Read Shughni مرقس 10 Bible Online

مرقس 10 - Shughni bible

مرقس 10

¹عیسی اَزَمَند تَر پوْند ڎاد اَت تَر مَنطِقه یی یَهودیه تَر وی طَرَف دَریا اُردُن توید. ڤاگه مِس مَردُمېنېن جمع سَت اَت یو دَرَو تعلیم وېڤَرد سُت.

²یِلأڤېن از پَیرَووْن فِرقه یی فِریسی تَر وی خېزېن یَت اَت از وی یېن آزمود چود: «اِجازه نِستا چارِک خو ږِن لأکِښت؟»

³عیسی یی از وېڤ پېښڅت: «اِکمی جأتی موسی پَیغَمبَر تَمَرد چیز لوْد؟»

⁴وأڎېن لوْد: «موسی پَیغَمبَر یی اِجازه ڎاڎج چارِک خو ږِن خَط ڎێداو قَتی از خو وَم ڎَر کِښت.»

⁵عیسی یی وېڤَرد لوْد: «تَمه سَرسَختی جأت موسی پَیغَمبَر تَمَرد اِکدی نِڤِشت.

⁶اَما خُڎای از اَوَل دِنیا پېڎا څه چود چارِک اَت ږِنِکی پېڎا چود.

⁷می جأت ته چارِک خو داد اَت نأن لأکِښت اَت خو ږِن قَتی ته وَفادار سوْد

⁸اَت مأڎ ڎُیوْن ته یی جوْن سېن. اَت وأڎېن هچگه ڎو نَفَر نِست یی جوْن ڤیېن.

⁹هر چیز خُڎای یَکدِگه قَتی پېوأند څه چوږج آدَم جِدا وېڤ مأ کِښت.»

¹⁰وَختی عیسی خو اَصحابېن قَتی تَر چید تاقٲ څه ڤُد وی اَصحابېن اِکوی گأپېن ڤاگه از وی پېښست.

¹¹یو یی وېڤَرد لوْد: «هر تأم خو ږِن خَط څه ڎید اَت هچگه ږِنِک قَتی سور څه کِښت، خو نَو ږِن خېزَند ته زِناکار سوْد.

¹²اَت یی ږِنِک اَگه از خو چار څه نَښتیزد اَت اچگه چارِک قَتی سور څه کِښت، یٲ ته مِس خو چار خېز زِناکار لوْڤج سوْد.»

¹³کودَکېنېن تَر عیسی خېز ڤود تا وېڤ تی خو ڎُست رِبیزد، اَت وی اَصحابېن وېڤېڅ لوْد.

¹⁴وَختی عیسی یی می څه وینت خَفه سُت اَت وېڤَردی لوْد: «لأکېت دأڎ کودَکېن تَر مو خېز یَدېن، پی دېڤ مأرَفېت دِجأت خُڎای پادښاهی پی دِسگه نَفَرېن گیر.

¹⁵تَمه خُب بَشٲند وِزوْنېت هر تأم خُڎای پادښاهی یی کودک جِناو قَبول څه نَکِښت هچٿ ته اَر وی نَدېڎد.»

¹⁶اَت عیسی کودَکېن خو پی بَت زاښت اَت خو ڎُستی وېڤ تی رِبود اَت وېڤَردی بَرَکَت ڎاد.

¹⁷وَختی عیسی تَر سَفَر څه توید، یی چارِک ژێښتا ژێښتی تَر وی خېز یَت اَت وی پِراندی یی چی زوْن خو ڎاد اَت لوْدی: «اې بَشٲند اُستاد، وُز چیر کِنُم تا هر بِهښت خُڎای قَتی مُدوْم زِنده ڤیم؟»

¹⁸عیسی یی وِرد لوْد: «چیزَرد مو بَشٲند لوْڤی؟ به غَیر از خُڎای یی چأی نېکو اَت بَشٲند نِست.

¹⁹اَحکوْم ته فأمِیا، مأ زین، کاته گَری مأک، مأ څِف، از بَری خو شاهِدی مأڎه، تَقَلبُی مأک، خو داد اَت نأنَرد حُرمَت کِن.»

²⁰یو چارِکی تَر وی لوْد: «اې اُستاد، وُزُم از ځُلِکی تا شِچېڅ دېڤ فُکَٿ کارېن چوږج.»

²¹عیسی یی تَر وی چوښت اَت از دِلسوزی یی تَر وی لوْد: «یی چیز تُند کأم، سه اَت هر چیز تُند څه ڤِد وی پَرڎه اَت غَریبېنَرد وی دأک تا هر بِهښت سأوی اَت اَرَم تُند گَنج ڤِد. اَت از مو پَیرَووْن ڤی.»

²²اَما یو چارِکی پولدار خَفه سُت اَت توید دِجأت وِند لَپ پول ڤُد.

²³عیسی یی خو گَرگِنوښه چوښت اَت خو اَصحابېنَردی لوْد: «پولدارېنَرد څَرأنگ قین اَر خُڎای پادښاهی دېڎېن!»

²⁴ښاگِردېنېن از وی گأپېن حَیرَت رېد اَت عیسی یی ڤاگه مِس وېڤَرد لوْد: «اې اَولادېن، دېداو اَر خُڎای پادښاهی څوْندِک قین!

²⁵نَږجیداوی ښِتُر از سِځ ریف آسوْندی از یی پولدار اِدی اَر خُڎای پادښاهی څه دېڎد.»

²⁶وأڎېن لَپ دی حَیرَت سَت اَت تَر یَکدِگه یېن لوْد: «اَت چأی ڤأرڎېد نِجات ڤِرېد؟»

²⁷عیسی یی تَر وېڤ چوښت اَت لوْدی: «اِنسوْن ته نَڤٲرڎېد خو تَووْنایی قَتی خو نِجات ڎید اَما خُڎای ڤأرڎېد وِرد دأکِښت خُڎای خېز فُک چیز آسوْن، دِجأت خُڎایَرد فُک چیز اِمکوْن یَست.»

²⁸پِطرس دَرَو لوْڤد سُت: «چِسېت، مأشأم خو فُکَٿ چیزی لأک چوږج اَت تو دأم تی یأم یَٿچ.»

²⁹عیسی یی لوْد: «تَمه خُب بَشٲند فأمېت هر تأم مو اَت مویده خایی خُڎای جأت خو چید یا خو ڤِرادأر یا یَخځِنېن یا خو نأن اَت داد یا خو اَولادېن یا خو جایداد څه لأکِښت،

³⁰تَر مَم دِنیا صَد بَرابَر چید اَت ڤِراد اَت یَخ اَت، نأن اَت اَولادېن اَت جایداد اَما مِس معنَت اَت خاری ته نَصیبی وی سوْد اَت هر آخِرَت ته بِهیښت نَصیب وی سوْد.

³¹اَت لَپ از وېڤېن شِچ سَرپِرا څه وأڎ ته سَرزِبا سېن اَت وأڎېن سَر زِبا څه وأڎ ته سَر پِرا سېن.»

³²عیسی اَت وی اَصحابېنېن اورشلیم پوْندَرد ڤَد ات عیسی خو اَصحابېنېن تَر پِرا پوْند توید. وی اصحابېنېن حَیرَت رېد، اَت مَردُمېنېن از وېڤ زِبا څه یَت لَپ ښاجېن ڎوید. عیسی یی خو دوازده اَصحاب تَر پألی یاد اَت هر چیز ته وی تی څه یاڎد وېڤَرد دَرَو لوْڤد سُت.

³³اَت وېڤَردی لوْد: «مأش ته شِچ پی اورشلیم سأوُم اَت آدَم پُڅ ته غُلأ خَلیفه یېن اَت مُلایېن یَهود مِڎُست سِپارچ سوْد ات وأڎ ته وی میداو فَیصله کِنېن اَت مَردُم روم مِڎُست ته وی سِپارېن.

³⁴وأڎ ته وی ریشخَند کِنېن اَت وی پیڅَرد ته تُفېن، وی ته قَمچی قَتی دی یېن خو بعد ته زینېن وی. اَما اَره مېٿ تی ته ڤاگه زِنده سوْد.»

³⁵یعقوب اَت یوحنا زَبَدی پَڅېنېن عیسی خېز یَت اَت لوْدېن: «اې اُستاد، مأش خواهِښأم هر چیز از تو څه تِلأبأم مأشَرد وی کِن.»

³⁶عیسی یی وېڤَردی لوْد: «تَمه خواهِښ چیز وُز وی تَمَرد کِنُم؟»

³⁷وأڎېن لوْد: «وَختی تو ته شوْن اَت شَوکَت قَتی خو تَخت پادښاهی تی څه نِٿی مأش لأک ییو از تو خېز ڎُست اَت یِگه از تو چأپ ڎُست نِٿأم.»

³⁸عیسی یی وېڤَرد لوْد: «تَمه ته نه فأمېت چیز خواهِښېت. ڤأرڎِیېتا از ناشِکن رَنج اِدی وُز څه بِرێزُم بِرێزېت اَت هر رَنج اَت محنَت وُز څه وِنُم تَمه مِس ڤأرڎیېت وِنېتا؟»

³⁹جَوابېن ڎاد: «اوْن، ڤأرڎِیأم.» عیسی یی لوْد: «از ناشِکن یَند اِدی وُز څه بِرێزُم تَمه مِس بِرێزېت اَت قینی وُز څه وِنُم تَمه مِس وِنېت،

⁴⁰اَما نیستاو از مو خېز ڎُست اَت چأپ ڎُست مو کار نِست، یَم اِک وېڤَرد آدمېنَرد اِدی خُڎای یی از پِگاٿ وېڤَرد تعین چوږج.»

⁴¹وَختی وأڎ ڎیس اَصحابېن دی څه ښُد یعقوب اَت یوحنا قتی یېن دَر قأر ڎاد.

⁴²عیسی یی وېڤ تَر خو خېز تِلأپت اَت لوْدی: «وِزوْنېت غَیر یَهودېن قاتَرد اِک وأڎ نَفَرېن اِدی فَرموْن بَردار لوْڤج څه سېن از خو تَگاڤدی تی فَرموْن رَوایی کِنېن اَت وأڎ غُلأ یېن ته مِس وېڤ تی پادښاهی کِنېن.

⁴³اَما تَمه قاتَرد دِسگه مأ ڤِد هر چأی خواهِښ څه کِښت تَمه قاتَرد غُلأ ڤِد بایَد تَمَرد خِدمَتگار ڤِد.

⁴⁴اَت هر چأی څه لوْڤد وُز پِرا ڤیم بایَد فُکَٿ نوکَر ڤِد.

⁴⁵اَت آدَم پُڅ نه یَٿچ تا وِرد خِدمَت سوْد اَما دِگه یېنَرد خِدمَت کِښت اَت خو جوْن وېڤَرد فِدا کِښت.»

⁴⁶وأڎېن تَر ښأر اریحا فِریپت اَت وَختی عیسی خو ښاگِردېن اَت لَپ مَردُم قَتی از ښأر څه نَښتوید، یی سِبُت چارِکی وینت وی نوْم بارتیماوس اَت وی تأت نوْم تیماوس ڤُد، پوْند تی نوسچِن ڤُد اَت خَیراتی تِلأپت.

⁴⁷وَختی ښُدی عیسی یی ناصری از وی پوْند ته نَږجیست تَر وِیی خُب خَښَٿ قیود اَت لوْدی: «اې عیسی، اې نطفه داود، رحم مو تی کِن.»

⁴⁸اَما مَردُمېنېن وی پِچِروْخت: «قَرار کِن!» اَما یو یی خَښدی قیود: «اې وارِث تَختی داود، رحم مو تی کِن!»

⁴⁹عیسی وِروڤد اَت لوْدی: «وِرد لوْڤېت تروْ یاڎد.» وأڎېن وی سِبُت قیود اَت وِردېن لوْد: «خُش ڤی، اَندِځ، تو یی تِلأپت.»

⁵⁰بارتیماوس تېزَٿ خو چَپأن تَر پألی پِتێود اَت از خو جای تی اَندوید اَت تَر عیسی خېز یَت.

⁵¹عیسی یی وِرد لوْد: «چیز تو خُش وُز تُرد کِنُم؟» یو سِبُتی لوْد: «اې اُستاد، ژیوجُم ڤاگه وِنُم.»

⁵²عیسی یی وِرد لوْد: «سه تو اېموْنی تو شِفا ڎاد.» یو تېزَٿ دَرَو وینت سُت اَت عیسی دأم تی تَر پوْند ڎاد.