Read Shona Union Version 2002 Vatongi 5 Bible Online

Vatongi 5 - Shona Union Version 2002 bible

Vatongi 5

¹Zvino Dhebhora naBharaki, mwanakomana waAbhinoami, vakaimba nomusi iwoyo, vakati,

²“Kudzai Jehovha, Nokuti vatungamiriri vakatungamirira vaIsiraeri, Nokuti vanhu vakauya nokuda kwavo.

³Inzwai, imi madzimambo, teererai, imi machinda; Ini, iyeni, ndichaimbira Jehovha; Ndicharumbidza Jehovha, Mwari waIsiraeri nenziyo.

⁴Jehovha, pakubuda kwenyu paSeiri, Pakufamba kwenyu muchibva kusango reEdhomu, Nyika yakadedera, uye denga rakadonha, Zvirokwazvo makore akadonha mvura.

⁵Makomo akayerera pamberi paJehovha, Nairo Sinai pamberi paJehovha Mwari waIsiraeri.

⁶Pamazuva aShamugara, mwanakomana waAnati, Pamazuva aJaeri, nzira huru dzakanga dzisingafambwi, Vafambi vaifamba nenzira dzinopota-pota.

⁷Misha yakanga isina vanhu munaIsiraeri, yakanga isina vanhu, Kusvikira ini Dhebhora ndichisimuka, Ndichisimuka ini, mai pakati paIsiraeri.

⁸Vakazvitsaurira vamwari vatsva; Kurwa kukavapo pamasuo. Kwakanga kuchionekwa here nhovo kana pfumo Pakati pavaIsiraeri vane zviuru zvina makumi mana here?

⁹Mwoyo wangu unorumbidza vabati vaIsiraeri, Avo vakauya nokuda kwavo pakati pavanhu; Kudzai Jehovha!

¹⁰Paridzai izvozvo, imi makatasva mbongoro chena, Imi, mugere pamhasa dzinokosha, Nemi, munofamba nenzira.

¹¹Kure namazwi avanopfura nouta, pavanoteka mvura, Ndipo pavacharumbidza mabasa akarurama aJehovha, Mabasa akarurama oushe hwake muna Isiraeri. Ipapo vanhu vaJehovha vakaburukira kumasuo.

¹²Muka, muka, Dhebhora; Muka, muka, iwe uimbe rwiyo! Simuka Bharaki, utape vatapwa vako, iwe mwanakomana waAbhinoami.

¹³Ipapo vakanga vakasara vavakuru navanhu vakaburuka, Jehovha wakaburuka nokuda kwangu kuzorwa navane simba.

¹⁴Kuna Efuremu ndokwakabva vano mudzi wavo paAmareki, Vachikutevera iwe Bhenjamini pakati pavanhu vako. PaMakiri ndipo pakaburukira varairi, Nokuna Zebhuruni avo vakabata tsvimbo yokukunda.

¹⁵Machinda aIsakari akanga ana Dhebhora; SaIsakari, ndizvo zvakanga zvakaitawo Bharaki; Vakamhanyira kumupata vachitevera tsoka dzake. Pahova dzaRubheni Pakanga pane mirangariro mikuru yomwoyo.

¹⁶Wakagarireiko pasi pakati pamatanga ezvipfuwo. Uchiterera kurira kwenyere dzinoridzirwa makwai? Pahova dzaRubheni Pakanga pano kunzvera kukuru kwomwoyo.

¹⁷Gireadhi wakagara mhiri kwaJorodhani; Newe Dhani, wakagarireiko pazvikepe? Asheri wakagara zvake pamhenderekedzo dzegungwa, Wakarambira apo panopinda mvura panyika.

¹⁸Zebhuruni ndivanhu vakanga vasingatyi kusvikira parufu, NaNafutari panzvimbo dzenyika dzakakwirira.

¹⁹Madzimambo akauya akarwa, Ipapo madzimambo eKenani akarwawo PaTaanaki, pamvura zhinji yeMegidho; Havana kuwana pfuma yemari.

²⁰Nyeredzi dzakarwa dziri kudenga, Dzakarwa naSisera dziri panzira dzadzo.

²¹Rwizi Kishoni rwakavakukura, Irwo rwizi rwekare, rwizi Kishoni. Mweya wangu, pfuura nesimba.

²²Nguva iyo makumbo amabhiza akarovera pasi Nokumhanya, kuri kumhanya kwavakasimba.

²³Tuka Merozi, ndizvo zvinotaura mutumwa waJehovha, Tuka zvakaipa avo vageremo; Nokuti havana kuuya kuzobatsira Jehovha, Kuzobatsira Jehovha pakurwa kwake navane simba.

²⁴Pakati pavakadzi Jaeri ngaarumbidzwe, Iye mukadzi waHebheri muKeni, Ngaarumbidzwe pakati pavakadzi patende.

²⁵Wakakumbira mvura, iye akamupa mukaka; Wakamuvigira mukaka wakafa pandiro yamambo.

²⁶Wakabata mbambo noruoko rwake, Nenyundo yomubati norudyi rwake, Akarova Sisera nenyundo, akaboora musoro wake; Wakarova, akaboora zvavovo zvake.

²⁷Wakakotama patsoka dzake, akawa, Ipapo paakakotama, ndipo paakawira pasi, afa.

²⁸Wakatarira pawindo, akadana, Mai vaSisera vakadana pautanda hwaro; Ngoro yake inononokireiko kusvika? Makumbo engoro dzake anononokireiko?

²⁹Vakadzi vake, vakakudzwa, vakachenjera, vakamupindura, Naiye amene wakazvipindura, achiti,

³⁰‘Havana kuwana here zvavakapamba, havana kuzvigovana here? Zvimwe murume mumwe nomumwe unopiwa musikana mumwe, kana vasikana vaviri; Zvimwe Sisera uchapiwa nguo dzakapambwa dzamavara-vara, Nguo dzakapambwa dzemicheka yakarukwa yamavara-vara, Nguo dzamavara-vara dzakarukwa kunhivi dzose, dzakafanira mitsipa yavakapamba?’

³¹Saizvozvo vavengi venyu vose ngavaparadzwe, Jehovha; Asi ivo vanokudai ngavave sezuva, kana richibuda nesimba raro!” Nyika ikazorora makore ana makumi mana.