Read Shona Union Version 2002 1 Samueri 26 Bible Online

1 Samueri 26 - Shona Union Version 2002 bible

1 Samueri 26

¹Zvino vaZifi vakauya kuna Sauro paGibhea, vakati, “Ko Dhavhidhi haazikunovanda pachikomo cheHakira, chiri pamberi perenje here?”

²Ipapo Sauro akasimuka, akaburukira kurenje reZifi, ana varume vane zviuru zvitatu, vakanga vakatsaurwa kuvaIsiraeri, kuti atsvake Dhavhidhi murenje reZifi.

³Sauro akavaka misasa yake pachikomo cheHakira, chiri pamberi parenje, kurutivi rwenzira. Asi Dhavhidhi wakanga agere murenje, akaona Sauro achimutevera murenje.

⁴Zvino Dhavhidhi akatuma vashori, akanzwa kuti Sauro wasvika zvirokwazvo.

⁵Dhavhidhi akasimuka, akasvika pakanga pakavaka Sauro misasa yake, Dhavhidhi akaona pakanga pavete Sauro, ana Abhineri mwanakomana waNeri, mukuru wehondo yake; Sauro wakanga avete pakati pengoro dzakanga dzakarongedzwa, asi vanhu vakanga vavaka misasa yavo vakamupoteredza.

⁶Zvino Dhavhidhi akapindura, akati kuna Ahimereki muHiti, nokuna Abhishai mwanakomana waZeruya, munun’una waJoabhu, akati, “Ndianiko uchaburuka neni kuna Sauro kumisasa?” Abhishai akati, “Ini ndichaburuka nemi.”

⁷Naizvozvo Dhavhidhi naAbhishai vakasvika kuvanhu usiku, vakawana Sauro avete pakati pengoro dzakanga dzarongedzwa, pfumo rake rakabayirwa pasi kumusoro kwake; Abhineri navamwe vanhu vakanga vavete vakamupoteredza.

⁸Zvino Abhishai akati kuna Dhavhidhi, “Nhasi Mwari wakaisa muvengi wako pamaoko ako; naizvozvo nditendere ndimubayire pasi nepfumo kamwe chete, handingamubayi rwechipiri.”

⁹Dhavhidhi akati kuna Abhishai, “Usamuuraya, nokuti ndianiko ungagona kutambanudzira ruoko rwake kumuzodzwa waJehovha, akasava nemhosva?”

¹⁰Dhavhidhi akati, “NaJehovha mupenyu, Jehovha ndiye uchamuuraya, zvimwe zuva rake rokufa richasvika, zvimwe uchaburukira kundorwa akaparadzwapo.

¹¹Jehovha ngaandidzivise, ndirege kutambanudzira ruoko rwangu kumuzodzwa waJehovha; asi zvino tora hako pfumo riri kumusoro kwake, nechirongo chemvura, tiende.”

¹²Naizvozvo Dhavhidhi akatora pfumo nechirongo chemvura, zvakanga zviri pamusoro waSauro, vakaenda; hakuna munhu wakazviona, kana kuzviziva, hakuna wakapepuka, nokuti vakanga vavete vose, nokuti vakanga vakabatwa nehope kwazvo, dzakanga dzatumwa naMwari.

¹³Zvino Dhavhidhi akayambukira mhiri, akamira pamusoro pegomo ari kure; asi pakati pavo pakanga pane nhambo huru.

¹⁴Dhavhidhi akashevedzera kuvanhu nokuna Abhineri mwanakomana waNeri, akati, “Nhai Abhineri, haudaviri here?” Ipapo Abhineri akadavira, akati, “Ndiwe aniko unoshevedzera kuna mambo.”

¹⁵Dhavhidhi akati kuna Abhineri, “Ko iwe hauzi murume wemhare here? Ndianiko wakafanana newe kuvaIsiraeri? Wakaregereiko kurinda ishe wako mambo? Nokuti mumwe munhu wakanga apinda kuzoparadza mambo, ishe wako.

¹⁶“Ichi chinhu chawaita hachina kunaka. NaJehovha mupenyu, maifanira kufa, nokuti hamuna kurinda ishe wenyu, muzodzwa waJehovha. Zvino chitarira, pfumo ramambo nechirongo chemvura chakanga chiri kumusoro kwake zviripiko?”

¹⁷Sauro akaziva izwi raDhavhidhi, akati, “Ndiro izwi rako here, mwanangu Dhavhidhi?” Dhavhidhi akati, “Izwi rangu, ishe wangu, mambo.”

¹⁸Akati, “Ko Ishe wangu unoteverereiko muranda wake? Nokuti ndakaiteiko? Zvakaipa zviri mandiri ndezveiko?

¹⁹Naizvozvo zvino ishe wangu mambo chidonzwai mashoko omuranda wenyu. Kana ari Jehovha wakakukurudzirai kurwa neni, ngaapiwe chipiriso; asi kana vari vana vavanhu, ngavave vakatukwa pamberi paJehovha, nokuti vakandidzinga nhasi, kuti ndirege kugara panhaka yaJehovha, vachiti, ‘Enda, undoshumira vamwe vamwari.’

²⁰Naizvozvo zvino ropa rangu ngarirege kuwira pasi kure naJehovha, nokuti mambo waIsiraeri wabuda kuzotsvaka rutata rumwe, somunhu unovhima hware mumakomo.”

²¹Ipapo Sauro akati, “Ndatadza, dzoka hako, mwanangu Dhavhidhi, nokuti handichazokuitiri zvakaipa, nokuti upenyu hwangu hwakanga huchikosha pameso pako nhasi; tarira, ndaita sebenzi, ndatadza kwazvo.”

²²Ipapo Dhavhidhi akapindura akati, “Tarirai pfumo ramambo! Mumwe wamajaya ngaayambukire kuno aritore.

²³Jehovha unoripira munhu mumwe nomumwe kururama kwake nokutendeka kwake; nokuti Jehovha wakakuisai nhasi kwandiri, asi ndakaramba kutambanudzira ruoko rwangu kumuzodzwa waJehovha.

²⁴Zvino tarirai, upenyu hwenyu sezvandakahukudza nhasi, saizvozvowo hupenyu hwangu ngahukudzwe naJehovha, iye andirwire pakutambudzika kwangu kwose.”

²⁵Ipapo Sauro akati kuna Dhavhidhi, “Wakaropafadzwa iwe mwanangu Dhavhidhi; uchava nesimba, uye uchakunda kwazvo.” Naizvozvo Dhavhidhi akaenda hake, naSauro akadzokera kumusha kwake.