Read Shona Union Version 2002 1 Samueri 8 Bible Online

1 Samueri 8 - Shona Union Version 2002 bible

1 Samueri 8

¹Zvino Samueri wakati akwegura akagadza vanakomana vake kuti vave vatongi pakati paIsiraeri.

²Zita romwana wake wodangwe rakanga riri Jowero, nezita rowechipiri Abhija; ivo vaiva vatongi paBheerishebha.

³Asi vanakomana vake havana kufamba nenzira dzake, asi vakatsaukira kupfuma yakaipa, vakagamuchira fufuro, nokusaruramisa pakutonga.

⁴Zvino vakuru vaIsiraeri vose vakaungana, vakauya kuna Samueri paRama,

⁵vakati kwaari, “Tarirai, imi makwegura, asi vanakomana venyu havafambi nenzira dzenyu, zvino tigadzirirei mambo ungatitonga, sezvinoitwa kundudzi dzose.”

⁶Asi shoko iro harina kufadza Samueri, iro rokuti, “Tipei mambo ungatitonga.” Samueri akanyengetera kuna Jehovha.

⁷Ipapo Jehovha akati kuna Samueri, “Teerera hako zvose zvinotaura vanhu kwauri, nokuti havana kukuramba iwe, asi vakandiramba ini, kuti ndirege kuva mambo wavo.

⁸“Zvose zvavakaita kubva zuva randakavakwidza ndichivabudisa paIjipiti kusvikira nhasi, vachindirasha nokushumira vamwe vamwari, ndizvo zvavanokuitira iwewo.

⁹Zvino terera hako mazwi avo; asi uvapupurire kwazvo, uvazivise tsika dzamambo, uchavabata.”

¹⁰Zvino Samueri akaudza vanhu vakanga vachikumbira mambo kwaari mashoko ose aJehovha.

¹¹Akati, “Tsika dzamambo, uchakubatai, ndidzo, Uchatora vanakomana venyu akavaisa pangoro dzake.

¹²Uchazvitsaurira vamwe vave vakuru vezviuru, navakuru vamakumi mashanu; ucharaira vamwe kumurimira minda yake, nokukohwa michero yake, nokumuitira nhumbi dzake dzokurwa nadzo, nenhumbi dzengoro dzake.

¹³“Uchatora vanasikana venyu, vave vavenganisi vezvinonhuwira, navabiki vezvokudya, navabiki vechingwa.

¹⁴Uchatora minda yenyu neminda yenyu yemidzambiringa, neminda yenyu yemiorivhi yakaisvonaka kukunda mimwe, achipa varanda vake.

¹⁵Uchatora zvegumi zvembeu dzenyu nemadzambiringa enyu, achipa varanda vake navabatiri vake.

¹⁶“Uchatora varanda venyu navarandakadzi venyu, namajaya enyu akaisvonaka kukunda vamwe vose, nembongoro dzenyu, achibatisa mabasa ake nazvo.

¹⁷“Uchatora zvegumi zvamapoka enyu amakwai; nemi muchava varanda vake.

¹⁸“Nezuva iro muchachema kwazvo nokuda kwamambo wenyu wamunenge mazvitsaurira; asi Jehovha haangakupinduriyi nezuva iro.”

¹⁹Asi vanhu vakaramba kuteerera izwi raSamueri, vakati, “Kwete, tinoda hedu mambo ungatibata,

²⁰kuti isuo tifanane nedzimwe ndudzi; mambo wedu atitonge, atitungamirire, nokurwa pahondo dzedu.”

²¹Samueri akanzwa mashoko ose avanhu, akaarondedzera panzeve dzaJehovha.

²²Zvino Jehovha akati kuna Samueri, “Terera hako mazwi avo, uvagadzirire mambo.” Samueri akati kuvarume vaIsiraeri, “Endai henyu, mumwe nomumwe kuguta rake.”