Read Shona Union Version 2002 RUTE 3 Bible Online

RUTE 3 - Shona Union Version 2002 bible

RUTE 3

¹Zvino Naomi, vamwene vake, akati kwaari, “Mwanasikana wangu, handifaniri kukutsvakira zororo, kuti ufare here?

²Zvino Bhoazi, kwawakanga uri kuvasikana vake, haizi hama yedu here? Tarira iye ucharudza bhari madekwana ano paburiro.

³Zvino chizvishambidza, uzore mafuta, ufuke nguo dzako, ndokuburukira kuburiro, asi usazviratidza kumurume uyo, kusvikira apedza kudya nokunwa.

⁴Zvino kana iye achindovata, iwe unofanira kucherechedza paanondovata, ugoenda wondofukura tsoka dzake, wovatapo pasi; iye achakuudza zvauchafanira kuita.”

⁵Akati kwaari, “Zvose zvamunondiudza ndichazviita.”

⁶Ipapo akaburukira kuburiro, akandoita zvose zvaakanga arairwa navamwene vake.

⁷Zvino Bhoazi wakati apedza kudya nokunwa, mwoyo wake ukafara, akandovata pamucheto womurwi wezviyo; ipapo iye akanyatsosvika, akafukura tsoka dzake, ndokuvata pasi.

⁸Pakati pousiku murume akavhunduka, akapinduka, onei mukadzi avete patsoka dzake.

⁹Akati, “Ndiwe aniko?” Akapindura akati, “Ndini Rute, murandakadzi wenyu; fukidzai murandakadzi wenyu nenguo yenyu, nokuti muri hama yomumba.”

¹⁰Ipapo iye akati, “Uropafadzwe naJehovha, mwanasikana wangu, nokuti pakupedzisira wakaita nokunaka kupfuura pakutanga; nokuti hauna kutevera majaya, kunyange aiva varombo kana vapfumi.

¹¹Zvino mwanasikana wangu, usatya hako; ndichakuitira zvose sezvaunotaura; nokuti vose veguta rangu vanoziva kuti uri mukadzi wakanaka kwazvo.

¹²Zvino zvirokwazvo kuti ini ndiri hama yomumba, asi kune imwe hama iri pedyo kupfuura ini.

¹³Vata hako usiku hwuno; zvino mangwana, kana iye achida kukuitira zvinofanira kuitwa nehama, ndizvo hazvo; ngaaite zvinofanira kuitwa nehama; asi kana asingadi kukuitira zvinofanira kuitwa nehama, ini ndichakuitira zvinofanira kuitwa nehama, ndinopika naJehovha mupenyu; chivata hako kusvikira mangwana.”

¹⁴Iye akavata patsoka dzake kusvikira mangwanani, akamuka vanhu vachigere kunatsoona. Nokuti wakati, “Ngazvirege kuzikanwa, kuti mukadzi wakauya paburiro.”

¹⁵Akati, “Uya nenguo yawakafuka, uibate,” akaibata, iye akayera zviyero zvitanhatu zvebhari, akamutakudza akapinda muguta.

¹⁶Zvino wakati achisvika kuna vamwene vake, ivo vakati, “Zvazodiniko mwana wangu?” Akavaudza zvose zvaakanga aitirwa nomurume uya.

¹⁷Akati, “Iye wandipa zviyero izvi zvitanhatu zvebhari, nokuti wakati, ‘Usaenda kuna vamwene vako usina chinhu.’ ”

¹⁸Zvino vakati, “Chigara hako, mwana wangu, kusvikira waona mugumo weshoko iri, nokuti murume uyu haangazorori kusvikira apedza shoko iri nhasi.”