Read Shona Union Version 2002 ZVAKAZARURWA 16 Bible Online

ZVAKAZARURWA 16 - Shona Union Version 2002 bible

ZVAKAZARURWA 16

¹Zvino ndakanzwa izwi guru richibva mutemberi, richiti kuvatumwa vanomwe, “Endai, mundodurura panyika ndiro nomwe dzokutsamwa dzaMwari.”

²Wokutanga akaenda, akadurura ndiro yake panyika; ronda rakaipa rinorwadza rikavapo pavanhu vakanga vane chiratidzo chechikara, vakanamata mufananidzo wacho.

³Wechipiri akadurura ndiro yake pagungwa; rikashanduka ropa seromunhu akafa; nezvipenyu zvose zvakanga zviri mugungwa zvikafa.

⁴Wechitatu akadurura ndiro yake panzizi nomumatsime emvura, ikashanduka ropa.

⁵Ndikanzwa mutumwa wemvura achiti, “Imi, Makarurama, muripo, namakanga miripo, Mutsvene, nokuti makatonga saizvozvo.

⁶Nokuti vakadurura ropa ravatsvene neravaporofita, mukavapa ropa, kuti vanwe; vakafanirwa naizvozvo.”

⁷Ndikanzwa aritari ichiti, “Hongu, Ishe, Mwari wamasimba ose, kutonga kwenyu ndokwechokwadi kwakarurama.”

⁸Zvino wechina akadurura ndiro yake pamusoro pezuva, rikapiwa simba kuti ripise vanhu nomoto.

⁹Vanhu vakapiswa nokupisa kukuru, vakamhura zita raMwari, anesimba pamusoro pamadambudziko awa; havana kutendeuka, kuti vamukudze.

¹⁰Wechishanu akadurura ndiro yake pamusoro pechigaro choushe chechikara; ushe hwacho hukasvibiswa, vakatsenga marimi avo nokurwadzwa;

¹¹vakamhura Mwari wokudenga pamusoro pokurwadzwa kwavo namaronda avo; asi havana kutendeuka pamabasa avo.

¹²Zvino wechitanhatu akadurura ndiro yake pamusoro porwizi rukuru, runonzi Yufuratesi; mvura yarwo ikapwa, kuti nzira dzamadzimambo anobva kumabvazuva dzigadzirwe.

¹³Ipapo ndakaona mweya yetsvina mitatu yakaita samatafi ichibva mumuromo weshato nomumuromo wechikara, nomumuromo womuporofita wenhema;

¹⁴nokuti ndiyo mweya yakaipa inoita zviratidzo; inoenda kumadzimambo enyika yose, kuvakokera kukurwa pazuva iro guru raMwari waMasimbaose.

¹⁵Tarira, ndinouya sembavha. Akaropafadzwa anorinda, anochengeta nguo dzake, kuti arege kufamba asina kupfeka, vaone nyadzi dzake.

¹⁶Akavaunganidzira panzvimbo inonzi Harimagedhoni nechiHebheru.

¹⁷Zvino wechinomwe akadurura ndiro yake mudenga, izwi guru rikabuda muchigaro choushe, richiti, “Zvapera!”

¹⁸Ipapo mheni yakavapo, namazwi nokutinhira; nokudengenyeka kwenyika kukuru kwakavapo; kudengenyeka kwenyika kwakakura-kura kukadai hakuna kumbovapo kubva pakusikwa kwavanhu panyika.

¹⁹Guta guru rikakamurwa rikaita zvikamu zvitatu, maguta amarudzi akaputsika; Bhabhironi guta guru rikarangarirwa pamberi paMwari, kuti ripiwe mukombe wewaini yokutsamwa kwehasha dzake.

²⁰Zviwi zvose zvikatiza, namakomo haana kuwanikwa.

²¹Chimvuramabwe chikuru, chinobva kudenga, chikawira pamusoro pavanhu, kurema kwebwe rimwe nerimwe kukaita setarenda; vanhu vakamhura Mwari nokuda kwedambudziko rechimvuramambwe, nokuti dambudziko racho raiva guru kwazvo.