Read Shona Union Version 2002 ZVAKAZARURWA 11 Bible Online

ZVAKAZARURWA 11 - Shona Union Version 2002 bible

ZVAKAZARURWA 11

¹Zvino ndakapiwa rutsanga rwakaita somudonzvo; zvikanzi, “Simuka, uere temberi yaMwari, nearitari, navanonamata mairi.

²Asi siya ruvazhe ruri kunze kwetemberi, usaruera; nokuti rwakapiwa vahedheni; vachatsika guta dzvene mwedzi inamakumi mana nemiviri.

³Ndicharaira zvapupu zvangu zviviri kuti zviporofite, zvakapfeka masaga, mazuva ane chiuru chinamazana maviri namakumi matanhatu.”

⁴Ava ndiyo miorivhi miviri nezvigadziko zvemwenje zviviri zvimire pamberi paIshe wenyika.

⁵Kana kunomunhu anoda kuvakuvadza, moto uchabuda mumiromo yavo uchiparadza vavengi vavo; kana kuno munhu anoda kuvakuvadza, anofanira kuurawa saizvozvo.

⁶Vane simba rokuzarira denga, kuti mvura irege kunaya namazuva okuporofita kwavo; vane simba pamusoro pemvura kuti vaishandure ive ropa, nokurova nyika namadambudziko ose nenguva dzose dzavanoda.

⁷Kana vapedza kupupura kwavo, chikara chinokwira chichibva mugomba rakadzika-dzika chicharwa navo, chichivakunda nokuvauraya.

⁸Mitumbi yavo icharaswa panzira dzomuguta guru, rinonzi, nezita rokufananidzira, Sodhoma neIjipiti, pakaroverwawo Ishe wavo pamuchinjikwa.

⁹Vanobva kuvanhu, namarudzi, nendimi, nendudzi, vachaona mitumbi yavo mazuva matatu nehafu, vasingatenderi kuti ivigwe mubwiro.

¹⁰Navanogara panyika vachafara nokupembera pamusoro pavo, vachitumirana zvipo, nokuti vaporofita ava vaviri vakatambudza avo vanogara panyika.

¹¹Zvino mazuva matatu nehafu akati apfuura, mweya woupenyu, wakabva kuna Mwari, ukapinda mukati mavo, vakamira netsoka dzavo, kutya kukuru kukawira vose vakavaona.

¹²Ipapo vakanzwa izwi guru, rinobva kudenga, richiti kwavari, “Kwirai pano.” Vakakwira kudenga negore, vavengi vavo vakavaona.

¹³Zvino nenguva iyo kudengenyeka kwenyika kwakavapo, chegumi cheguta chikaputsikira pasi, navanhu vane zviuru zvinomwe vakaurawa nokudengenyeka; vakasara vakatya, vakarumbidza Mwari wokudenga.

¹⁴Nhamo yechipiri yapfuura; tarira, nhamo yechitatu inokurumidza kusvika.

¹⁵Zvino mutumwa wechinomwe akaridza; mazwi makuru akavapo kudenga, achiti, “Ushe hwenyika hwava hwaIshe wedu, naKristu wake; uchahubata nokusingaperi-peri.”

¹⁶Ipapo Vakuru vana makumi maviri navana vanogara pazvigaro zvavo zvoushe pamberi paMwari, vakawira pasi nezviso zvavo, vakanamata Mwari,

¹⁷vachiti, “Tinokuvongai imi, Ishe Mwari waMasimbaose, muripo, makanga muripo; nokuti makatora simba renyu guru, makabata ushe.

¹⁸Marudzi akatsamwa, nokutsamwa kwenyu kwakasvika, nenguva yavakafa, kuti vatongwe, uye kuti mupe varanda venyu mubayiro, ivo vaporofita, navatsvene, navanotya zita renyu, vaduku navakuru; uye kuti muparadze avo vanoparadza nyika.”

¹⁹Ipapo temberi yaMwari iri kudenga yakazarurwa; areka yesungano ikaonekwa mutemberi yake; ipapo kwakavapo mheni, namazwi, nokutinhira, nokudengenyeka kwenyika, nechimvuramabwe chikuru.