Read Shona Union Version 2002 1 Samueri 20 Bible Online

1 Samueri 20 - Shona Union Version 2002 bible

1 Samueri 20

¹Zvino Dhavhidhi wakatiza paNaioti paRama, akaenda akati kuna Jonatani, “Ndadiniko? Kutadza kwangu ndokwei? Chivi changu pamberi pababa vako ndechipi, zvavanotsvaka kundiuraya?”

²Iye akati kwaari, “Haisva, usadaro, haungafi; tarira baba vangu havangaiti chinhu chikuru kana chiduku, vasingandizivisi icho; zvino baba vangu vangandivanzirireiko chinhu ichi? Hazvizi izvo.”

³Ipapo Dhavhidhi akapikazve akati, “Baba vako vanoziva kwazvo kuti ini ndakawana nyasha kwauri; naizvozvo vakati, ‘Jonatani ngaarege kuzviziva, zvimwe ungazvidya mwoyo;’ asi zvirokwazvo, naJehovha mupenyu, nomweya wako mupenyu, kune nhambwe imwechete pakati pangu norufu.”

⁴Ipapo Jonatani akati kuna Dhavhidhi, “Zvose zvinodikanwa nomwoyo wako, ndichakuitira izvozvo.”

⁵Dhavhidhi akati kuna Jonatani, “Tarira, mangwana mwedzi wogara, ndichafanira kundogara pakudya namambo; asi nditendere, ndiende kundovanda mumunda kusvikira madekwana ezuva rechitatu.

⁶Kana baba vako vakandishaiwa, uti kwavari, ‘Dhavhidhi wakakumbira zvikuru kwandiri, kuti amhanyire Bheterehemu, kuguta rake; nokuti ikoko kunoitwa chibayiro chegore rimwe nerimwe chavose veimba yake.’

⁷“Kana vakati, ‘Zvakanaka hazvo!’ Muranda wako uchava norugare; asi kana vakatsamwa, uzive kuti vagara vandifungira zvakaipa.

⁸Naizvozvo chiitira hako muranda wako zvakanaka; nokuti wakaita sungano nomuranda wako pamberi paJehovha, asi kana zvakaipa zviriko kwandiri, undiuraye iwe, nokuti uchandiisireiko kuna baba vako?”

⁹Jonatani akati, “Usadaro, nokuti dai ndaiziva kuti baba vangu vagara vafunga kukuitira zvakaipa, handizaikuudza here?”

¹⁰Dhavhidhi akati kuna Jonatani, “Ndianiko uchandiudza kana baba vako vachinge vakupindura nehasha?”

¹¹Jonatani akati kuna Dhavhidhi, “Hendei kusango.” Ivo vakaenda vari vaviri kusango.

¹²Zvino Jonatani akati kuna Dhavhidhi, “Jehovha Mwari waIsiraeri ngaave chapupu; kana ndabvunzisisa baba vangu nenguva ino mangwana, kana kuswera mangwana, kana ndikaona kuti vanomwoyo wakanaka kuna Dhavhidhi, handingakutumiri shoko, ndikakuzivisa here?

¹³“Jehovha ngaarove Jonatani, arambe achidaro, kana baba vangu vachinge vachida kukuitira zvakaipa, ini ndikasakuzivisa izvozvo, ndikakuendisa norugare; Jehovha ngaave newe, sezvaaiva nababa vangu.

¹⁴Newewo undiitire tsitsi dzaJehovha ndichiri mupenyu, ndirege kufa,

¹⁵uye usabvisa tsitsi dzako kuna veimba yangu nokusingaperi, kunyange kana Jehovha abvisa vavengi vaDhavhidhi, mumwe nomumwe panyika yose.”

¹⁶Naizvozvo Jonatani akaita sungano neimba yaDhavhidhi, akati, “Jehovha ngaazvitsvake kumaoko avavengi vaDhavhidhi.”

¹⁷Naizvozvo akapikisa Dhavhidhizve norudo rwake kwaari, nokuti wakanga achimuda sezvaakada mwoyo wake.

¹⁸Zvino Jonatani akati kwaari, “Mangwana mwedzi wogara; iwe uchashaikwa, nokuti chigaro chako chichashaiwa munhu.

¹⁹Kana wagara mazuva matatu, unofanira kukurumidza kuburukira kunzvimbo iya pawakavanda musi watakataurirana pamusoro peshoko riya, ugogara pabwe rinonzi Ezeri.

²⁰Zvino ini ndichaposha miseve mitatu kurutivi rwaro, ndichiita sendinoposhera chinhu chakatimikwa.

²¹Ipapo, tarira, ndichatuma mukomana, ndichiti, ‘Enda undotsvaka miseve.’ Kana ndikati kumukomana, ‘Tarira miseve iri nechokuno kwako, uya nayo,’ ipapo ungauya hako, nokuti kunorugare kwauri, hakuna mhosva, naJehovha mupenyu.

²²Asi kana ndikati kumukomana, ‘Tarira, miseve iri mberi kwako,’ ipapo uende hako, nokuti Jehovha wakuendisa.

²³Kana riri shoko ratakataurirana pamusoro paro iwe neni, tarira Jehovha uri pakati pako neni nokusingaperi.”

²⁴Naizvozvo Dhavhidhi akandovanda musango; zvino mwedzi wakati wagara, mambo akagara pakudya kuti adye.

²⁵Mambo akagara pachigaro chake, sapanguva dzose, pachigaro chaiva pamadziro; Jonatani akasimuka, Abhineri akagara parutivi rwaSauro; asi chigaro chaDhavhidhi chakashaiwa munhu.

²⁶Asi Sauro haana kutaura chinhu musi iwoyo; nokuti wakati, zvimwe wawirwa nechinhu, zvimwe haana kunaka, zvirokwazvo haana kunaka.

²⁷Zvino pazuva rakatevera kugara kwomwedzi, pazuva rechipiri, chigaro chaDhavhidhi chakashaiwazve munhu; ipapo Sauro akati kuna Jonatani mwanakomana wake, “Mwanakomana waJese wakeregereiko kuuya kuzodya zuro kana nhasi?”

²⁸Jonatani akapindura Sauro akati, “Dhavhidhi wakakumbira zvikuru kwandiri kuti aende Bheterehemu,

²⁹akati, ‘Nditenderewo ndiende, nokuti veimba yedu vanobayira muguta; mukuru wangu wakandiraira kuti ndivepo; zvino kana uchifara nazvo, nditendere hako ndiende kundoshanyira hama dzangu.’ Naizvozvo haana kuuya patafura yamambo.”

³⁰Ipapo Sauro akatsamwira Jonatani, akati kwaari, “Iwe mwanakomana womukadzi usinganzwi, wakapanduka, handizivi kanhi kuti wakatsaura mwanakomana waJese unyadzwe iwe, namai vako vanyadzwewo?

³¹“Nokuti iwe haungasimbiswi noushe hwako, kana mwanakomana waJese achiri mupenyu panyika. Naizvozvo zvino chituma munhu auye naye kwandiri, nokuti zvirokwazvo unofanira kufa.”

³²Jonatani akapindura Sauro baba vake, akati kwavari, “Ko unofanira kuurayirwei? Waiteiko?”

³³Ipapo Sauro akaposha pfumo rake kwaari, achida kumubaya. Naizvozvo Jonatani wakaziva kuti baba vake vakagara vafunga kuuraya Dhavhidhi.

³⁴Naizvozvo Jonatani akasimuka patafura, atsamwa kwazvo, akasadya zvokudya nomusi wechipiri womwedzi; nokuti wakanga ane shungu pamwoyo pamusoro paDhavhidhi, nokuti wakanga anyadzwa nababa vake.

³⁵Zvino fume mangwana Jonatani akaenda kusango nenguva yakanga yatarwa naDhavhidhi, anomukomana muduku.

³⁶Akati kumukomana wake, “Mhanya utsvake miseve yandinoposha.” Ipapo mukomana wakati achimhanya, iye akaposha museve mberi kwake.

³⁷Zvino mukomana wakati achisvika pakanga paposhwa museve naJonatani. Jonatani akadanidzira kumukomana, akati, “Ko museve hauzi mberi kwako here?”

³⁸Jonatani akadanidzirazve kumukomana akati, “Kasira, kurumidza, usamira.” Mukomana waJonatani akanonga miseve, akauya nayo kuna tenzi wake.

³⁹Asi mukomana haana kuziva chinhu; asi Jonatani naDhavhidhi voga ndivo vakaziva shoko iro.

⁴⁰Zvino Jonatani akapa mukomana nhumbi dzake dzokurwa nadzo, akati kwaari, “Enda nadzo undodziisa kuguta.”

⁴¹Mukomana wakati aenda, Dhavhidhi akasimuka kurutivi rwezasi, akawira pasi nechiso chake, akakotama katatu, vakatsvodana, vakachema vose, kusvikira Dhavhidhi anyanya kwazvo.

⁴²Jonatani akati kuna Dhavhidhi, “Enda hako norugare, nokuti takapika tose nezita raJehovha tichiti, ‘Jehovha uchava pakati pangu newe, napakati pavana vangu navako nokusingaperi.’ ” Akasimuka, akaenda, naJonatani akapinda muguta.