechimedu chechingwa, mugoenda henyu.”

⁶Ipapo vakagara pasi, vakadya, vakanwa vose; baba vomusikana vakati kumurume, “Tenda hako ugare usiku hwose, mwoyo wako ufare.”

⁷Asi murume wakasimuka, achida kubva; mukarahwa wake akamugombedzera, akavatapozve.

⁸Nomusi weshanu akamuka mangwanani, achida kubva; baba vomusikana vakati, “Simbisa mwoyo wako, ugare kusvikira zuva rovira;” vakadya vose vari vaviri.

⁹Zvino murume wakati achisimuka, achida kubva, iye nomurongo wake, nomuranda wake, mukarahwa wake, ivo baba vomusikana, akati kwaari, “Tarira, zuva rovira, ava madekwana, chigara hako usiku hwose; tarira, zuva roda kupera, vata hako pano, mwoyo wako ufare, mugofumira mangwana parwendo rwenyu kumusha kwenyu.”

¹⁰Asi murume wakaramba kuvatapo usiku uhwo, asi wakasimuka, akabva, ndokusvika pakatarisana neJebhusi (ndiro Jerusaremu); wakanga ane mbongoro mbiri dzakanga dzakaiswa zvigaro; nomurongo wake wakanga anaye.

¹¹Zvino vakati vasvika pedyo neJebhusi, zuva rikanga rovira; muranda akati kuna tenzi wake, “Ngatitsaukire hedu kuguta iri ravaJebhusi, tivatemo.”

¹²Tenzi wake akati kwaari, “Handingatsaukiri kuguta ravatorwa, kusina vana vaIsiraeri; asi tichapfuura hedu, kusvikira paGibhea.”

¹³Akati kumuranda wake, “Hendei, tiswedere kune imwe yenzvimbo idzi, tivate paGibhea kana paRama.”

¹⁴Ipapo vakapfuura parwendo rwavo, vakavirirwa pedyo neGibhea, raiva guta ravaBhenjamini.

¹⁵Vakatsaukirako, vachida kuvata paGibhea akapinda, akagara pasi munzira yomuguta; nokuti kwakanga kusina munhu wakavadana kuzovata mumba make.

¹⁶Zvino mumwe mutana akasvika, achibva kubasa rake kumunda madekwana; zvino murume uyo wakanga ari wenyika yamakomo yaEfuremu, asi wakagara hake paGibhea; asi varume venzvimbo iyo vakanga vari vaBhenjamini.

¹⁷Iye akatarira, akaona murume uyu mufambi ari munzira yomuguta; mutana akati, “Ko unoendepi? Uye, unobvepiko?”

¹⁸Iye akati kwaari, “Tinobva Bheterehemu-judha, tinopfuurira kurutivi rwemberi rwenyika yamakomo yaEfuremu; ndiko kwandakabva, ndikaenda Bheterehemu-judha, zvino ndinoenda kumba kwaJehovha, asi hakuna munhu wakandidana kugara mumba make.

¹⁹Kunyange zvakadaro tinahwo uswa nezvokudya zvembongoro dzedu, nechingwa newaini zvinondiringana ini nomurandakadzi wenyu nejaya rina varanda venyu; hakuna chinhu chinoshaiwa.”

²⁰Zvino mutana akati, “Farao hako, zvose zvashaiwa, ini ndichakupa; asi usavata munzira yomuguta.”

²¹Ipapo akavaisa mumba make, akapa mbongoro zvokudya; vakashambidza tsoka dzavo, vakadya nokunwa.

²²Zvino vakati vofara pamwoyo yavo, tarirai varume veguta, vamwe vanhu vakaisvoipa, vakakomba imba kunhivi dzose, vakagogodza pamukova; vakataura nomwene weimba, iye mutana, vakati, “Budisa murume wakasvika paimba yako, timuzive.”

²³Zvino murume uyo, mwene weimba akabuda kwavari, akati kwavari, “Kwete, hama dzangu, regai kuita zvakaipa zvakadai; musaita samapenzi, nokuti murume uyu wakapinda mumba mangu.

²⁴Tarirai, hoyu mukunda wangu mhandara, nomurongo wake; ndichavabudisa zvino, muvazvidze, muvaitire sezvamunoda; asi regai kuitira murume uyu chakaipa chakadai.”

²⁵Asi varume vakaramba kumuteerera; ipapo murume akabata murongo wake, akamubudisira kwavari; vakamuziva, vakamuchinya usiku hwose kusvikira mangwana vakamurega kwoedza.

²⁶Zvino mukadzi akauya kwoedza, akawira pasi pamukova weimba yomunhu, makanga munashe wake, akavapo kusvikira kwaedza kwazvo.

²⁷Zvino ishe wake wakamuka mangwanani, akazarura mikova yeimba, akabuda, achida kupfuura parwendo rwake; akawana mukadzi, iye murongo wake, akawira pasi pamukova weimba, maoko ake ari pachikumbaridzo.

²⁸Akati kwaari, “Simuka, tiende;” asi hakuna wakapindura; ipapo akamuisa pambongoro yake, murume akasimuka, akaenda kumba kwake.

²⁹Wakati asvika kumba kwake, akatora banga, akabata murongo wake, akadimuranya mitezo yake, akaita nhindi dzine gumi nembiri, akadzituma munyika yose yavaIsiraeri.

³⁰Zvino vose vakati vachizviona, vakati, “Chinguva vana vaIsiraeri vakakwira vachibva panyika yeIjipiti, kusvikira zuva ranhasi, hakune chinhu chakadai chakaitwa kana chakaonekwa; rangarirai izvozvo, murangane mutaure.”