Read Shona Union Version 2002 1 Samueri 5 Bible Online

1 Samueri 5 - Shona Union Version 2002 bible

1 Samueri 5

¹Zvino vaFirisitia vakatora areka yaMwari, vakabva nayo Ebheniezeri, vakaiisa Ashidhodhi,

²VaFirisitia vakatora areka yaMwari vakaiisa mumba maDhagoni, vakaigadzika kurutivi rwaDhagoni.

³Zvino veAshidhodhi vakati vachimuka mangwanani, onei Dhagoni wawira pasi nechiso pamberi peareka yaJehovha. Vakatora Dhagoni, vakamugadzikazve panzvimbo yake.

⁴Zvino vakati vachimuka mangwanani, onei Dhagoni wawira pasi nechiso pamberi peareka yaJehovha; nomusoro waDhagoni nezvanza zvamaoko ake ose maviri zvakanga zvavhunika, zviri pachikumbaridzo chomukova; Dhagoni wakanga asarirwa nomuviri woga.

⁵Saka vapristi vaDhagoni, navose vanopinda mumba maDhagoni, havatsiki pachikumbaridzo chaDhagoni paAshidhodhi kusvikira nhasi.

⁶Asi ruoko rwaJehovha rwakatambudza veAshidhodhi, akavaparadza nokuvarova namamota, ivo veAshidhodhi nenyika yavo.

⁷Zvino varume veAshidhodhi vakati vachiona kuti ndizvo zvavanoitirwa, vakati, “Areka yaMwari waIsiraeri ngairege kugara pakati pedu; nokuti ruoko rwake runotitambudza isu namwari wedu Dhagoni.”

⁸Naizvozvo vakatuma nhume kundounganidza kwavari madzishe ose avaFirisitia, vakati, “Tichaita seiko neareka yaMwari waIsiraeri?” Vakapindura, vakati, “Areka yaMwari waIsiraeri ngaiiswe Gati.” Vakaisa areka yaMwari ikoko.

⁹Vakati vaiisako, ruoko rwaJehovha rukavhundusa guta nokuvhundusa kukuru; akarova varume veguta, vaduku navakuru, vakapomerwa mamota.

¹⁰Naizvozvo ivo vakatumira areka yaMwari Ekironi. Zvino areka yaMwari yakati yasvika Ekironi, veEkironi vakachema kwazvo, vakati, “Vauya neareka yaMwari waIsiraeri kwatiri, kuzotiuraya, isu navanhu vedu.”

¹¹Naizvozvo vakatuma nhume kundounganidza madzishe ose avaFirisitia, vakati, “Tumai areka yaMwari waIsiraeri, ibve, idzoserwe kunzvimbo yayo, kuti irege kutiuraya, isu navanhu vedu;” nokuti guta rose rakanga ravhunduswa nokuvhunduswa kworufu; ruoko rwaJehovha rwakavatambudza zvikuru ipapo.

¹²Varume, vasina kufa, vakarohwa namamota, kuchema kweguta kukakwira kudenga.