Read Shona Union Version 2002 ZVAKAZARURWA 22 Bible Online

ZVAKAZARURWA 22 - Shona Union Version 2002 bible

ZVAKAZARURWA 22

¹Zvino akandiratidza rwizi rwemvura youpenyu, yakapenya sekirisitaro, inobuda pachigaro choushe chaMwari necheGwayana,

²pakati penzira yaro. Kumativi maviri orwizi kwakanga kunomuti woupenyu, unobereka michero yamarudzi ane gumi namaviri, uchiita michero yaro mwedzi mumwe nomumwe; namashizha omuti aiva mushonga wokuporesa ndudzi.

³Hakuchavi nechinhu chakatukwa; chigaro choushe chaMwari necheGwayana chichava mukati maro; varanda vake vachamushumira; vachaona chiso chake;

⁴uye zita rake richava pahuma dzavo.

⁵Usiku hahuchazovepo; havatsvaki chiedza chomwenje, kana chiedza chezuva; nokuti Ishe Mwari achavavhenekera; vachabata ushe nokusingaperi-peri.

⁶Zvino akati kwandiri, “Mashoko awa angatendwe, ndeechokwadi; Ishe, Mwari wemweya yavaporofita wakatuma mutumwa wake kuti aratidze varanda vake zvinhu zvoda kuitwa.”

⁷Tarirai, ndokurumidza kuuya; anochengeta mashoko okuporofita kwebhuku iri akaropafadzwa.

⁸Ini Johani, ndini ndakanzwa, ndikaona izvozvi. Zvino ndakati ndichinzwa, nokuona, ndikawira pasi kuti ndinamate pamberi petsoka dzomutumwa akandiratidza izvozvi.

⁹Akati kwandiri, “Rega kudaro; ndiri muranda pamwechete newe, nehama dzako, vaporofita, navanochengeta mashoko ebhuku iyi; namata Mwari.”

¹⁰Ipapo akati kwandiri, “Usazarira mashoko okuporofita kwebhuku iri, nokuti nguva yava pedyo.

¹¹Asina kururama ngaarambe achiita zvisakarurama; mutsvene ngaarambe achiitwa mutsvene.”

¹²“Tarirai, ndinokurumidza kuuya; mubayiro wangu ndinawo, kuti ndipe mumwe nomumwe sezvaakabata.

¹³Ndini Arifa neOmega, wokutanga nowokupedzisira, kutanga nokuguma.”

¹⁴Vanosuka nguo dzavo vakaropafadzwa, kuti vave nesimba rokuuya kumuti woupenyu, vapinde napamasuo eguta.

¹⁵Kunze ndiko kune imbwa, navaroyi, nemhombwe, navaurayi, navanonamata zvifananidzo, navose vanoda nhema vachidziita.

¹⁶“Ini Jesu, ndakatuma mutumwa wangu, kuti akupupurirei izvozvi pakereke. Ndini mudzi worudzi rwaDhavhidhi, nyamatsatse inopenya.”

¹⁷Mweya nomwenga vanoti, “Uya!” Naiye anonzwa ngaati, “Uya!” Ane nyota ngaauye. Anoda ngaatore mvura yohupenyu asingatengwi.

¹⁸Ndinopupurira mumwe nomumwe anonzwa mashoko okuporofita kwebhuku iri, ndichiti: Kana munhu akawedzera pazvinhu izvi, Mwari achawedzera kwaari madambudziko akanyorwa mubhuku iri;

¹⁹kana munhu akabvisa mashoko ebhuku yokuporofita uku, Mwari uchabvisa mugove wake pamuti woupenyu, nomuguta dzvene, napazvinhu zvakanyorwa mubhuku iri.

²⁰Iye anopupura izvozvi anoti, “Hongu, ndinokurumidza kuuya.” Ameni, uyai, Ishe Jesu.

²¹Nyasha dzaIshe Jesu ngadzive navose. Ameni.