Read Shona Union Version 2002 ZVAKAZARURWA 3 Bible Online

ZVAKAZARURWA 3 - Shona Union Version 2002 bible

ZVAKAZARURWA 3

¹“Nyorera mutumwa wekereke iri paSadhisi uti: “Zvanzi naiye ane mweya minomwe yaMwari, nenyeredzi nomwe: Ndinoziva mabasa ako, kuti unonzi uri mupenyu, asi wakafa.

²Pepuka, usimbise izvo zvakasara, zvakanga zvoda kufa; nokuti handina kuwana mabasa ako ari akakwana pamberi paMwari wangu.

³“Naizvozvo rangarira kuti wakagamuchira nokunzwa sei; uzvichengete, utendeuke. Naizvozvo kana usingapepuki, ndichauya sembavha, haungazivi nguva yandichakuwira nayo.

⁴Asi unamazita mashoma paSadhisi avanhu vasina kusvibisa nguo dzavo; vachafamba neni vane nguo chena, nokuti vakafanirwa nazvo.

⁵Anokunda, achapfekedzwa saizvozvo nguo chena; handingatongodzimi zita rake pabhuku youpenyu, ndichapupura zita rake pamberi paBaba vangu, napamberi pavatumwa vake.

⁶“Ane nzeve, ngaanzwe zvinoreva Mweya kukereke.

⁷“Nyorera mutumwa wekereke iri paFiradherifia, uti: “Zvanzi naiye mutsvene, iye wechokwadi, iye ane kiyi yaDhavhidhi, iye anoti kana achizarura, hakuna anopfiga, kana achipfiga, hakuna anozarura:

⁸Ndinoziva mabasa ako, (tarira, ndakaisa pamberi pako musuo wakazaruka, hakuna angagona kuupfiga), ndinoziva kuti une simba shoma hako; wakachengeta shoko rangu, ukasaramba zita rangu.

⁹Tarira ndinokupa vamwe vari vesinagoge raSatani, vanoti, tiri vaJudha, vasi ivo chaivo, asi vanoreva nhema; tarira, ndichavauyisa kuti vanamate pamberi petsoka dzako, uye vazive kuti ndakakuda.

¹⁰Zvawakachengeta shoko rokutsungirira kwangu, ndichakuchengetawo panguva yokuedzwa yoda kuuya panyika yose, kuedza vanogara panyika.

¹¹Ndinokurumidza kuuya; batisisa icho chaunacho, kuti urege kutorerwa korona yako.

¹²Anokunda ndichamuita mbiru mutemberi yaMwari wangu, haangazobudimozve; ndichanyora pamusoro pake zita raMwari wangu, nezita reguta raMwari wangu, Jerusaremu idzva rinoburuka kudenga kuna Mwari wangu, nezita rangu idzva.

¹³“Ane nzeve, ngaanzwe zvinoreva Mweya kukereke.

¹⁴“Nyorera mutumwa wekereke iri paRaodhikia, uti: “Zvanzi naAmeni, chapupu chakatendeka, chechokwadi, kutanga kwezvisikwa zvaMwari:

¹⁵Ndinoziva mabasa ako, kuti hautonhori kana kupisa. Dai uchitonhora kana kupisa.

¹⁶Zvino zvaunodziya, usingatonhori kana kupisa, ndichakusvisvina mumuromo mangu.

¹⁷“Nokuti unoti, ‘Ndakapfuma, ndakapfumiswa; handishayiwi chinhu;’ usingazivi, kuti ndiwe uno urombo nenhamo, uri murombo nebofu usina chokufuka.

¹⁸“Ndinokupa zano kuti utenge kwandiri ndarama yakaedzwa mumoto, kuti uve nepfuma, nenguo chena, kuti ufukidze; nyadzi dzokusafuka kwako dzirege kuonekwa; nechizoro chameso, kuti uzore meso ako, uone.

¹⁹Vose vandinoda ndinovaranga nokuvarova; naizvozvo shingaira utendeuke.

²⁰Tarira, ndimire pasuo, ndichigogodza; kana munhu akanzwa izwi rangu, akazarura musuo, ndichapinda kwaari, ndicharayira naye, naiye neni.

²¹Anokunda ndichamupa chinhu ichi, kuti agare neni pachigaro changu choushe, seniwo ndakakunda, ndikagara pamwechete naBaba vangu pachigaro chavo choushe.

²²“Ane nzeve, ngaanzwe zvinoreva Mweya kukereke.”