Read Shona Union Version 2002 1 Samueri 10 Bible Online

1 Samueri 10 - Shona Union Version 2002 bible

1 Samueri 10

¹Zvino Samueri akatora chinu chamafuta, akadurura pamusoro wake, akamutsvoda, akati, “Jehovha haana kukuzodza here kuti uve mutungamiriri wavanhu venhaka yake?

²“Kana ukabva kwandiri nhasi uchandowana varume vaviri parinda raRakeri, pamuganho waBhenjamini, paZeriza; ivo vachati kwauri, ‘Mbongoro dzawakanga uchitsvaka dzawanikwa; zvino, baba vako havachine hanya nembongoro, asi vofunganya pamusoro pako,’ vachiti ‘Ndichaita seiko pamusoro pomwanakomana wangu?’

³Zvino uchabvapo ukapfuura mberi, ukasvika pamuouki weTabhori; ipapo uchasangana navarume vatatu vanokwira kuna Mwari paBhetieri, mumwe akatakura mbudzana nhatu, mumwe akatakura mapundu matatu ezvingwa, uye mumwe akatakura dende rewaini;

⁴ivo vachakukwazisa, ndokukupa mapundu maviri ezvingwa; ugamuchire izvozvo pamaoko avo.

⁵Pashure uchasvika pagomo raMwari pane boka ravarwi ravaFirisitia; zvino kana uchisvika paguta, uchasangana neboka ravaporofita vanoburuka padunhu rakakwirira vakatungamirirwa nemitengeranwa, nengoma, nenyere, nembira, vachingoporofita;

⁶“Ipapo Mweya waJehovha uchauya pamusoro pako nesimba, ukaporofita pamwechete navo, ukashanduka ukava mumwe munhu.

⁷Zvino kana zviratidzo izvi zvikaonekwa newe, uite chinhu chipi nechipi chaunoratidzwa kuti uchiite, nokuti Mwari anewe.

⁸Zvino unditungamirire Girigari; tarira, ini ndichaburukira kwauri, kuti ndibayire zvipiriso zvinopiswa nezvipiriso zvokuyananisa; unofanira kundimirira mazuva manomwe, kusvikira ndauya kwauri, ndikuratidze zvaunofanira kuita.”

⁹Zvino wakati atendeuka, obva kuna Samueri, Mwari akamupa mumwe mwoyo; zviratidzo izvo zvose zvikaitika nomusi iwoyo.

¹⁰Vakati vachisvika pagomo, boka ravaporofita rikasangana naye; Mweya waMwari wakauya pamusoro pake nesimba, akaporofita pakati pavo.

¹¹Zvino vose vaimuziva kare vakati vachiona izvozvo, kuti woporofita pamwechete navo, vanhu vakataurirana, vakati, “Chinyiko chawira mwanakomana waKishi? Sauro wava pakati pavaporofitawo here?”

¹²Zvino mumwe wapo akapindura, akati, “Baba vavo ndianiko?” Naizvozvo yakazova shumo kuti, “Ko Sauro wava pakati pavaporofita here?”

¹³Akati apedza kuporofita, akasvika padunhu rakakwirira.

¹⁴Babamunini vaSauro vakati kwaari, nokumuranda wake, “Makanga maendepiko?” Akati, “Kundotsvaka mbongoro, asi takati tichiona kuti hadziwanikwi, tikaenda kuna Samueri.”

¹⁵Babamunini vaSauro vakati, “Dondiudzawo zvamakaudzwa naSamueri.”

¹⁶Ipapo Sauro akati kuna babamunini vake, “Wakatiudza pachena, kuti mbongoro dzatowanikwa hadzo.” Asi haana kumuudza shoko roushe rakanga rataurwa naSamueri.

¹⁷Zvino Samueri akakoka vanhu kuna Jehovha paMizipa,

¹⁸akati kuvana vaIsiraeri, “Zvanzi naJehovha, Mwari waIsiraeri, ‘Ndakabudisa vana vaIsiraeri paIjipiti, ndikakurwirai pamaoko avaIjipiti, napamaoko amadzimambo ose aikuremedzai;

¹⁹asi nhasi maramba Mwari wenyu, iye unokuponesai amene panjodzi dzenyu dzose nenhamo dzenyu,’ mukati kwaari, ‘Kwete, asi tigadzire mambo ungatibata.’ Naizvozvo zvino unganai pamberi paJehovha namarudzi enyu uye nezviuru zvenyu.”

²⁰Naizvozvo Samueri akaswededza marudzi ose aIsiraeri, rudzi rwaBhenjamini rukabatwa.

²¹Akaswededza rudzi rwaBhenjamini, nedzimba dzarwo, imba yaMatiri ikabatwa; ipapo Sauro mwanakomana waKishi akabatwa; asi vakati vomutsvaka, akashaikwa.

²²Naizvozvo vakabvunzazve Jehovha, vakati, “Iye munhu ari pano here?” Jehovha akapindura, akati, “Tarirai; wavanda pakati penhumbi.”

²³Ipapo vakamhanya vakamutorapo; zvino wakati amira pakati pavanhu, akapfuura vanhu vose pakureba kubva pamafudzi ake kusvika kumusoro wake.

²⁴Samueri akati kuvanhu vose, “Munoona wakatsaurwa naJehovha, kuti hakuna wakafanana naye pakati pavanhu vose here?” Vanhu vose vakadanidzira vachiti, “Mambo ngaararame.”

²⁵Zvino Samueri akaudza vanhu tsika dzoushe, akadzinyora mubhuku, akazvichengeta pamberi paJehovha. Samueri akaendisa vanhu vose mumwe nomumwe kumba kwake.

²⁶NaSaurowo wakaenda kumba kwake paGibhea, uye varume vose voumhare vakanga vabayiwa mwoyo yavo naMwari vakaendawo naye.

²⁷Asi vamwe vakaisvoipa vakati, “Munhu uyu ungatiponesa seiko?” Vakamushora, vakasamuvigira zvipo. Asi iye wakaramba anyerere hake.