Read Shuar Lucas 18 Bible Online

Lucas 18 - Shuar bible

Lucas 18

¹Shuar yawe̱tsuk Yúsan tuke áujsatniua nuna unuiniartaj tusa Jesus ju̱ métek-taku chichaman tímiayi:

²“Chíkich péprunam shuaran akupin amai. Nú áishmaṉ Yúsnasha ashamchauyi; shuárnasha péṉker enentáimtichuyi.

³Tura nú péprunam waje̱ amai. Niisha shuáran akupniun chicharuk “Áishmaṉ winia yajauch awajtusmania nu íirtusta” tusa tuke waketrú pujuyi.

⁴Yámankamtaikkia nin anturkatniun nakitmiai. Tura ukunam enentáimias “Wisha Yúsan ashamachiatnak shuárnasha péṉker enentáimtichuitiatnak ju̱ waje̱ tana nuna túrattajai.

⁵Warí niisha tuke taa itit awajtatsuk. Tuma asamtai nin kajerka̱i̱j tusan wárik túrattajai” timiai” tímiayi.

⁶Nuyá uunt Jesus tímiayi “Shuaran akupin yajauchiitiat nuna timiai.

⁷Tura Yus ti péṉker asa, ni achikmarin tsawai̱sha, káshisha untsuamka nú naṉkaamas anturkashtatuak. ¿Ya̱i̱tsuk meṉkakatuak?

⁸Atsá, wárik yáinkiartatui, tájarme. Tura Wi Aents Ajasuitjiana ju̱ atak támatai, ¿shuaran tuke Winia nekas enentáimturainia nuna wáinkiatjash?” tímiayi Jesus. Pariséusha, kuítian-juuncha Yúsan áujsarmia nu

⁹“Péṉkeraitjai” tu enentáimtumainiak chikichnaka yajauch enentáimtiarmia nuna Jesus nekapmá chichasmiayi. Ju̱na tímiayi:

¹⁰“Jimiará áishmaṉ Yusa Uunt Je̱e̱n Yus áujsatai tusar wearmai. Chíkichkia Pariséuuyi, chíkichkia kuítian-juuyi.

¹¹Pariséusha wajaki Yúsan áujuk jú̱nis tímiayi: “Yusrú, chíkich áishmaṉ kasa, yajauch, tsanirmau ainia nuja̱i̱ métekcha asan yumiṉsajme. Tura ju̱ kuítian-juu wajana jú̱ja̱i̱sha métekchaitjai.

¹²Warí, Ame akupkamna nuna iniaṉkasan wisha chikichík semanatiniṉ jimiará tsawant ijiarman áujeajai; tura wi achiajna nuna tiásnumia̱ chikichkiniak Yúsnaiti tusan akankan súajai.” Tu tímiai.’

¹³‘Tura kuítian-juusha arant wajas, nayaimpinmaani̱ pankái̱ íimsatniunkesha natsa̱a̱mak, tsuntsuma, ni netsepen awatí “Yusá, ti tunaitjai. Waitnéntrurtá” timiai.’

¹⁴‘Wats tájarme, nu kuítian-juu shuar Yus íimmianum ni enentái̱ péṉker awajnas ni je̱e̱n waketkimiai. Tura Pariséuka tamia núnisaṉ waketkimiai. Nekaatarum. Shuar naṉkaamantu enentáimtumana nuka péejchach awajnastatui. Tura antsu péejchach enentáimtumana nu, naṉkaamantu awajnastatui” tímiayi Jesus. Uchisha Jesusna áminiaiti

¹⁵Jesus antiṉkiarat tusar uchin itiariarmiayi. Tura Jesusa unuiniamuri̱sha nuna wáinkiar suritkiarmiayi.

¹⁶Tura Jesus nin untsukar tímiayi “Uchi Winí winitin tsaṉkamkatarum, surimkiairap. Enentáimsatarum. Uchichia áintsaṉ enentáimtumana nú shuárak Yus ni enentáin akupin ajasminiaiti.

¹⁷Uchi ni úuntri̱n umira núnisaṉ shuar Yúsan umíachkunka Yus ni enentái̱n akupin ajaschamniaiti.” Tu tímiayi Jesus. Kuítrintin áishman Jesusja̱i̱ áujmatsamiania nu

¹⁸Shuara uuntri̱ Jesusan tarí áujsamiayi. “Uuntá, amesha péṉkeraitme. Tuma asam, turuttia, ¿warinia túrakna tuke iwiaaku átataj?” tímiayi.

¹⁹Tutai Jesus, “¿Urukamtia Winia, péṉkeraitme, túrutam? Aents péṉkerka atsawai. Aya Yusak péṉkeraiti.

²⁰Tura Yus akupkamu ana nu péṉker nékame. Tsanirmawairap, mankartuawairap, kasamkairap, tsanumprurairap, ame apasha, nukusha shiir enentáimtustarum. Nusha nékame” tímiayi.

²¹Tutai áishmaṉ tímiayi “Uuntá, úchichik mash umiki tsakaruitjai.”

²²Jesus nuna antuk “Chikichik taatramsai, tímiayi. Ame takakmena nu ashí surukam kuítrincha ainia nu susarta. Nuiṉkia nayaimpiniam kuítrum átatui. Túram nemartustaj tusam winitia.”

²³Tura nuna antuk, nu áishmaṉ ti kuítrintin asa ti kuntuts enentáimpramiayi.

²⁴Tura kúntuts enentáimpramtai Jesus nuna nekáa “Kuítrintin ainia nu Yus akupeamunam pachiinkiatin ti iturchataiti, tímiayi.

²⁵Kamiriuka, uunt ana nu, auja ji̱i̱n waya̱tin itiurchataiti. Tura shuar kuítri̱n ti enentáimtana nu Yus akupeamunam pachiinkiatin nú naṉkaamas itiurchataiti.” Tu tímiayi.

²⁶Tura nuna antukarmia nu tiarmiayi “¿Nuiṉkia yaki uwempramniait?”

²⁷Tutai Jesus tímiayi “Aents tujintiainia nuna Yuska páchitsuk túramniaiti.”

²⁸Nuyá Pítiur Nin chicharuk tímiayi “Uuntá, iikia Ámin nemarsataj tusar ii takakmaaka ikiukji.”

²⁹Tutai Jesus tímiayi “Shuar Yus akupeana nuna túrataj tusa ni je̱e̱n ikiuakka tura núnisaṉ ni aparí̱ncha, nukurí̱ncha, yachi̱nkisha, nuwe̱nkesha, uchirí̱nkisha ikiuakka ju̱ nuṉkanmasha núkap wáinkiattawai nu shuar. Tura tuke iwiaaku pujustinniasha wáinkiattawai.” Ataksha ni jákatniuri̱n Jesus ujakmiania nu

³¹Jesus ni tuse unuiniamuri̱n akanki ikiaanak ju̱na tímiayi: “Jerusaréṉnum jeatemaji. Ju̱i̱sha Jerusaréṉnum Winia, Aents Ajasu tutain, túrunatniurun Yúsnan etserin yaunchu áatrurarmia nu uminkiattawai.

³²Apachnium surutkartatui. Túrawar wishikrurar, katsekrukar usukruawartatui.

³³Awatiar mantuáwartatui. Túramaitiatnak menaintiú tsawa̱ntai̱ nantaktiatjai” tímiayi.

³⁴Tura Nii tímiania nuna nekas túrunattawai, tícharmiayi. Wariniak ta tusar nekaacharmiayi. Jirikiúnmaya̱ áishmaṉkan Jesus íimtikmiania nu

³⁵Jesus Jirikiú péprunam nuntumsai̱, nui̱ áishmaṉ ji̱i̱ kusuru, kuítian surusarat tusa jintiá pujumiayi.

³⁶Untsurí̱ aents naṉkaamainian antuk “¿wariṉkit?” tímiayi.

³⁷Tutai, “Nasarétnumia̱ Jesus naṉkaamawai” tiarmiayi.

³⁸Kusurusha nuna antuk untsumuk “Jesusá, Uunt Kapitián Tawit weeachukaitiam. Tátiniuya núchakaitiam. Winiaja waitnentrurta” tímiayi.

³⁹Eemak wearmiania nu chicharainiak “takamatsata” tiarmiayi. Tutaisha nú arant untsumuk “Tawit weeachukaitiam; winiaja waitnentrurta” tímiayi.

⁴⁰Nuiṉkia Jesus wajas “itiatarum” tímiayi. Tura nii támatai,

⁴¹“¿Warí itiurtukat tusamea wakerutam?” tímiayi. Tutai kusuru áimiuk “Uuntá, íimtiasan wakerajai” tímiayi.

⁴²Tutai Jesus chichaak “Iimtia. Winia nekas enentáimtursa asam péṉker ajasume” tímiayi.

⁴³Nu chichamaik kusuru íimmiayi. Tura Yusa naari̱ uunt awajki Jesusan nemarmiayi. Tura ashí aents nuna wáinkiarmia nusha Yusa náari̱n uunt awajsarmiayi.