Read Shona Union Version 2002 ZVAKAZARURWA 6 Bible Online

ZVAKAZARURWA 6 - Shona Union Version 2002 bible

ZVAKAZARURWA 6

¹Zvino ndakaona Gwayana richizarura chimwe chezvisimbiso zvinomwe, ndikanzwa chimwe chezvisikwa zvipenyu zvina chichiti nezwi romutinhiro, “Uya!”

²Ndikatarira, ndikaona bhiza jena, naiye akanga akaritasva, akanga anohuta; akapiwa korona, akabuda achikunda, uye kuti akunde.

³Akati azarura chisimbiso chechipiri, ndikanzwa chisikwa chipenyu chechipiri chichiti, “Uya!”

⁴Ipapo rimwe bhiza rakabuda riri dzvuku; akanga akaritasva akapiwa simba kuti abvise rugare panyika, kuti vaurayane; akapiwa munondo mukuru.

⁵Akati azarura chisimbiso chechitatu, ndikanzwa chisikwa chipenyu chechitatu chichiti, “Uya!” Ndikatarira, ndikaona bhiza dema; akanga akaritasva akanga ane chiyereso muruoko rwake.

⁶Ndikanzwa izwi pakati pezvisikwa zvipenyu zvina, richiti, “Chiyero chezviyo chichatengwa nedhenari, nezviyero zvitatu zvebhari nedhenari; usatadzira mafuta newaini.”

⁷Akati azarura chisimbiso chechina, ndikanzwa izwi rechisikwa chipenyu chechina richiti, “Uya!”

⁸Ndikatarira, ndikaona bhiza rakachenuruka; akanga akaritasva, zita rake Rufu; uye Hadhesi rakamutevera. Ivo vakapiwa simba pamusoro pechechina chenyika, kuti vauraye nomunondo, nenzara, norufu, nezvikara zvenyika.

⁹Akati azarura chisimbiso chechishanu, ndikaona panyasi pearitari mweya yavanhu vakanga vaurawa nokuda kweshoko raMwari, nokupupura kwavo kwavakapupura;

¹⁰vakadana nezwi guru vachiti, “Tenzi mutsvene wechokwadi, mucharega kutonga vanogara panyika nokutsiva ropa redu kusvikira riniko?”

¹¹Ipapo mumwe nomumwe wavo akapiwa nguo chena; vakaudzwa kuti vambozorora chinguva chiduku, kusvikira vamwe varanda pamwechete navo nehama dzavo, dzaifanira kuurawa saivo, varinganiswa vose.

¹²Zvino ndakaona pakazarura kwake chisimbiso chechitanhatu, kwakanga kunokudengenyika kwenyika kukuru, zuva rakasviba segudza remvere, mwedzi wose ukaita seropa;

¹³nenyeredzi dzedenga dzikawira pasi, somuonde unozuza maganga awo, kana uchizununguswa nomututu mukuru.

¹⁴Denga rikabva sebhuku, kana richipetwa; namakomo ose nezviwi zvose zvakabviswa panzvimbo dzazvo.

¹⁵Namadzimambo enyika, navakuru, navatungamiriri vehondo, navapfumi, navane simba, navaranda vose, navakasununguka vose, vakandovanda mumapako nomumabwe amakomo;

¹⁶vakati kumakomo nokumabwe, “Tiwirei, mutivige pameso aiye anogara pachigaro choushe, napakutsamwa kweGwayana;

¹⁷nokuti zuva guru rokutsamwa kwavo rakasvika; ndianiko anogona kumira?”