Read Shona Union Version 2002 1 Samueri 1 Bible Online

1 Samueri 1 - Shona Union Version 2002 bible

1 Samueri 1

¹Zvino kwakanga kuno mumwe murume weRamataimisofimi, wenyika yamakomo yaEfuremu, wainzi Erikana, mwanakomana weJehoramu, mwanakomana waErihu, mwanakomana waTohu, mwanakomana waZufi muEfurata.

²Iye wakanga ana vakadzi vaviri, zita romumwe rainzi Hana, uye zita romumwe rainzi Penina; Penina wakanga ana vana, asi Hana wakanga asina vana.

³Zvino murume uyu waisikwira gore rimwe nerimwe achibva kuguta rake kundonamata nokubayira Jehovha wehondo paShiro. Vanakomana vaviri vaEri, Hofini naPinehasi, vakanga varipo vari vapristi vaJehovha

⁴Zvino zuva rokubayira kwake rakati rasvika, Erikana akapa mukadzi wake Penina, navanakomana vake vose navanasikana vake migove yavo;

⁵asi Hana wakamupa migove miviri; nokuti wakanga achida Hana, asi Jehovha wakanga azarira chizvaro chake.

⁶Zvino muvengi wake Penina akamunetsa kwazvo, kuti azvidye mwoyo, nokuti Jehovha wakazarira chizvaro chake.

⁷Akaita saizvozvo gore rimwe nerimwe, kana achikwira kuimba yaJehovha; akamunetsa saizvozvo, saka wakachema, akaramba kudya.

⁸Zvino murume wake Erikana akati kwaari, “Hana, unochemeiko? Unorambireiko kudya? Mwoyo wako une shungu nei? Ko ini handikupfuuriri vanakomana vane gumi here?”

⁹Saka Hana wakasimuka, vapedza kudya paShiro, uye vapedza kunwa. Zvino Eri mupristi wakanga agere pachigaro chake pamukova wetemberi yaJehovha.

¹⁰Zvino Hana wakanga ane shungu kwazvo, akanyengetera kuna Jehovha, akachema kwazvo.

¹¹Akapika mhiko, akati, “Jehovha wehondo, kana mukava nehanya kwazvo nokutambudzika kwomurandakadzi wenyu, mukandirangarira, mukasakanganwa murandakadzi wenyu, asi mukapa murandakadzi wenyu mwana womukomana, ipapo ndichamupa Jehovha mazuva ose oupenyu hwake, musoro wake haungaveurwi nechisvo.”

¹²Zvino wakati achiramba achinyengetera pamberi paJehovha, Eri akacherekedza muromo wake.

¹³Nokuti Hana wakanga achitaura nechomumwoyo make, miromo yake yoga yakanga ichimenyenyedzwa, asi izwi rake rakanga risinganzwiki; saka Eri wakati wabatwa newaini.

¹⁴Eri akati kwaari, “Ucharamba wakabatwa kusvikira riniko? Rasha waini yako.”

¹⁵Hana akapindura akati, “Kwete, ishe wangu, ndiri mukadzi ane shungu pamweya, handina kunwa waini, kana zvinobata, asi ndadurura mweya wangu pamberi paJehovha.

¹⁶“Musati murandakadzi wenyu mwanasikana wakaisvoipa, nokuti kusvikira zvino ndakanga ndichitaura nokuda kwokuchema kwangu kukuru nokutambudzika kwangu.”

¹⁷Ipapo Eri akamupindura, akati, “Enda hako norugare; Mwari waIsiraeri ngaakupe chawakakumbira kwaari.”

¹⁸Iye akati, “Murandakadzi wenyu ngaanzwirwe tsitsi nemi.” Naizvozvo mukadzi akaenda hake, akazodya, chiso chake chikashanduka.

¹⁹Zvino vakamuka mangwanani, vakanamata kuna Jehovha, vakadzokera ndokusvika kumba kwavo paRama; Erikana akaziva mukadzi wake Hana, Jehovha akamurangarira.

²⁰Nguva yakati yapfuura, Hana akava nemimba, akabereka mwanakomana, akamutumidza zita rinonzi Samueri, achiti, “Nokuti ndakamukumbira kuna Jehovha.”

²¹Zvino murume Erikana navose veimba yake vakakwira kuna Jehovha kundobayira chibayiro chegore rimwe nerimwe, nokumupa sezvaakapika.

²²Asi Hana haana kukwira, nokuti wakati kumurume wake, “Handingakwiri kusvikira mwana arumurwa, ipapo ndichaenda naye, kuti asvike pamberi paJehovha, agarepo nokusingaperi.”

²³Erikana murume wake akati kwaari, “Ita sezvaunofunga; chimbogara hako kusvikira wamurumura; asi Jehovha ngaasimbise shoko rake.” Naizvozvo mukadzi akambogara hake, akayamwisa mwanakomana wake, kusvikira amurumura.

²⁴Wakati amurumura, akakwira naye ane nzombe nhatu, neefa imwe youpfu, nedende rewaini, akandomuisa mumba maJehovha paShiro. Asi mwana wakanga achiri muduku.

²⁵Zvino vakabaya nzombe, vakaisa mwana kuna Eri.

²⁶Hana akati, “Ishe wangu, nomweya wenyu mupenyu, ishe wangu, ndini mukadzi wakadeya kumira pano pamberi penyu, ndichinyengetera kuna Jehovha.

²⁷Ndakakumbira mwana uyu, Jehovha akandipa chandakakumbira kwaari;

²⁸saka neni ndamupa Jehovha; mazuva ose okurarama kwake wakapiwa Jehovha.” Akanamata kuna Jehovha ipapo.