Read Shona Union Version 2002 ZVAKAZARURWA 18 Bible Online

ZVAKAZARURWA 18 - Shona Union Version 2002 bible

ZVAKAZARURWA 18

¹Shure kwaizvozvi ndakaona mumwe mutumwa achiburuka kudenga, ane simba guru; nyika ikavhenekerewa nokubwinya kwake.

²Akadanidzira nezwi guru, achiti, “Rawa, Rawa, Bhabhironi, guta guru, yava nzvimbo munogara mweya yakaipa, nenhare yemweya yose yetsvina, nenhare yeshiri dzose dzine tsvina, dzinovengwa.

³Nokuti marudzi ose akawa newaini yokutsamwa kwoupombwe hwaro, namadzimambo enyika akaita upombwe naro, navatengesi venyika vakapfuma nesimba rokuzvirasa kwaro.”

⁴Zvino ndakanzwa rimwe izwi rinobva kudenga, richiti, “Budai mariri, vanhu vangu, kuti murege kuwadzana naro pazvivi zvaro, mugorega kupiwa madambudziko aro.

⁵Nokuti zvivi zvaro zvasvika kudenga, Mwari arangarira zvisakarurama zvaro.

⁶Muritsive parakakutsivai napo, muchiriitira kaviri parakabata napo; mumudziyo iwoyo marakadira iro, muridirire kaviri.

⁷“Parakazvikudza nokuzvifadza napo, murirwadzise nokurichemedza; nokuti rinoti mumwoyo maro, ‘Ndinogara pachigaro choushe ndiri vahosi, handizi chirikadzi, handingatongooni kuchema.’

⁸“Saka madambudziko aro achasvika nezuva rimwe, rufu, nokuchema, nenzara; richapiswa kwazvo nomoto, nokuti Ishe Mwari anoritonga, ane simba.”

⁹Madzimambo enyika, akaita upombwe nokuzvifadza naro, achiona hutsi hokupiswa kwaro;

¹⁰ivo vamire kure nokutya kurwadzwa kwaro, vachiti, “Nhamo, nhamo, newe, guta guru, iwe Bhabhironi, guta rakasimba! Nokuti kutongwa kwako kwakasvika nenguva imwe.”

¹¹Vatengesi venyika vacharira nokuchema pamusoro paro, nokuti hakuchina munhu anotenga nhumbi dzavo;

¹²nhumbi dzendarama, nesirivha, nedzamambwe anokosha, nedzamapera nedzomucheka wakanaka, nedzemicheka mitsvuku, nedzesiriki, nedzemicheka mishava, namarudzi ose emiti inonhuwira, namarudzi ose emidziyo yenyanga dzenzou, namarudzi ose emidziyo yamatanda anokosha, nedzesafuri, nedzedare, nedzamabwe machena;

¹³nekinamoni, nomuamumoni, nezvinonhuwira, namafuta okuzora, namafuta omuribhanoni, newaini, namafuta omuorivhi, nohupfu hwakatsetseka, nezviyo, nemombe, namakwai, nenhumbi dzamabhiza, nedzengoro, nedzavatapwa, nedzemweya yavanhu.

¹⁴Michero yaidikanwa nomwoyo wako, yakabva kwauri, nezvinhu zvose zvakanaka nezvinopenya, zvakabva kwauri, vanhu havangatongozozviwanizve.

¹⁵Vatengesi vezvinhu izvi, vakanga vafumiswa naro, vachamira kure nokutya kurwadzwa kwaro, vachirira nokuchema,

¹⁶vachiti, “Nhamo, nhamo, guta guru rakanga rakapfeka mucheka wakanaka, mutsvuku nomushava, rakanga rakashonga ndarama, namabwe anokosha, namapera!

¹⁷Nokuti nenguva imwe pfuma huru yakadai yaparadzwa.” Zvino vafambisi vose vezvikepe, navose vanofamba nezvikepe papi napapi, navafambi navabati pagungwa, vakamira kure,

¹⁸vakadanidzira vachiona hutsi hwokutsva kwaro, vachiti, “Guta rakafanana neguta iri guru nderipiko?”

¹⁹Ipapo vakakandira guruva pamisoro yavo, vakadanidzira vachirira nokuchema, vachiti, “Nhamo, nhamo, guta guru, kwaifumiswa nezvinokosha zvaro vose vaiva nezvikepe zvavo pagungwa; nokuti rakaparadzwa nenguva imwe.”

²⁰Farai pamusoro paro iwe denga, nemi vatsvene navapostori, navaporofita, nokuti Mwari akaritongera kutongwa kwenyu.

²¹Zvino mumwe mutumwa ane simba akasimudza ibwe rakaita seguyo guru, akarikandira mugungwa, achiti, “Saizvozvo guta guru, Bhabhironi, richaputsirwa pasi nesimba, rikatongowanikwazve.

²²Nezwi ravanoridza madimbwa, neravanoimba, neravanoridza nyere, neravanoridza hwamanda, harichatongonzwiki mauri, nemhizha yebasa ripi neripi haichatongowanikwi mauri, nezwi reguyo harichatongonzwiki mauri;

²³chiedza chomwenje hachichatongovhenekeri mauri, nezwi rechikomba kana romwenga harichatongonzwiki mauri; nokuti vatengesi vako vaiva vakuru venyika; nokuti nouroyi hwako marudzi ose akanyengerwa.”

²⁴Mukati maro mukawanikwa ropa ravaporofita neravatsvene, neravose vakaurawa panyika.