Read Shona Union Version 2002 ZVAKAZARURWA 4 Bible Online

ZVAKAZARURWA 4 - Shona Union Version 2002 bible

ZVAKAZARURWA 4

¹Shure kwaizvozvi, ndakatarira ndikaona musuo wakazaruka kudenga; nezwi rokutanga randakanzwa rakaita sehwamanda richitaura neni, richiti, “Kwira pano, ndigokuratidza zvinofanira kuitwa shure kwaizvozvi.”

²Pakarepo ndakava muMweya; tarira chigaro choushe chakagadzwa kudenga, nomumwe agere pachigaro.

³Iye akanga agerepo akanga akafanana nebwe rejasipisi neresaridhio; kwakanga kuno muraraungu wakakomberedza chigaro choushe, wakafanana nebwe resimaragidhino.

⁴Kwakanga kune zvigaro zvoushe zvina makumi maviri namana zvakanga zvakakomberedza chigaro choushe; napazvigaro pakanga pagere vakuru vana makumi maviri navana, vakapfeka nguo chena; vakanga vane korona dzendarama pamisoro yavo.

⁵Napachigaro choushe pakanga pachibuda mheni, namazwi, nokutinhira; nemwenje minomwe yakanga ichipfuta pamberi pechigaro choushe, iri Mweya minomwe yaMwari.

⁶Pamberi pechigaro choushe pakanga pane gungwa rakaonekera, rakafanana nekristaro; napakati pechigaro choushe, napamativi ose echigaro choushe, pakanga pane zvisikwa zvina zvipenyu, zvizere nameso mberi neshure kwazvo.

⁷Chisikwa chipenyu chokutanga chakanga chakafanana neshumba, chisikwa chipenyu chechipiri chakanga chakafanana nemhuru, chisikwa chipenyu chechitatu chakanga chine chiso chakaita sechomunhu, nechisikwa chipenyu chechina chakanga chakafanana negondo rinobhururuka.

⁸Nezvisikwa zvipenyu izvi zvina zvakanga zvina mapapiro matanhatu, chimwe nechimwe; zvakanga zvizere nameso kunhivi dzose nomukati; hazvizorori masikati nousiku, zvichiti, “Mutsvene, mutsvene, mutsvene, iye Ishe Mwari, waMasimbaose, iye akanga aripo, aripo, noachazouya.”

⁹Zvino kana zvisikwa zvipenyu izvi zvovigira iye anogara pachigaro choushe, iye ari mupenyu nokusingaperi-peri, kubwinya, nokukudzwa, nokuvonga.

¹⁰Vakuru vana makumi maviri navana vowira pasi pamberi paiye agere pachigaro choushe, vachinamata iye, ari mupenyu nokusingaperi-peri, vachikandira korona dzavo pamberi pechigaro choushe, vachiti,

¹¹“Imi Ishe, Mwari wedu, makafanira kuti muvigirwe kubwinya, nokukudzwa, nesimba, nokuti ndimi makasika zvinhu zvose, zvakavapo, zvikasikwa nokuda kwenyu.”