Read Shuar Apocalipsis (de Juan) 10 Bible Online

Apocalipsis (de Juan) 10 - Shuar bible

Apocalipsis (de Juan) 10

¹Nuyá chíkich kakaram suntar nayaimpinmaya̱ táarun wainkiamjai. Nusha yuraṉkim amu̱ámu tura múuknum tuntíak téntakmauyi. Yapi̱sha etsaja̱i̱ métek wínchauyi. Tura kujapé̱sha ji keá áintsaṉkeyi.

²Nusha papin urak takakauyi. Tura imiá uunt asamtai ni nawé̱ untsuurnumani̱ nayaantsanam tura menaari̱ni̱ kukar tarimias wajasmai.

³Tura úunt yawa̱ kakar shiniak chicháa áinis ti kakaram untsumkamai. Nuja̱i̱ siati (7) ipiamtasha chichasarmai.

⁴Nii chichasarmatai ni chichamen áartiniujai tura nayaimpinmaya̱ chichartak “Áaráip, túrutmiai. Ju̱ka nekanashti” túrutmiai.

⁵Tura nuyá, suntar nayaantsanmasha tura kukarsha tarimias wajama nu ni uwejé̱ untsuurí̱n nayaimpinmaani̱ takuimiai.

⁶Tura timiai “Peṉké ishichik ajasai. Suntar siatia nu umpúakuiṉkia Yus ashí yaunchu enentáimpramia nu uminkiattawai. Emka ujatsuk ukunam ni shuari̱n Yúsnan etserniua nuna ujakmiayi.” Tu timiai. Nuyá chichaak:“Yus tuke iwiaaku pujawai. Tura imiá kakaram asa nayaimpincha, nuṉkancha, nayaantsancha, tura ashí nui̱ írunna nunasha najanaiti” timiai.

⁸Nayaimpinmaya̱ “áaráip” túrutmia nu ataksha chichartak turutmiai “Suntar nayaantsanam tura kukar tarimias wajana nu weritiá. Turam ni untsuuri̱ni̱ papin urak takakna nu achiktá” turutmiai.

⁹Nuyá túrutkui werin papichin seamjai. Tura surak turutmiai “Papái. Yuátá. Tura yúamka ti yumin átatui. Tura antsu wakemi̱nkia yapamprattame” túrutmiai.

¹⁰Nuyá papichin suntarnumia̱ jukin yuamjai. Tura nii turutmia núnisaṉ wenuruiṉkia ti yumin nekapramjai. Tura antsu yuan wakeruiṉkia yapampramjai.

¹¹Tura nuyá turutiarmai “Waketkim ataksha ashí nuṉkanmaya̱ shuaran tura ni kapitiántri̱ncha Yus tana nu ujakartiniaitme.” Tu túrutmiai.