Read Shona Union Version 2002 1 Samueri 19 Bible Online

1 Samueri 19 - Shona Union Version 2002 bible

1 Samueri 19

¹Zvino Sauro akataura naJonatani mwanakomana wake, navaranda vake vose, kuti vauraye Dhavhidhi.

²Asi Jonatani mwanakomana waSauro, wakanga achifarira Dhavhidhi kwazvo. Naizvozvo Jonatani akaudza Dhavhidhi, akati, “Sauro, baba vangu, vanotsvaka kukuuraya; naizvozvo zvino, chenjera kwazvo mangwana, ugare pakavanda, uvande;

³ini ndichabuda, ndichandomira kuna baba vangu mumunda, mauri, nditaurirane nababa vangu pamusoro pako; kana ndichinge ndikaona chinhu, ndichakuudza.”

⁴Ipapo Jonatani akareverera Dhavhidhi zvakanaka kuna Sauro baba vake, akati kwavari, “Mambo ngaarege kutadzira Dhavhidhi muranda wake, nokuti iye haana kukutadzirai imi, asi wakakuitirai zvakanaka kwazvo;

⁵nokuti wakabata upenyu hwake mumaoko ake, akauraya muFirisitia; Jehovha akakundisa vaIsiraeri nokukunda kukuru; imi makazviona, mukafara; naizvozvo muchatadzireiko ropa risine mhosva, mukauraya Dhavhidhi asine mhaka hake?”

⁶Sauro akaterera izwi raJonatani, Sauro akapika akati, “NaJehovha mupenyu, haangaurawi!”

⁷Zvino Jonatani akadana Dhavhidhi, Jonatani akamuzivisa zvinhu izvo zvose. Jonatani akaenda naDhavhidhi kuna Sauro, akagara pamberi pake sapakutanga.

⁸Zvino kurwa kukavapozve, Dhavhidhi akabuda kundorwa navaFirisitia, akavauraya nokuuraya kukuru, vakatiza pamberi pake.

⁹Mweya wakaipa, wakanga watumwa naJehovha, ukauya pamusoro paSauro, agere mumba make ane pfumo rake muruoko rwake; Dhavhidhi akaridza noruoko rwake.

¹⁰Sauro akaidza kubayira Dhavhidhi pamadziro nepfumo; Dhavhidhi akatiza, akapukunyuka usiku uhwo.

¹¹Ipapo Sauro akatuma nhume kumba kwaDhavhidhi kumurinda nokumuuraya mangwanani; Mikari mukadzi waDhavhidhi, akamuudza akati, “Kana ukasaponesa upenyu hwako usiku hwuno, uchaurawa mangwana.”

¹²Naizvozvo Mikari akaburutsa Dhavhidhi pasi napawindo; akaenda, akatiza, akapukunyuka.

¹³Mikari akatora terafimi, akairadzika panhoo, akaisa mutsamiro wemvere dzembudzi pamusoro wayo, akaifukidza nejira.

¹⁴Zvino Sauro wakati achituma nhume kuzobata Dhavhidhi, iye akati, “Unorwara.”

¹⁵Ipapo Sauro akatuma nhume kuzotarira Dhavhidhi akati, “Uyai naye kwandiri ari panhoo, ndimuuraye.”

¹⁶Zvino nhume dzakati dzichipinda, dzikaona terafimi iri panhoo nomutsamiro wemvere dzembudzi pamusoro wayo.

¹⁷Sauro akati kuna Mikari, “Wandinyengereiko kudai, ukarega muvengi wangu achienda, akapukunyuka?” Mikari akapindura Sauro achiti, Iye wakati kwandiri, “Ndirege, ndiende; ndichakuurayireiko?”

¹⁸Dhavhidhi akatiza, akapukunyuka, akasvika kuna Samueri paRama, akamuudza zvose zvaakanga aitirwa naSauro. Iye naSamueri vakandogara Naioti.

¹⁹Zvino Sauro wakaudzwa, zvichinzi, “Tarirai, Dhavhidhi uri Naioti paRama.”

²⁰Sauro akatuma nhume kundobata Dhavhidhi; asi idzo dzakati dzichiona boka ravaporofita vachiporofita, naSamueri amire ari mutungamiriri wavo, Mweya waMwari akauya pamusoro penhume dzaSauro, naidzo dzikaporofitawo.

²¹Zvino Sauro wakati achiudzwa izvozvo, akatumazve dzimwe nhume, naidzo dzikaporofitawo. Ipapo Sauro akatumazve nhume rwechitatu, naidzo dzikaporofitawo.

²²Zvino naiye akaendawo Rama, akasvika patsime guru riri paSeku, akabvunza akati, “VanaSamueri naDhavhidhi varipiko?” Mumwe akati, “Tarirai, vari Naioti paRama.”

²³Iye akaendako Naioti paRama, Mweya waMwari wakauya pamusoro pakewo, akafamba achiporofita kudzimara asvika Naioti paRama.

²⁴Akabvisawo nguo dzake, akaporofita pamberi paSamueri, akavata pasi, asakafuka, zuva iro rose nousiku uhwo hwose. Naizvozvo vanoti, “Sauro uri pakati pavaporofitawo here?”