Read Shughni مرقس 1 Bible Online

مرقس 1 - Shughni bible

مرقس 1

²تَر کِتاب اَشعیای پَیغَمبَر نِڤِشچ سُڎج: خو پېغوْم رَسوْن ته پېښا پېښ از تو بازُم، یو پوْند تُرد یېت کِښت.

³ات اِکو قیویج ته تَر چوله یی بیابوْن قیود: «خُداوَندَرد پوْند یتېت اَت وی راه یېن راست کِنېت.»

⁴یحیی یی غوْط ڎأڎیج تَر چوله یی بیابوْن پېڎا سُت اَت دَرَو وعظ سُت اِدی مَردُم حُکمَدَٿ بَښخِښ سِتاوی خو گُناه یېن توبه کِنېن اَت غوْط ڎاڎج سېن.

⁵مَردُمېنېن از فُکَٿ سَرزَمین یَهودیه اَت از ښأر اورشلیمېن تَر وی خېز تاید ات از خو گُناه یېنېن اِقرار چود اَت اَر دَریا اُردُنېن وی مِڎُست غوْط ڎاڎج سَت.

⁶یحیی یَندېن وی پوښاکېن از ښِتُر ووْن ڤَد اَت پوْستین تَسمه یی خو تَر میڎ چود اَت وی خوراک ژِدیشک اَت عسَل صحرایی ڤُد.

⁷یو یی وعظ چود اَت لوْدی: «بعد از مو ته تَووْنایی چارِک یاڎد اِدی وُزُم وی پێخبأند لایِق نِست.

⁸وُز تَمه هر ښَڅ غوْط ڎأڎُم اَت زِنیم ته اَما یو ته یاڎد ات تَمه باطِن ته خُڎای روح قَتی زنید.»

⁹دی وَختَند عیسی از قَریه ناصِره یی جَلیل یَت اَت اَر دَریای اُردُن یحیی مِڎُست غوْط ڎاڎج سُت.

¹⁰عیسی از ښَڅ نَښتوید ات چوښتی یِدی آسموْن یېت سُت اَت خُڎای روح چِبوْد جِناو از آسموْن وِرد نازِل سُت.

¹¹صَدا از آسموْن یَت اَت لوْدی: «تُت مو نازیوْن پُڅ، از تو‍یُم خُښنود.»

¹²تېزَٿی خُڎای روح تَر چوله یی بیابوْن وی یاد.

¹³یو چِهل مېٿ تَر چوله یی بیابوْن رېد اَت شَیطوْنی وی دَرَو وَسوَسه سُت. عیسی حَیووْنېنی وحشی قاتَرد ڤُد اَت فرښته یېنېن وِرد یاردَم فِرێپت.

¹⁴تأم یحیی یی غوْط ڎأڎیج بَندی سُت ات عیسی تَر مَنطِقه جَلیل توید اَت مویده خایی خُڎایی وېڤ آدمېنَرد وعظ چود.

¹⁵اَت لوْدی: «وَختی فِریپچ اِدی خُڎای پادښاهی قَریب یَٿچ، توبه کِنېت اَت اِکمی مویده خایی اَرد اېموْن ڤېت.»

¹⁶قوْل اِدی بَنوْم جَلیل څه ڤَد، عیسی وَم پألی ڤه یی نێږد ات شَمعوْن اَت وی ڤِراد اَندریاس وینت وأڎېن خو ښَستین اَر جَلیل قوْل پِتێود تا مایی اَنجېن.

¹⁷عیسی وېڤ تِلأپت اَت لوْدی: «تا شِچېڅېت مایی اَنجوڤد اَت شِچ مو دأم تی یَدېت یاڎ تَمَرد ڎأڎُم څَرأنگ آدَمېن مِس مایی جِناو اَنجېت.»

¹⁸وأڎ ڎو نَفَرېن تېزَٿ خو ښَستینېن پِتێود اَت وی دأم تی یېن تاید.

¹⁹دوسِک ڎَردی ېن از عیسی زَبَدی پَڅېنېن، یعقوب اَت یوحنا ڤَد ات یو یی وېڤ وینت وأڎېن اَر کِښتی خو ښأستېنېن تَیار چیداوَند ڤَد.

²⁰عیسی یی وېڤ ڎو نَفَر تېزَٿ تَر خو خېز تِلأپت. وأڎېن خو تأت زَبَدی وی خِدمَتکارېن قَتی اَر کِښتی لأک چود اَت خُبَٿېن عیسی دأم تی تاید.

²¹وأڎېن تَر کَپِرناحوم داخِل سَت اَت یوْدَند شَنبه مېٿ فِریپت اَت عیسی تَر عبادَتگاه توید اَت تعلیم دَرَو سُت.

²²مَردُمېنېن از وی تعلیم حَیرَت رېد، دِجأت یویی با قُدرَت اَت اِختیاری وېڤَرد تعلیم ڎاد اَما مُلایېنَند نه قُدرَت ڤُد اَت نه اِختیار.

²³وی وَختَند یی وایمه دار چارِک تَرَم دېد اَت قیودی:

²⁴«اې عیسی ناصری، تُند پی مأش چیر؟ یَٿچت مأش جوْن زێزییا؟ وُز وِزوْنُم تُت چأی، تُت خُڎای باښچِن اې پاکی متعال.»

²⁵اَت عیسی یی وی جِنېڅ لوْد: «قَرار ڤی اَت از می چارِک نَښتی.»

²⁶جِن وی چارِک خَښَٿ کلتینت اَت وأغسَتی صَدا از وی چارِک نَښتوید.

²⁷فُکَٿېن دِس حَیرَت رېد اَت از یَکدِگه یېن پېښست: «یَم چیز گأپ؟ څَرأنگ تعلیمات تازه اَت قُدرَت قَتی. اَت یو ته جِنیات تی فَرموْن ڎید اَت وأڎ اِطاعت کِنېن.»

²⁸به جألدی وی نوْم تَر فُکه جَلیل تِخیرم سُت.

²⁹وأڎېن از عبادَتگاه یَهودېن نَښتاید. یعقوب اَت یوحنا قَتی عیسیی تَر شَمعوْن اَت اَندریاس چید توید.

³⁰شَمعوْن خیښَند تأب ڤُد اَت یٲ هر بیرېج وێښچِن ڤَد. وَختی عیسی تَر وی جای څه فِریپت از حال وَم ږِنِک خَبَر سُت.

³¹عیسی تَر وَم خېز سُت، اَت وَم ڎُستَردی اَنجوڤد ات وَمی اَندوْځد. وَم تأب بېد اَت یٲ وېڤَرد دَرَو خِدمَت سَت.

³²تأم خیر نوست اَت ښأب سُت، فُکَٿ بېمارېن اَت ڎېوِنېنېن تَر وی خېز ڤود.

³³فُکَٿ وی قَریه مَردُمېنېن وی چید پِراندی جمع سَت.

³⁴بېمارېن اِدی هَزار جوفی مَرَض وېڤَند څه ڤُد عیسی یی وېڤ شِفا ڎاد اَت لَپ جِنیاتی از وېڤ زِواست. وأڎېن جَندېنېن فأمت عیسی خُڎای باښچِن دِجٲت وېڤَردی اِجازه نه ڎاد وأڎ گأپ ڎېن، اِدی یو چأی.

³⁵سحرکی عیسی اَندوید اَت از چیدَند نَښتوید. پی یی ښاڎ توید پَدَم یِچیَٿ نَڤُد اَت دَرَو دعا سُت.

³⁶شَمعوْن اَت وی همرایېن دَرَو ښِکید وی سَت.

³⁷اَت وَختی وی یېن څه ڤِرود وِردېن لوْد: «فُکَٿ تو ښِکَرېن.»

³⁸عیسی یی وېڤَرد لوْد: «یَدېت تَر اچگه قَریه یېن مِس سأوأم دِجأتُم یَٿچ تا خو پېغوْم تَرَم مِس فِرێپُم.»

³⁹عیسی تَر فُکَٿ مَنطِقه جَلیل نێږد اَت خو پېغوْم تَر عبادتگاهېن یَهود فِراپت اَت جِنیاتی از مَردُم زِواست.

⁴⁰یی نَفَرَند مَرَض جَلدی یی پِڎَفڅَک څه ڤُد تَر عیسی خېز یَت، چی زوْن خو ڎاد اَت خواهِښ قتی یی لوْد: «ای آقا، خواهِښُم پاک مو کِن.»

⁴¹عیسی زارڎ وی تی ٿُد، خو ڎُستی تَر وی اَٿێرت، څێپتی وی اَت لوْدی: «اَلبَته خواهِښُم، پاک سأو.»

⁴²وی مَرَض تېزَٿ بېد اَت پاک سُت.

⁴³بعد عیسی یی وی رُخصَت چود اَت وی غوْږَندی لوْد:

⁴⁴«تو وُښ ڤِد تَر یی چی ته نَلوْڤی، سه خو خَلیفه یَرد دِڤېس اَت خو پاک سِتاو جأت خُڎایی اِدی موسی پَیغَمبَری حُکم څه چوږج کِن اَت تو شفای جأت شاهِد ڤِد.»

⁴⁵اَما یو چارِک توید اَت دی خَبَر تَر فُک جا تِخیرم چود. عیسی یی اچگه نَڤأرڎاد روښکاره تَر قَریه ېن سوْد تَر جایېن خِلوَت رېد اَت مَردُم از فُکه تَر وی خېز یَت.