Read Shona Union Version 2002 1 Samueri 28 Bible Online

1 Samueri 28 - Shona Union Version 2002 bible

1 Samueri 28

¹Zvino namazuva iwayo vaFirisitia vakaunganidza hondo dzavo kuzorwa navaIsiraeri. Akishi akati kuna Dhavhidhi, “Ziva kwazvo kuti unofanira kuenda neni nehondo, iwe navanhu vako.”

²Dhavhidhi akati kuna Akishi, “Naizvozvo muchaziva muranda wenyu zvaanogona kuita.” Akishi akati kuna Dhavhidhi, “Naizvozvo ndichakuita muchengeti womusoro wangu nokusingaperi.”

³Samueri zvino wakanga afa; vaIsiraeri vakanga vamuchema, vamuviga paRama, imo muguta rake; Sauro akanga abvisa panyika masvikiro navauki.

⁴Zvino vaFirisitia vakaungana, vakavaka misasa yavo paShunemi; Sauro akaunganidza vaIsiraeri vose, ivo vakavaka misasa yavo paGiribhoa.

⁵Zvino Sauro wakati achiona hondo dzavaFirisitia, akatya, mwoyo wake ukadedera kwazvo.

⁶Sauro akabvunza Jehovha, asi Jehovha haana kumupindura, kunyange pakurota, kana neUrimi, kana navaporofita.

⁷Ipapo Sauro akati kuvaranda vake, “Nditsvakirei mukadzi unosvikirwa, ndiende kwaari ndindomubvunza iye.” Varanda vake vakati kwaari, “Tarirai, kuno mukadzi unosvikirwa paEndori.”

⁸Sauro akazvishandura, akafuka dzimwe nguo, akaenda, iye navamwe varume vaviri, vakasvika kumukadzi usiku; akati, “Ndiukirewo nomweya unokusvikira, undikwidzire wandichakuudza.”

⁹Mukadzi akati kwaari, “Tarira, unoziva zvakaitwa naSauro, kuti wakaparadza masvikiro navauki panyika, unoteyireiko upenyu hwangu, ndiurawe?”

¹⁰Sauro akapika kwaari naJehovha, akati, “NaJehovha mupenyu, iwe haungavi nemhosva pachinhu ichi.”

¹¹Zvino mukadzi akati, “Ndokukwidzira aniko?” Akati, “Ndikwidzire Samueri.”

¹²Mukadzi wakati achiona Samueri, akadanidzira nezwi guru. Mukadzi akataura naSauro, akati, “Mandinyengerereiko? Nokuti ndimi Sauro?”

¹³Mambo akati kwaari, “Usatya hako, asi unowoneiko?” Mukadzi akati kuna Sauro, “Ndinoona mudzimu unokwira achibuda panyika.”

¹⁴Akati kwaari, “Wakadiniko?” Akati, “Kunomutana unokwira, akafuka nguo.” Sauro akaziva kuti ndiye Samueri, akakotamira pasi nechiso chake, akanamata kwaari.

¹⁵Samueri akati kuna Sauro, “Wanditambudzireiko uchindikwidza?” Sauro akapindura akati, “Ndinotambudzika kwazvo; nokuti vaFirisitia vanorwa neni, naMwari wabva kwandiri, haachatongondipinduri, kunyange navaporofita, kana nokurota; naizvozvo ndakudanai imi, kuti mundizivise zvandinofanira kuita.”

¹⁶Samueri akati, “Unondibvunzireiko ini, Jehovha zvaakabva kwauri, akava muvengi wako?

¹⁷Jehovha wakazviitira izvo zvaakataura neni; Jehovha akabvarura ushe pamaoko ako, akahupa mumwe wokwako, iye Dhavhidhi.

¹⁸Nokuti hauna kuteerera izwi raJehovha, hauna kuitira vaAmareki nokutsamwa kwake kukuru; naizvozvo Jehovha wakakuitira chinhu ichi nhasi.

¹⁹Zvino Jehovha uchaisa vaIsiraeri pamwechete newe mumaoko avaFirisitia; mangwana iwe navanakomana vako muchava neni; Jehovha uchaisa hondo yavaIsiraeri mumaoko avaFirisitia.”

²⁰Ipapo Sauro akawira pasi pakarepo, akatsivama, akatya kwazvo pamusoro pamashoko aSamueri; kwakanga kusina simba maari, nokuti wakanga asina kudya zvokudya zuva iro rose, kunyange nousiku hwose.

²¹Zvino mukadzi akauya kuna Sauro, akaona kuti unotambudzika kwazvo, akati kwaari, “Tarirai, murandakadzi wenyu wakateerera izwi renyu, ndikasarangarira upenyu hwangu, asi ndakateerera mashoko enyu amakandiudza.

²²Naizvozvo zvino, chiteereraiwo izwi romurandakadzi wenyu, ndiise chimedu chechingwa pamberi penyu, mudye, muve nesimba kana moenda henyu.”

²³Asi iye wakaramba, akati, “Handidi hangu kudya.” Asi varanda vake vakamukurudzira pamwechete nomukadzi, akazoteerera mazwi avo. Naizvozvo akasimuka pasi, akagara panhoo.

²⁴Zvino mukadzi wakanga ane mhuru yakakodzwa mumba; akakurumidza akaibaya, akatora upfu, akahukanya, akabika nahwo chingwa chisina kuviriswa;

²⁵akazviisa pamberi paSauro napamberi pavaranda vake; vakadya. Ipapo vakasimuka, vakaenda usiku ihwohwo.