Read Shona Union Version 2002 ZVAKAZARURWA 1 Bible Online

ZVAKAZARURWA 1 - Shona Union Version 2002 bible

ZVAKAZARURWA 1

¹Zvakazarurwa zvaJesu Kristu, zvakapiwa naMwari, kuti aratidze varanda vake zvinhu izvo zvinofanira kukurumidza kuitwa; akazvituma nomutumwa wake, ndokuzivisa muranda wake Johani;

²wakapupurira shoko raMwari, nezvokupupura kwaJesu Kristu, achireva zvose zvaakaona.

³Akaropafadzwa uyo anorava, navanonzwa mashoko okuporofita, vachichengeta zvakanyorwa imomo, nokuti nguva yava pedyo.

⁴Johani kukereke nomwe dziri paAsia: Nyasha ngadzive nemi, norugare, zvinobva kuna iye aripo, wakanga aripo, noachazovapo; nokune mweya minomwe iri pamberi pechigaro chake choushe;

⁵nokuna Jesu Kristu, chapupu chakatendeka, dangwe kuvakafa, mubati wamadzishe enyika. Kuna iye anotida, akatisunungura pazvivi zvedu neropa rake,

⁶akatiita ushe, navapristi kuna Mwari naBaba vake, kwaari ngakuve kubwinya nesimba nokusingaperi-peri. Ameni.

⁷Tarirai, anouya namakore, meso ose achamuona, naivo vakamubaya; marudzi ose enyika achamuchema. Hongu, Ameni.

⁸Ndini Arifa naOmega, ndizvo zvinoreva Ishe Mwari, aripo, akanga aripo, noachazovapo, waMasimbaose.

⁹Ini Johani, hama yenyu, mugoverani pamwechete nemi pakutambudzika, noushe, nokutsungirira muna Jesu, ndakanga ndiri pachiwi chinonzi Patimosi, nokuda kweshoko raMwari, nokwokupupura kwaJesu.

¹⁰Ndakanga ndiri muMweya nezuva raIshe, ndikanzwa shure kwangu izwi guru, rinenge serehwamanda,

¹¹richiti, “Izvo zvaunoona, zvinyore mubhuku, uzvitumire kereke nomwe, paEfeso, napaSimirina, napaPerigamo, napaTiatira, napaSadhisi, napaFiradherifia, napaRaodhikia.”

¹²Ndikatendeuka kuti ndione izwi rakataura neni. Ndakati ndatendeuka, ndikaona zvigadziko zvemwenje zvinomwe zvendarama;

¹³napakati pezvigadziko zvemwenje, mumwe wakafanana noMwanakomana womunhu, akafuka nguo yakasvikira kutsoka, akazvisunga napachipfuva nebhanhire rendarama.

¹⁴Musoro wake nevhudzi rake zvakanga zviri zvichena samakushe machena, sechando; meso ake akaita somurazvo womoto;

¹⁵tsoka dzake dzakanga dzakafanana nesafuri inopenya, inenge yakanatswa muvira; izwi rake rakanga rakaita sezwi remvura zhinji.

¹⁶Muruoko rwake rworudyi akanga akabata nyeredzi nomwe; mumuromo make makabuda munondo unopinza, unocheka kwose; chiso chake chaiva sezuva rinopenya nesimba raro.

¹⁷Ndakati ndichimuona, ndikawira pasi patsoka dzake sendinenge ndafa; akaisa ruoko rwake rworudyi pamusoro pangu, akati, “Usatya, ndini wokutanga nowokupedzisira,

¹⁸naiye Mupenyu; ndakanga ndafa, tarira, ndiri mupenyu nokusingaperi-peri; ndine kiyi dzorufu neHadhesi.

¹⁹Naizvozvo nyora zvawaona, nezviripo, nezvichazovapo shure kwaizvozvi;

²⁰vakavanzika venyeredzi nomwe dzawaona muruoko rworudyi rwangu, nezvigadziko zvemwenje zvinomwe zvendarama. Nyeredzi nomwe ndivo vatumwa vekereke nomwe; nezvigadziko zvemwenje zvinomwe ndizvo kereke nomwe.