Read Shughni یونس 3 Bible Online

یونس 3 - Shughni bible

یونس 3

¹ڤاگه خُداوَند یونُسَرد لوْد:

²«تَر ښأر نینوا سأو اَت پَېغوْم اِدی تُرد څه لوْد مَردُمَرد وی فرێپ.»

³یونُس از خُڎای گٲپېن اِطاعت چود اَت تَر ښٲری نینوا توید. نینوا لَپ غُلأ ښأر ڤُد دِسگه اِدی اَره مېٿی دَربَر اَنجوڤد تا سَر تا سَر وی ښٲر ناږد.

⁴یونُس تَر ښأر دېد اَت تٲمی از وی اِدی یی مېٿ پوْند تیداو دَرَو وعظ سُت اَت لوْدی: «چِهل مېٿ دی نَږجید ښٲری نینوا ته نابود سوْد.»

⁵مَردُم وی ښأری وی گٲپېن باوَر چود، فُکَٿَرد لوْد روزه اَنجېت اَت فُکه از ځُلک تا غُلأ، بَخاطر توبه چید پِلێس پِنِځېت.

⁶وَختی پادښاه نینوا څه ښُد اِدی یونُس چیز لوْڤج از خو تَختی خأڤد اَت خو شاهوْنه پوښاکېنی از خو تَنأ یَند تیژد اَت پِلێس پِنوید اَت ٿیرَند نوست.

⁷پادښاه اَت وی غُلأ ېن دَربار اِکدی پېغوْمېن تَر سَرا سَری نینوا باښت: «اِنسوْن اَت حَیووْنېن یی چیزَٿ مٲ خېن حَتا ښَڅ مِس مأ بِرێزېن.

⁸فُکه مَردُم اَت حَیووْن بایَد پِلێس پِنِځېن اَت به دَرگاه خُڎای دعا کِنېن اَت از پوْندېن بَد خو پَس گأرڎېنېن، از اَعمال بَد خو ڎُست تأژېن.

⁹مَردُم چیز فأمت، شاید خُڎای از خو قأر گأرڎد اَت مأش تی رحم کِښت، اَت مأش از بَین نه یێست.»

¹⁰وَختی خُڎای وینت وأڎېن از پوْندېن بَد خو ڎُست تیژد وېڤ تی یی رحم چود، اَت آفَت اِدی خُڎای یی لوْڤج څه ڤُد وېڤَردی نَباښت.