Read Shona Union Version 2002 ZVAKAZARURWA 5 Bible Online

ZVAKAZARURWA 5 - Shona Union Version 2002 bible

ZVAKAZARURWA 5

¹Zvino ndakaona muruoko rworudyi rwaiye akanga agere pachigaro choushe bhuku rakanyorwa mukati nokunze kwaro, rakanamatidzwa nezvisimbiso zvinomwe.

²Ipapo ndakaona mutumwa, ane simba, achidanidzira nezwi guru, achiti, “Ndianiko akafanira kuti azarure bhuku iri, nokusunungura zvisimbiso zvaro?”

³Asi kwakanga kusina munhu kudenga napanyika, kana napasi nepanyika, akagona kuzarura bhuku iro, kana kutarira mariri.

⁴Ipapo ndakachema zvikuru, zvakusina kuwanikwa munhu, akafanira kuti azarure bhuku, kana kutarira mariri.

⁵Zvino mumwe waVakuru akati kwandiri; “Usachema hako, tarira, Shumba yorudzi rwaJudha, Mudzi waDhavhidhi, yakakunda kuti izarure bhuku nezvisimbiso zvayo zvinomwe.”

⁶Zvino ndakaona pakati pechigaro choushe nezvisikwa zvipenyu zvina, napakati paVakuru, Gwayana rimire, rakaita serakabayiwa, rine nyanga nomwe nameso manomwe, iri Mweya minomwe yaMwari, yakatumwa kunyika yose.

⁷Iro rikauya, rikatora bhuku muruoko rworudyi rwaiye akanga agere pachigaro choushe.

⁸Zvino rakati ratora bhuku, zvisikwa zvipenyu zvina naVakuru vana makumi maviri navana vakawira pasi pamberi peGwayana, mumwe nomumwe anorudimbwa, nendiro dzendarama, dzakanga dzizere nezvinonhuwira, iri minyengetero yavatsvene.

⁹Vakaimba rwiyo rutsva, vachiti, “Ndimi makafanira kuti mutore bhuku nokuzarura zvisimbiso zvayo; nokuti makabayiwa, makatengera Mwari neropa renyu vanhu vanobva kumarudzi ose, nendimi dzose, navanhu vose, nendudzi dzose;

¹⁰mukavaitira Mwari wedu, kuti vave ushe navapristi, vabate ushe panyika.”

¹¹Zvino ndakaona, ndikanzwa izwi ravatumwa vazhinji vakanga vakakomberedza chigaro choushe nezvisikwa zvipenyu, naVakuru. Kuwanda kwavo kwakanga kuri zviuru zvezviuru nezviuru zvamazana

¹²vachiti nezwi guru, “Gwayana rakabayiwa rakafanira kuti rivigirwe ushe, nepfuma, nokuchenjera, nesimba, nokukudzwa, nokubwinya, nokurumbidzwa.”

¹³Ndikanzwa zvisikwa zvipenyu zvose zviri kudenga, napanyika, nezviri pasi penyika, napagungwa, nezvose zviri mukati mazvo, zvichiti, “Kurumbidzwa, nokukudzwa, nokubwinya, nesimba ngazvive kuna iye agere pamusoro pechigaro choushe, nokuGwayana nokusingaperi-peri.”

¹⁴Ipapo zvisikwa zvipenyu zvina zvakati, “Ameni.” Vakuru vana makumi maviri navanavo vakawira pasi, vakanamata.