Read Shona Union Version 2002 ZVAKAZARURWA 17 Bible Online

ZVAKAZARURWA 17 - Shona Union Version 2002 bible

ZVAKAZARURWA 17

¹Zvino mumwe wavatumwa vanomwe, vakanga vane ndiro nomwe, akauya akataura neni, achiti, “Uya pano, ndichakuratidza kutongwa kwemhombwe huru, inogara pamusoro pemvura zhinji;

²madzimambo enyika akaita upombwe nayo, navanogara panyika vakabatwa newaini youpombwe hwayo.”

³Ipapo akandiisa kurenje mumweya, ndikaona mukadzi akatasva chikara chitsvuku, chizere namazita okumhura Mwari, chine misoro minomwe nenyanga gumi.

⁴Mukadzi akanga akapfeka nguo tsuku neshava, akashonga ndarama namabwe anokosha, namapera, nomuruoko rwake makanga munomudziyo wendarama uzere nezvinonyangadza netsvina youpombwe hwake.

⁵Pahuma yake pakanga pakanyorwa zita rakavanzika iri: “BHABHIRONI, GUTA GURU, MAI VEMHOMBWE NAVEZVINONYANGADZA ZVENYIKA.”

⁶Ipapo ndakaona mukadzi akabatwa neropa ravatsvene, uye neropa rezvapupu zvaJesu; ndikati ndichimuona ndikashamiswa nokushamiswa kukuru.

⁷Ipapo mutumwa akati kwandiri, “Washamiswa neiko? Ndichakuudza zvakavanzika zvomukadzi, nezvechikara chinomutakura chine misoro minomwe nenyanga dzine gumi.

⁸Chikara chawaona, chaivapo, hachichipo; choda kukwira chichibva mugomba rakadzika-dzika kundoparadzwa; vanogara panyika vasina kunyorwa mazita avo mubhuku youpenyu kubva pakusikwa kwenyika, vachashamiswa kana vachiona chikara, kuti chaivapo, hachichipo, uye chichazovapo.

⁹“Ndipo panokufunga kune njere. Misoro minomwe ndiwo makomo manomwe, anogarwa nomukadzi.

¹⁰Ndiwo madzimambo manomwe; vashanu vawa, mumwe aripo, mumwe agere kusvika; kana achisvika, anofanira kugara chinguva chiduku.

¹¹Chikara chaivapo, chisisipo, ndiye worusere, mumwe wavanomwe, anondoparadzwa.

¹²“Nyanga dzine gumi dzawaona, ndiwo madzimambo ane gumi, achigere kupiwa ushe, asi vachapiwa simba samadzimambo pamwechete nechikara nguva imwe.

¹³“Ivo vane ndangariro imwe, vanopa chikara simba ravo noushe hwavo.

¹⁴Ava vacharwa neGwayana, Gwayana richavakunda; nokuti iro ndiIshe wamadzishe, namambo wamamdzimambo; naivo vanaro ndivanhu vakadanwa, vatsvene, vakatendeka.”

¹⁵Zvino akati kwandiri, “Mvura yawaona, inogarwa nemhombwe, ndivo vanhu, navazhinji, namarudzi, nendimi.

¹⁶Nyanga dzinegumi dzawaona, nechikara, ndivo vachavenga mhombwe, vachaiparadza, nokuitorera nguo; vachadya nyama yayo, nokuipisa nomoto.

¹⁷Nokuti Mwari akaisa mumwoyo yavo kuti vaite kurangarira kwake, vave nokurangarira kumwe, vape chikara ushe hwavo, kusvikira mashoko aMwari aitika.

¹⁸“Mukadzi wawaona ndiro guta guru, rinobata ushe hwamadzimambo enyika.”