Read Shona Union Version 2002 1 Samueri 18 Bible Online

1 Samueri 18 - Shona Union Version 2002 bible

1 Samueri 18

¹Zvino wakati apedza kutaura naSauro, mwoyo waJonatani ukanamatira mwoyo waDhavhidhi, Jonatani akamuda sezvaakanga achida mwoyo wake.

²Sauro akamutora zuva iro, akasada kumutendera kudzokera kumusha kwake, kumba kwababa vake.

³Zvino Jonatani akaita sungano naDhavhidhi, nokuti wakanga achimuda sezvaakanga achida mwoyo wake.

⁴Jonatani akabvisa nguo yaakanga akafuka, akaipa Dhavhidhi, nezvisimiro zvake, kunyange nomunondo wake, nouta hwake, nebanhire rake.

⁵Dhavhidhi akasienda kwose kwaaitumwa naSauro, akabata mabasa ose nokungwara; Sauro akamuita mukuru wavarume vehondo; zvikafadza vanhu vose uye navaranda vaSaurowo.

⁶Zvino vakati vachisvika pakudzoka kwaDhavhidhi pakuuraya muFirisitia, vakadzi vakabuda kumaguta ose avaIsiraeri vachiimba, vachitamba, kuzosangana namambo Sauro nengoma, nokufara uye nezvimwe zvokuridza.

⁷Vakadzi vakaimba vachibvumirana pakuridza kwavo, vakati, “Sauro wakauraya zviuru zvamazana ake, Asi Dhavhidhi makumi ezviuru zvamazana ake.”

⁸Sauro akatsamwa kwazvo, shoko iri rikasamufadza, akati, “Vakapa Dhavhidhi makumi ezviuru zvamazana, asi ini vakandipa zviuru zvoga; chaanoshaiwa zvino chinyiko, asi ushe hwoga?”

⁹Zvino kubva pazuva iro namazuva ose Sauro akachenjerera Dhavhidhi.

¹⁰Zvino fume mangwana mweya wakaipa, wakanga watumwa naMwari, ukauya pamusoro paSauro nesimba, iye akataura nokupenga mukati meimba yake; Dhavhidhi akaridza noruoko rwake sezvaaita zuva rimwe nerimwe; Sauro wakanga akabata pfumo muruoko rwake.

¹¹Sauro akaposha pfumo, nokuti wakati, “Ndichabayira Dhavhidhi pamadziro.” Dhavhidhi akanzvenga kaviri pamberi pake.

¹²Sauro akatya Dhavhidhi, nokuti Jehovha wakanga abva kuna Sauro.

¹³Naizvozvo Sauro akamutamisa abve kwaari, akamuita mukuru wechiuru, akabuda nokupinda pakati pavanhu.

¹⁴Dhavhidhi akafamba nokungwara pazvose zvaakaita, Jehovha akava naye.

¹⁵Zvino Sauro wakati achiona kuti unofamba nokungwara kukuru, akamutya kwazvo.

¹⁶Asi vaIsiraeri vose navaJudha vose vakada Dhavhidhi, nokuti waibuda nokupinda pakati pavo.

¹⁷Zvino Sauro akati kuna Dhavhidhi, “Tarira, mukunda wangu mukuru Merabhi, ndichakupa iye ave mukadzi wako; asi iwe uve mhare yangu, urwe hondo dzaJehovha.” Nokuti Sauro wakati, “Ruoko rwangu ngarurege kumuuraya, asi maoko avaFirisitia ngaamuuraye.”

¹⁸Dhavhidhi akati kuna Sauro, “Ini ndini aniko, noupenyu hwangu chinyiko, kana imba yababa vangu pakati paIsiraeri, kuti ndive mukwambo wamambo?”

¹⁹Asi nguva iyo Merabhi mukunda waSauro yaaifanira kupiwa Dhavhidhi, iye akapiwa Adhirieri muMehorati, ave mukadzi wake.

²⁰Zvino Mikari mukunda waSauro, wakanga achida Dhavhidhi; vakaudza Sauro, akafara nazvo.

²¹Ipapo Sauro akati, “Ndichamupa iye, ave musungo kwaari, uye kuti vaFirisitia varwe naye.” Naizvozvo Sauro akati kuna Dhavhidhi, “Nhasi uchava mukwambo wangu rwechipiri.”

²²Ipapo Sauro akaraira varanda vake, akati, “Tauriranai naDhavhidhi pakavanda, muti, ‘Tarira, mambo unokufarira, navaranda vake vose vanokuda;’ naizvozvo zvino chiva mukwambo wamambo.”

²³Varanda vaSauro vakataura mashoko iwayo munzeve dzaDhavhidhi. Dhavhidhi akati, “Imi munoti zvitete here kuva mukwambo wamambo, zvandiri murombo hangu usingakudzwi?”

²⁴Varanda vaSauro vakamuudza vakati, “Dhavhidhi wataura mashoko okuti.

²⁵Sauro akati, ‘Muti kuna Dhavhidhi, Mambo haatsvaki kurovorerwa, asi zvikanda zvapamberi zvine zana zvavaFirisitia, kuti mambo atsive vavengi vake.’ ” Asi Sauro wakafunga kuurayisa Dhavhidhi navaFirisitia.

²⁶Zvino varanda vake vakati vachiudza Dhavhidhi mashoko iwayo, Dhavhidhi akafara kuva mukwambo wamambo. Zvino mazuva asati apera,

²⁷Dhavhidhi akasimuka, akaenda iye navanhu vake, akauraya varume vana mazana maviri avaFirisitia; Dhavhidhi akauya nezvikanda zvavo zvapamberi, akazvipa zviri zvose kuna mambo, kuti ave mukwambo wamambo. Ipapo Sauro akamupa Mikari mukunda wake, ave mukadzi wake.

²⁸Naizvozvo Sauro akaziva nokuona kuti Jehovha ana Dhavhidhi; Mikari mukunda waSauro akamuda.

²⁹Sauro akanyanya kutya Dhavhidhi; Sauro akaramba achivenga Dhavhidhi.

³⁰Zvino machinda avaFirisitia akabuda; nguva dzose kana vobuda, Dhavhidhi akakunda vamwe varanda vose vaSauro pakungwara; naizvozvo zita rake rikakurumbira kwazvo.