Read Shona Union Version 2002 ZVAKAZARURWA 15 Bible Online

ZVAKAZARURWA 15 - Shona Union Version 2002 bible

ZVAKAZARURWA 15

¹Zvino ndakaona chimwe chiratidzo kudenga, chikuru chinoshamisa, ichi. Vatumwa vanomwe vanamadambudziko manomwe okupedzisira, nokuti kutsamwa kwaMwari kwakapera nawo.

²Ndikaona chakaita segungwa rinoonekera rakavhenganiswa nomoto, naivo vakauya vakunda chikara nomufananidzo wacho, nechiverengo chezita racho, vamire pamusoro pegungwa rinoonekera, vanohudimbwa hwaMwari.

³Vakanga vachiimba rwiyo rwaMosesi, muranda waMwari, norwiyo rweGwayana, vachiti, “Ishe, Mwari waMasimbaose, mabasa enyu akakura, anoshamisa; Mambo wamarudzi, nzira dzenyu dzakarurama, ndedzazvokwadi.

⁴“Ndianiko angarega kutya nokukudza zita renyu, Ishe? Nokuti imi moga muri mutsvene; nokuti marudzi ose achauya, achinamata pamberi penyu; nokuti kururama kwenyu kwakaratidzwa.”

⁵Shure kwaizvozvo ndakaona temberi yetabhenakeri yohuchapupu yokudenga yakazarurwa;

⁶mutemberi mukabuda vatumwa vanomwe vanamadambudziko manomwe, vakafuka mucheka wakachena unopenya, vakasungwa pazvipfuva zvavo namabhanire endarama.

⁷Ipapo chimwe chezvisikwa zvipenyu zvina chakapa vatumwa vanomwe ndiro nomwe dzendarama, dzizere nokutsamwa kwaMwari, iye mupenyu nokusingaperi-peri.

⁸Temberi ikazara nohutsi hunobva pakubwinya kwaMwari napasimba rake; kukasava nomunhu akagona kupinda patemberi, kusvikira madambudziko manomwe avatumwa vanomwe apera.