Read Shona Union Version 2002 ZVAKAZARURWA 9 Bible Online

ZVAKAZARURWA 9 - Shona Union Version 2002 bible

ZVAKAZARURWA 9

¹Zvino mutumwa wechishanu akaridza, ndikaona nyeredzi, yakabva kudenga, yawira pasi; ikapiwa kiyi yegomba rakadzika-dzika.

²Ikazarura gomba rakadzika-dzika, hutsi hukakwira huchibva mugomba, sohutsi hwevira guru; zuva nedenga zvikasvibiswa nohutsi hwegomba.

³Muhutsi makabuda mhashu dzikauya panyika, dzikapiwa simba sesimba rezvinyavada zvenyika.

⁴Dzikaudzwa kuti dzirege kutadzira uswa hwenyika, nechinhu chinyoro, kana miti yose, asi vanhu bedzi vasina chisimbiso chaMwari pahuma dzavo.

⁵Hadzina kupiwa basa rokuvauraya, asi kuti varwadziswe mwedzi mishanu; kurwadzisa kwadzo kwakanga kwakaita sokurwadzisa kwechinyavada, kana chichiruma munhu.

⁶Namazuva iwayo vanhu vachatsvaka rufu, asi havangatongoruwani, vachavinga kufa, asi rufu ruchavatiza.

⁷Pakuonekwa kwadzo mhashu dzakanga dzakaita samabhiza akagadzirirwa kurwa; pamisoro yadzo pakanga panezvimwe zvakaita sekorona dzakafanana nendarama; zviso zvadzo zvakanga zvakaita sezviso zvavanhu.

⁸Dzakanga dzine vhudzi rakaita sevhudzi ravakadzi, nameso adzo akanga akaita seeshumba.

⁹Dzakanga dzine zvidzitiro zvechipfuva zvakaita sezvamatare; nokutinhira kwamapapiro adzo kwakaita sokutinhira kwengoro dzamabhiza mazhinji anomhanyira kurwa.

¹⁰Dzakanga dzine miswe, yakaita seyezvinyavada, noumborera; pamiswe yadzo pakanga pane simba rokukuvadza vanhu mwedzi mishanu.

¹¹Dzakanga dzina mambo wadzo, ari mutumwa wegomba rakadzika-dzika, zita rake nechiHebheru ndiAbhadhoni, nechiGiriki zita rake ndiAporioni.

¹²Nhamo imwe yapfuura; tarira, nhamo dzimwe mbiri dzinotevera shure kwaizvozvi.

¹³Zvino mutumwa wechitanhatu akaridza, ndikanzwa izwi richibva panyanga ina dzearitari yendarama yakanga iri pamberi paMwari,

¹⁴richiti kumutumwa wechitanhatu akanga ane hwamanda, “Sunungura vatumwa vana vakasungwa parwizi rukuru runonzi Yufuratesi.”

¹⁵Ipapo vatumwa vana vakasunungurwa, vakanga vakagadzirirwa nguva, nezuva, nomwedzi, negore, kuti vauraye chetatu chavanhu.

¹⁶Kuwanda kwehondo dzavatasvi vamabhiza kwakanga kuri zviuru zvezviuru zvamazana maviri; ndikanzwa kuverengwa kwavo.

¹⁷Saizvozvowo ndakaona mabhiza pakuratidzwa kwangu, navakanga vakaatasva, vane zvidzitiro zvechifuva zvakaita sezvomoto, nezvehiasinto, nezvesuriferi; nemisoro yamabhiza yakanga yakaita semisoro yeshumba; nomumiromo yawo makabuda moto, nohutsi nesuriferi.

¹⁸Chetatu chavanhu chakaurawa namadambudziko awa matatu, anoti, moto nohutsi nesuriferi, zvakabuda mumiromo yawo.

¹⁹Nokuti simba ramabhiza riri mumiromo yawo, nomumiswe yavo; nokuti miswe yawo yakaita senyoka, ine misoro; anokuvadza nayo.

²⁰Vamwe vanhu vasina kuurawa namadambudziko awa, havana kutendeuka pamabasa amaoko avo, kuti varege kunamata mweya yakaipa, nezvifananidzo zvendarama, nezvisirivha, nezvendarira, nezvamabwe, nezvemiti, zvisingagoni kuona, kana kunzwa, kana kufamba;

²¹havana kutendeukawo pakuuraya kwavo, kana pakurowa kwavo, kana paupombwe hwavo, kana pakuba kwavo.