Read Shona Union Version 2002 ZVAKAZARURWA 2 Bible Online

ZVAKAZARURWA 2 - Shona Union Version 2002 bible

ZVAKAZARURWA 2

¹“Nyorera mutumwa wekereke iri paEfeso, uti: “Zvanzi naiye akabata nyeredzi nomwe muruoko rwake rworudyi, anofamba pakati pezvigadziko zvemwenje zvinomwe zvendarama:

²Ndinoziva mabasa ako, nokutambudzika kwako, nokutsungirira kwako, uye kuti haudi kuonana navanhu vakaipa; wakavaedza ivo vanoti, tiri vapostori, vasi ivo chaivo, ukavawana vari venhema;

³ukatsungirira nokuva nomwoyo murefu nokuda kwezita rangu, ukasaneta.

⁴Asi handifari nechinhu ichi kwauri, kuti wakasiya rudo rwako rwokutanga.

⁵Naizvozvo rangarira pawakawa, utendeuke, ugoita mabasa ako okutanga; kana usingaiti saizvozvo, ndichauya kwauri; ndikabvisa chigadziko chako chomwenje panzvimbo yacho, kana usingatendeuki.

⁶Asi chinhu ichi unacho, kuti unovenga mabasa avaNikoraiti, andinovenga neniwo.

⁷“Ane nzeve, ngaanzwe zvinoreva Mweya kukereke; anokunda, ndichamutendera kuti adye muti woupenyu, uri muParadhiso yaMwari.

⁸“Nyorera mutumwa wekereke iri paSimirina, uti: “Zvanzi naiye wokutanga nowokupedzisira, akanga afa, akararamazve:

⁹“Ndinoziva kutambudzika kwako nourombo hwako, (asi uri mupfumi), nokutuka kwaivo vanoti, tiri vaJudha, vasi ivo chaivo, asi isinagoge raSatani,

¹⁰usatya izvo zvauchatambudzika nazvo. Tarira, Dhiabhori woda kuisa vamwe venyu mutorongo, kuti muedzwe; muchatambudzika mazuva ane gumi. Uve wakatendeka kusvikira parufu, ndigokupa korona yohupenyu.

¹¹“Ane nzveve, ngaanzwe zvinoreva Mweya kukereke; anokunda, haangakuvadzwi norufu rwechipiri.

¹²“Nyorera mutumwa wekereke iri paPerigamo, uti: “Zvanzi naiye anomunondo, unopinza, unocheka kwose:

¹³Ndinoziva paunogara, ndipo pane chigaro choushe chaSatani; wakabatisisa zita rangu, ukasaramba kutenda kwangu, kunyange napamazuva aAndipasi, chapupu changu, munhu wangu akatendeka, akaurawa pakati penyu, apo panogara Satani.

¹⁴Asi handifari nezvimwe zvinhu zvishoma kwauri, nokuti unavamwepo vanobatisisa dzidziso yaBharami, akadzidzisa Bharaki kuisa chigumbuso pamberi pavana vaIsiraeri, nokuti vadye zvakabayirwa zvifananidzo, nokuita upombwe.

¹⁵Nokudaro una vamwewo vanobatisisa saizvozvo dzidziso yavaNikoraiti.

¹⁶Naizvozvo tendeuka; kana usingaiti saizvozvo, ndichakurumidza kuuya kwauri, ndigorwa navo nomunondo womuromo wangu.

¹⁷“Ane nzeve, ngaanzwe zvinoreva Mweya kukereke. Anokunda, ndichamupa mana yakavanzika, uye ndichamupa ibwe jena, napabwe iro zita idzva rakanyorwapo, risingazikanwi nomunhu, asi naiye anoripiwa.

¹⁸“Nyorera mutumwa wekereke iri paTiatira uti, “Zvanzi noMwanakomana waMwari, ana meso akafanana nomurazvo womoto, netsoka dzake dzakaita sesafuri inopenya:

¹⁹Ndinoziva mabasa ako, norudo, nokutenda, nokushumira, nokutsungirira kwako, uye kuti mabasa ako okupedzisira anopfuura okutanga.

²⁰“Asi handifari nechinhu ichi kwauri, kuti unotendera uya mukadzi Jesabheri, anozviidza muporofitakadzi, uye anodzidzisa nokutsausa varanda vangu, kuti vaite upombwe, nokudya zvakabayirwa zvifananidzo.

²¹Ndakamupa nguva kuti atendeuke; akaramba kutendeuka pakufeva kwake.

²²Tarira, ndoda kumukandira panhoo; navanoita upombwe naye panhamo huru, kana vasingatendeuki pamabasa avo.

²³Navana vake ndichavauraya norufu; nekereke dzose dzichaziva kuti ndini ndinonzvera itsvo nemwoyo, ndichapa mumwe nomumwe wenyu paakabata napo.

²⁴Asi kwamuri, imi makasara paTiatira, vose vasina dzidziso iyi, vasingazivi izvo zvavanoti, ‘Zvakadzika zvaSatani,’ ndinoti kwamuri: Handingakutakudziyi mumwe mutoro.

²⁵Asi batisai izvo zvamunazvo kusvikira ndichiuya.

²⁶“Anokunda achichengeta mabasa angu kusvikira pakupedzisira, ndichamupa simba pamusoro pamarudzi;

²⁷achaafudza netsvimbo yedare, nehari dzomuumbi dzinoputsanyiwa; sezvandakapiwawo naBaba vangu.

²⁸Uye ndichamupa nyamatsatsi.

²⁹Ane nzeve, ngaanzwe zvinoreva Mweya kukereke.