Read Shona Union Version 2002 1 Samueri 23 Bible Online

1 Samueri 23 - Shona Union Version 2002 bible

1 Samueri 23

¹Zvino vanhu vakaudza Dhavhidhi vakati, “Tarirai, vaFirisitia vanorwa neKeira, vachipambara zviri pamapuriro.”

²Naizvozvo Dhavhidhi akabvunza Jehovha akati, “Ndoenda, ndinoparadza vaFirisitia avo here?” Jehovha akati kuna Dhavhidhi, “Enda undoparadza vaFirisitia, uponese Keira.”

³Varume vaDhavhidhi vakati kwaari, “Tarirai, isu tinotya tichiri pano paJudha, ndoda kana tikaenda Keira kundorwa nehondo dzavaFirisitia.”

⁴Zvino Dhavhidhi akabvunzazve Jehovha, Jehovha akamupindura akati, “Simuka, uburukire Keira, nokuti ndichaisa vaFirisitia muruoko rwako.”

⁵Dhavhidhi navanhu vake vakaenda Keira, vakandorwa navaFirisitia, vakavatorera mombe dzavo, vakavauraya nokuuraya kukuru. Naizvozvo Dhavhidhi akaponesa vanhu vakanga vagere Keira.

⁶Zvino Abhiatari mwanakomana waAhimereki pakutizira kwake kuna Dhavhidhi paKeira, wakaenda akabata efodhi paruoko rwake.

⁷Sauro akaudzwa kuti Dhavhidhi wasvika Keira. Sauro akati, “Mwari wamuisa muruoko rwangu, wazaririrwamo zvaapinda muguta rinamasuo ezvipfigiso.”

⁸Sauro akadana vanhu vose kundorwa, akaburukira Keira, akakomba Dhavhidhi navanhu vake.

⁹Asi Dhavhidhi wakaziva kuti Sauro wakafunga kumuitira zvakaipa, akati kuna Abhiatari mupristi, “Uya pano neefodhi.”

¹⁰Zvino Dhavhidhi akati, “Jehovha, Mwari waIsiraeri, muranda wenyu wakanzwa zvirokwazvo kuti Sauro unoda kuuya Keira, kuzoparadza guta nokuda kwangu.

¹¹Ko varume veKeira vachandiisa mumaoko ake here? Ko Sauro uchaburuka here, sezvakanzwa muranda wenyu? Jehovha, Mwari waIsiraeri, ndinokumbira muzivise henyu muranda wenyu.” Jehovha akati, “Uchaburuka.”

¹²Dhavhidhi akati, “Ko varume veKeira vachandiisa navanhu vangu muruoko rwaSauro here?” Jehovha akati, “Vachakuisa.”

¹³Ipapo Dhavhidhi navanhu vake, vanenge mazana matanhatu, vakasimuka, vakabva Keira, vakafamba‐famba havo. Sauro akaudzwa kuti Dhavhidhi wapukunyuka paKeira, akarega hake kuendako.

¹⁴Dhavhidhi akagara murenje munhare, akaramba agere panyika yamakomo murenje reZifi. Sauro akamutsvaka mazuva ose, Mwari haana kumuisa muruoko rwake.

¹⁵Zvino Dhavhidhi akaona kuti Sauro wakanga abuda kuzotsvaka kumuuraya, Dhavhidhi akagara murenje reZifi mudondo.

¹⁶Ipapo Jonatani mwanakomana waSauro, akasimuka, akaenda kuna Dhavhidhi mudondo, akamusimbisa muna Mwari.

¹⁷Akati kwaari, “Usatya, nokuti ruoko rwababa vangu Sauro harungakuwani, uchava mambo waIsiraeri, neni ndichava muduku kwauri; nababa vangu Sauro vanozviziva.”

¹⁸Ivo vaviri vakaita sungano pamberi paJehovha; Dhavhidhi akagara mudondo, Jonatani akadzokera kumba kwake.

¹⁹Zvino vaZifi vakakwira kuna Sauro paGibhea vakati, “Ko Dhavhidhi haazinovanda kwatiri, panhare mudondo, mugomo reHakira riri kurutivi rwezasi rwerenje here?”

²⁰Naizvozvo zvino, mambo burukai, sezvinoda mwoyo wenyu; kana tirisu ndiro basa redu kuti timuise pamaoko amambo.

²¹Ipapo Sauro akati, “Imi muropafadzwe naJehovha, nokuti makandinzwira tsitsi.

²²Chiendai henyu, mucherekedze kwazvo, muzive nokuona kwaari, kwaanogara, uye kuti ndianiko wakamuonako; nokuti ndaudzwa kuti unamano kwazvo.

²³Naizvozvo tarisisai, muzive zvakanaka nzvimbo dzake dzose dzaanovanda kwadziri, mugodzokerazve kwandiri, zvirokwazvo, ndiende nemi; zvino kana achinge ari munyika iyo, ndichandomutsvakisisa pakati pezviuru zvavaJudha.

²⁴Ipapo vakasimuka, vakaenda Zifi pamberi paSauro, asi Dhavhidhi navanhu vake vakanga vari murenje reMaoni paArabha kurutivi rwezasi rwerenje.”

²⁵Zvino Sauro navanhu vake vakaenda kundomutsvaka. Dhavhidhi akaudzwa izvozvo; naizvozvo akaburukira kudombo, akandogara murenje reMaoni. Zvino Sauro wakati achinzwa, akatevera Dhavhidhi kurenje reMaoni.

²⁶Sauro akaenda nechokuno kwegomo, Dhavhidhi navanhu vake vakaenda necheseri kwegomo; Dhavhidhi akakurumidza kubva, nokutya Sauro; nokuti Sauro navanhu vake vakanga vakomba Dhavhidhi navanhu vake, kuti vavabate.

²⁷Asi nhume yakasvika kuna Sauro, ikati, “Kurumidzai, muuye, nokuti vaFirisitia vopambara nyika.”

²⁸Naizvozvo Sauro akadzoka pakutevera Dhavhidhi, akandorwa navaFirisitia. Naizvozvo vakapatumidza zita rokuti Serahamarekoti.

²⁹Dhavhidhi akakwira, akabvapo, akandogara munhare dzapaEnigedhi.