Read Shona Union Version 2002 1 Samueri 24 Bible Online

1 Samueri 24 - Shona Union Version 2002 bible

1 Samueri 24

¹Zvino Sauro wakati adzoka pakutevera vaFirisitia, akaudzwa zvichinzi, “Tarirai, Dhavhidhi uri murenje reEnigedhi.”

²Ipapo Sauro akatora varume vane zviuru zvitatu vakanga vatsaurwa kuvaIsiraeri vose, akandotsvaka Dhavhidhi navanhu vake pamatombo engururu.

³Akasvika pamatanga amakwai panzira pakanga pane bako, Sauro akapindamo kuti afukidze tsoka dzake. Zvino Dhavhidhi navanhu vake vakanga vagere mukati‐kati mebako.

⁴Vanhu vaDhavhidhi vakati kwaari, “Iri ndiro zuva ramakaudzwa naJehovha, achiti, ‘Tarira, ndichaisa muvengi wako muruoko rwako, umuitire sezvaunoda.’ ” Ipapo Dhavhidhi akasimuka, akagura mupendero wenguo yaSauro iye asingazivi.

⁵Asi pashure hana yaDhavhidhi yakamutambudza, nemhaka yokuti wakanga agura nguo yaSauro.

⁶Akati kuvanhu vake, “Jehovha ngaandidzivise, ndirege kuitira ishe wangu, muzodzwa waJehovha, chinhu chakadai, nditambanudzire ruoko rwangu kwaari, nokuti ndiye muzodzwa waJehovha.”

⁷Naizvozvo Dhavhidhi akadzivisa vanhu vake namashoko iwayo, akasavatendera kumukira Sauro. Sauro akasimuka, akabuda mubako, akaenda hake.

⁸NaDhavhidhi wakasimukawo, akabuda mubako, akadanidzira kuna Sauro akati, “Ishe wangu, mambo!” Zvino Sauro wakati achicheuka, Dhavhidhi akakotamira pasi nechiso, akapfugama.

⁹Dhavhidhi akati kuna Sauro, “Munoteerereiko mashoko avanhu, vanoti, ‘Tarira, Dhavhidhi unotsvaka kukuvadzai?’

¹⁰Tarirai, zuva rino meso enyu akaona kuti Jehovha wakakuisai nhasi mumaoko angu mubako; vamwe vakati ndikuurayei, asi ndakakuregai ndikati, ‘Handingatambanudzi ruoko rwangu kuna ishe wangu, nokuti ndiye muzodzwa waJehovha.’

¹¹Zvino baba vangu, tarirai, hoyo mupendero wenguo yenyu, muruoko rwangu; nokuti zvandakagura mupendero wenguo yenyu, ndikasakuurayai, muzive, muwone, kuti hakuna chakaipa kana kudarika kwandiri; handina kukutadzirai, kunyange makandivhima kuti munditorere upenyu hwangu.

¹²“Jehovha ngaatonge pakati pangu nemi, Jehovha ngaanditsive kwamuri; asi ruoko rwangu harungarwi nemi.

¹³“Sezvinoreva tsumo yavekare, ‘Kune wakaipa kunobuda zvakaipa; asi ruoko rwangu harungarwi nemi.’

¹⁴Ko mambo waIsiraeri wakabuda achitsvaka aniko? Munodzingana naniko? Imbwa yakafa, rutata harwo.

¹⁵Naizvozvo Jehovha ngaave mutongi, ngaatonge pakati pangu nemi, awone, andireverere pamhosva yangu, andirwire paruoko rwenyu.”

¹⁶Dhavhidhi wakati apedza kutaura mashoko iwayo kuna Sauro, Sauro akati, “Izwi rako here, mwana wangu; Dhavhidhi?” Sauro akachema kwazvo.

¹⁷Akati kuna Dhavhidhi, “Iwe unondikunda pakururama, nokuti iwe wakandiitira zvakanaka, asi ini ndakakuitira zvakaipa.

¹⁸Warondedzera nhasi pawakandiitira zvakanaka, nokuti hauna kundiuraya, kunyange Jehovha akandiisa muruoko rwako.

¹⁹Nokuti kana munhu achinge awana muvengi wake, ungamurege akaenda hake here? Naizvozvo Jehovha ngaakuripire zvakanaka nokuda kwezvawakandiitira nhasi.

²⁰Zvino tarira, ndinoziva kuti iwe uchazova mambo zvirokwazvo, uye kuti ushe hwaIsiraeri huchasimbiswa muruoko rwako.

²¹“Naizvozvo pika zvino kwandiri naJehovha kuti haungaparadzi vana vangu vanonditevera, uye kuti haungaparadzi zita rangu mumba mababa vangu.”

²²Ipapo Dhavhidhi akapika kuna Sauro. Sauro akaenda kumusha kwake, asi Dhavhidhi navanhu vake vakaenda kunhare yavo.