Read Shona Union Version 2002 Vatongi 21 Bible Online

Vatongi 21 - Shona Union Version 2002 bible

Vatongi 21

¹Zvino varume vaIsiraeri vakanga vapika paMizipa, vachiti, “Hakuna mumwe wedu uchapa muBhenjamini mukunda wake, kuti ave mukadzi wake.”

²Vanhu vakasvika paBheti-eri, vakagarapo pamberi paMwari kusvikira madekwana; vakachema kwazvo.

³Vakati, “Jehovha, Mwari waIsiraeri, chinhu ichi chakaitirweiko pakati paIsiraeri, kuti nhasi rumwe rudzi rushaikwe pakati paIsiraeri?”

⁴Zvino fume mangwana vanhu vakamuka mangwanani, vakavakapo atari, vakauya nezvipiriso zvinopiswa nezvipiriso zvokuyananisa.

⁵Ipapo vana vaIsiraeri vakati, “Ndianiko pakati pamarudzi ose aIsiraeri vasina kukwira kuungano yaJehovha?” Nokuti vakanga vapika nokupika kukuru pamusoro pomunhu usina kukwira kuna Jehovha paMizipa, vachiti, “Zvirokwazvo, anofanira kuurawa.”

⁶Zvino vana vaIsiraeri vakazvidemba pamusoro pavaBhenjamini, hama dzavo, vakati, “Nhasi rumwe rudzi rwagurwa pakati pavaIsiraeri.

⁷Tichadiniko kuti tiwanire vakasara vakadzi, zvatakapika naJehovha, kuti hatingavapi vakunda vedu vave vakadzi vavo?”

⁸Vakati, “Ndianiko pamarudzi aIsiraeri usina kukwira kuna Jehovha paMizipa?” Onei, kwakanga kusina munhu wakabva Jabheshi-gireadhi wakakwira kumisasa kuungano.

⁹Nokuti vanhu vakati vachiverengwa, onei kwakanga kusina munhu wavagere Jabheshi-gireadhi ipapo.

¹⁰Zvino ungano ikatumirako varume voumhare kwazvo vane zviuru zvine gumi nezviviri, vakavaraira vachiti, “Endai mundouraya vagere Jabheshi-gireadhi neminondo inopinza, pamwechete navakadzi navana.

¹¹Munofanira kuitawo chinhu ichi: Munofanira kuparadza chose varume vose, nomukadzi mumwe nomumwe wakambovata nomurume.”

¹²Zvino vakandowana kuna vagere Jabheshi-gireadhi mhandara dzina mazana mana, vasina kumbovata nomurume; vakauya navo kumisasa paShiro munyika yeKenani.

¹³Zvino ungano yose yakatuma nhume kundotaurirana navana vaBhenjamini vakanga vari padombo reRimoni, vakavaparidzira rugare.

¹⁴Nenguva iyo vaBhenjamini vakadzoka; vakavapa vakadzi vavakanga vachengeta vari vapenyu pavakadzi veJabheshi-gireadhi; asi havana kuvaringana.

¹⁵Vanhu vakazvidemba pamusoro pavaBhenjamini, nokuti Jehovha wakanga aparadza vamwe pakati pamarudzi avaIsiraeri.

¹⁶Ipapo vakuru veungano vakati, “Tichadiniko kuti tiwanire vakasara vakadzi, vakadzi zvavaparadzwa pakati pavaBhenjamini?”

¹⁷Vakati, “VaBhenjamini vakapukunyuka vanofanira kuva nenhaka yavo, kuti rudzi rumwe rurege kurova pakati pavaIsiraeri.

¹⁸Asi hatingavapi vakunda vedu, vave vakadzi vavo;” nokuti vana vaIsiraeri vakanga vapika, vachiti, “Munhu unopa vaBhenjamini mukadzi ngaatukwe.”

¹⁹Vakati, “Gore rimwe nerimwe kunomutambo waJehovha paShiro, kurutivi rwokumusoro kweBheti-eri, kumabvazuva enzira huru inobva Bheti-eri ichikwira Shekemu, nezasi kweRebhona.”

²⁰Vakaraira vana vaBhenjamini, vachiti, “Endai, mundovandira muminda yemizambiringa;

²¹mutarire, muone kana vakunda veShiro vachibuda kuzotamba; zvino mubude paminda yenyu yemizambiringa, murume mumwe nomumwe agozvitorera mukadzi pakati pavakunda veShiro, muende kunyika yavaBhenjamini.

²²Zvino kana madzibaba avo kana hama dzavo vachiuya kuzovakwirira kwatiri, isu tichati kwavari, ‘Chitipai henyu ivavo zvakanaka, nokuti hatina kuvatapira vose vakadzi pakurwa; nemiwo hamuna kuvapa ivo, mungadai mune mhosva.’ ”

²³Vana vaBhenjamini vakaita saizvozvo, vakazvitorera vakadzi kuna vakanga vachitamba, vakavaringa; vakaenda navo; vakabva ndokudzokera kunhaka yavo, vakavaka maguta, ndokugara mukati mawo.

²⁴Zvino vana vaIsiraeri vakabvapo nenguva iyo, murume mumwe nomumwe kurudzi rwake nokumhuri yake; vakabudapo murume mumwe nomumwe akaenda kunhaka yake.

²⁵Namazuva iwayo kwakanga kusina mambo pakati paIsiraeri; murume mumwe nomumwe waiita sezvaakafunga kuti ndizvo zvakanaka.