Read Shona Union Version 2002 ZVAKAZARURWA 7 Bible Online

ZVAKAZARURWA 7 - Shona Union Version 2002 bible

ZVAKAZARURWA 7

¹Shure kwaizvozvi ndakaona vatumwa vana, vamire kumativi mana enyika, vakabata mhepo ina dzenyika, kuti mhepo irege kurira panyika, kana pagungwa, kana pamiti yose.

²Ipapo ndakaona mumwe mutumwa achikwira achibva kumabvazuva, ane chisimbiso chaMwari mupenyu; akadana nezwi guru kuvatumwa vana, vaya vakanga vapiwa simba kuti vatadzire nyika negungwa,

³achiti, “Musatadzira nyika, kana gungwa, kana miti, kusvikira taisa chisimbiso pahuma dzavaranda vaMwari.”

⁴Ndikanzwa kuwanda kwavakaiswa chisimbiso; vane zviuru zvine zana namakumi mana nezvina, vakaiswa chisimbiso vachibva kumarudzi ose avana vaIsiraeri.

⁵Kurudzi rwaJudha vakaiswa chisimbiso vane zviuru zvine gumi nezviri; Kurudzi rwaRubheni vane zviuru zvine gumi nezviviri; Kurudzi rwaGadhi vane zviuru zvine gumi nezviviri;

⁶Kurudzi rwaAseri vane zviuru zvine gumi nezviviri; Kurudzi rwaNefitarimi vane zviuru zvine gumi nezviviri; Kurudzi rwaManase vane zviuru zvine gumi nezviviri;

⁷Kurudzi rwaSimioni vane zviuru zvine gumi nezviri; Kurudzi rwaRevhi vane zviuru zvine gumi nezviviri; Kurudzi rwaIsakari vane zviuru zvine gumi nezviri;

⁸Kurudzi rwaZabhuroni vane zviuru zvine gumi nezviviri; Kurudzi rwaJosefa vane zviuru zvine gumi nezviviri; Kurudzi rwaBhenjamini vakaiswa chisimbiso vane zviuru zvine gumi nezviviri.

⁹Shure kwaizvozvo ndakatarira, ndikaona vazhinjizhinji vasingagoni kuverengwa nomunhu, vakabva kundudzi dzose, namarudzi, navanhu, nendimi, vamire pamberi pechigaro choushe, napamberi peGwayana, vakapfeka nguo chena, vakabata muchindwe mumaoko avo;

¹⁰vakadanidzira nezwi guru, vachiti, “Ruponeso ngaruve kuna Mwari anogara pachigaro choushe, nokuGwayana.”

¹¹Ipapo vatumwa vose vakamira, vakakomba chigaro choushe, naVakuru, nezvisikwa zvipenyu zvina, vakawira pasi nechiso pamberi pechigaro choushe, vakanamata Mwari,

¹²vachiti, “Ameni: Kurumbidzwa, nokubwinya, nokuchenjera, nokuvonga, nokukudzwa, noushe, nesimba, ngazvive kuna Mwari nokusingaperi-peri. Ameni!”

¹³Ipapo mumwe waVakuru akapindura, akati kwandiri, “Ava vakapfeka nguo chena ndivanaaniko? Vanobvepiko?”

¹⁴Ndikati kwaari, “Ndivo vanobva mukutambudzika kukuru, vakasuka nguo dzavo vakadzichenesa muropa reGwayana.”

¹⁵Naizvozvo vari pamberi pechigaro choushe chaMwari, vanomushumira masikati nousiku mutemberi yake; iye, anogara pachigaro choushe, achavadzitira netabhenakeri.

¹⁶Havachazoziyi nenzara, havachazofi nenyota; havangapiswi nezuva kana nokumwe kupisa;

¹⁷nokuti Gwayana riri pakati pechigaro choushe richavafudza, richavatungamirira kumatsime emvura youpenyu; Mwari achapisika misodzi yose kumeso avo.