Read Shona Union Version 2002 ZVAKAZARURWA 20 Bible Online

ZVAKAZARURWA 20 - Shona Union Version 2002 bible

ZVAKAZARURWA 20

¹Zvino ndakaona mutumwa achiburuka kudenga, ane kiyi yegomba rakadzika-dzika, nengetani huru muruoko rwake.

²Akabata shato, nyoka yakare, ndiye Dhiabhori naSatani, akamusunga makore ane gumi ramazana,

³akamukandira mugomba rakadzikadzika akamupfigiramo, akaisa chisimbiso pamusoro pake, kuti arege kuzonyengera marudzi kusvikira makore ane gumi ramazana apera; shure kwaizvozvo anofanira kusunungurwa chinguva chiduku.

⁴Ipapo ndakaona zvigaro zvoushe; vakagara pamusoro pazvo, vakapiwa simba rokutonga; ndikaona mweya yavakanga vagurwa misoro nokuda kwokupupura kwaJesu, nokweshoko raMwari, navose vasina kunamata chikara kana mufananidzo wacho, vasina kupiwa chiratidzo pahuma dzavo naparuoko rwavo; vakararama vakabata ushe pamwechete naKristu makore ane gumi ramazana.

⁵Vamwe vakafa havana kurarama kusvikira makore ane gumi ramazana apera. Ndiko kumuka kwokutanga.

⁶Munhu anomugove pakumuka kwokutanga akaropafadzwa, mutsvene; rufu rwechipiri harune simba pamusoro paivava; asi vachava vapristi vaMwari navaKristu, vachabata ushe pamwechete naye makore ane gumi ramazana.

⁷Zvino kana makore ane gumi ramazana apera, Satani achasunungurwa mutorongo yake,

⁸achabuda kundonyengera marudzi ose ari kumativi mana enyika, ivo Gogi naMagogi, avaunganidzire kundorwa; kuwanda kwavo kwakaita sejecha regungwa.

⁹Vakakwira pakufara kwenyika, vakakomba misasa yavatsvene neguta rinodikanwa; ipapo moto wakaburuka uchibva kudenga; ukavaparadza.

¹⁰Zvino Dhiabhori, akavanyengera, akakandwa mudziva romoto nesuriferi, pane chikara nomuporofita wenhema, kuti varwadzwe masikati nousiku nokusingaperi-peri.

¹¹Zvino ndakaona chigaro choushe chikuru chichena, naiye akanga agere pamusoro pacho, nyika nedenga zvakatiza pamberi pake, zvikasawanirwa nzvimbo.

¹²Ipapo ndakaona vakafa, vaduku navakuru, vamire pamberi pechigaro choushe; bhuku dzikazarurwa, neimwe bhuku youpenyu ikazarurwa; vakafa vakatongwa nezvakanga zvakanyorwa mubhuku, sezvavakabata.

¹³Gungwa rikabudisa vakafa vakanga vari mariri; norufu neHadhesi zvikabudisa vakafa vakanga vari mazviri; mumwe nomumwe akatongwa sezvaakabata.

¹⁴Ipapo rufu neHadhesi zvakakandirwa mudziva romoto. Ndirwo rufu rwechipiri, ndiro dziva romoto.

¹⁵Zvino kana munhu akawanikwa asina kunyorwa mubhuku youpenyu, akakandirwa mudziva romoto.