Read Shona Union Version 2002 RUTE 4 Bible Online

RUTE 4 - Shona Union Version 2002 bible

RUTE 4

¹Zvino Bhoazi wakakwira kusuo, akagara pasi; hama yomumba yakanga yarehwa naBhoazi, ndokupfuura napo; akati kwaari, “Nhaiwe, tsaukira kuno, ugare pasi.” Iye akatsauka, akagara pasi.

²Akatora varume gumi kuvakuru veguta, akati, “Garai pasi pano.” Ivo vakagara pasi.

³Zvino akati kuhama yomumba, “Naomi, uya wakadzoka achibva kunyika yaMoabhu, unoda kutengesa mugove wenyika waiva womunun'una wedu Erimereki;

⁴ndakati ndichakuudza izvozvo, ndichiti, ‘Chiutenga pamberi pavanhu vagere pano, napamberi pavakuru vavanhu vangu. Kana uchida kuudzikinura, undiudze, chiudzikinura hako, asi kana usingadi kuudzikinura, ndiudze, ndizive, nokuti hakuna ungaudzikinura asi iwe; unokutevera ndini.’ ” Akati, “Ndichaudzikinura ini.”

⁵Zvino Bhoazi akati, “Zuva iro raunotenga munda uyo kuna Naomi, unofanira kuutengawo kuna Rute muMoabhu, mukadzi wowakafa, kuti umutse zita rowakafa panhaka yake.”

⁶Hama iyo yomumba ikati, “Handigoni kuzvidzikinurira uyo, kuti ndirege kutadzira nhaka yangu, chitora hako iwe simba rangu rokudzikinura, nokuti ini handigoni kuudzikinura.”

⁷Zvino iyi ndiyo tsika yakanga iripo kare pakati pavaIsiraeri kana vachidzikinura nokutsinhanha, kuti zvose zvisimbiswe. Munhu waibvisa shangu yake, ndokuipa hama yake, ndiwo waiva mutoo wokupupura nawo pavaIsiraeri.

⁸Zvino hama iyo yomumba ikati kuna Bhoazi, “Chizvitengera hako uyo.” Akabvisa shangu yake.

⁹Zvino Bhoazi akati kuvakuru nokuvanhu vose, “Imi muri zvapupu nhasi, kuti ndatenga kuna Naomi zvose zvaiva zvaErimereki, nezvose zvaiva zvaKirioni nezvaMaroni.

¹⁰Ndatengawo Rute muMoabhu, mukadzi waMaroni, kuti ave mukadzi wangu, kuti ndimutse zita rowakafa panhaka yake, zita rowakafa rirege kurova pakati pehama dzake napasuo renzvimbo yake; imi muri zvapupu nhasi.”

¹¹Zvino vanhu vose vakanga vari pasuo navakuru vakati, “Tiri zvapupu hedu. Jehovha ngaaite mukadzi uyu wauya kumba kwako saRakeri uye saRea, ivo vaviri vakavaka imba yaIsiraeri; newewo uve nesimba paEfurata, ukurumbire paBheterehemu;

¹²imba yako ive seimba yaPerezi, wakaberekerwa Judha naTamari, navana vauchapiwa naJehovha kumukadzi uyu uchiri muduku.”

¹³Ipapo Bhoazi akawana Rute, akava mukadzi wake, akapinda kwaari, Jehovha akamutoresa mimba, akapona mwanakomana.

¹⁴Zvino vakadzi vakati kuna Naomi, “Jehovha ngaakudzwe, usina kukushaisa hama yomumba nhasi, zita rake rikurumbire pakati paIsiraeri.

¹⁵Uchava kwauri muraramisi woupenyu, nomuriritiri wouchembere hwako; nokuti mukadzi womwana wako uyu, unokuda, unopfuura vanakomana vanomwe kwauri, ndiye wakamubereka.”

¹⁶Zvino Naomi akatora mwana, akamufungatira pachipfuva chake, akava mureri wake.

¹⁷Vakadzi vakanga vagere naye vakamutumidza zita, vachiti, “Naomi wakaponerwa mwanakomana;” vakamutumidza zita rinonzi Obhedhi; ndiye wakazova baba vaJese, baba vaDhavhidhi.

¹⁸Zvino ndiwo marudzi aPerezi: Perezi wakabereka Hezironi;

¹⁹Hezironi akabereka Rami, Rami akabereka Aminadhabhi;

²⁰Aminadhabhi akabereka Nashoni, Nashoni akabereka Sarimoni;

²¹Sarimoni akabereka Bhoazi, Bhoazi akabereka Obhedhi;

²²Obhedhi akabereka Jese, Jese akabereka Dhavhidhi.