Read Shughni مرقس 11 Bible Online

مرقس 11 - Shughni bible

مرقس 11

¹وأڎېن تَر قِشلاقېنی بَیت فاجی اَت بَیت عنیا قَریب کوه زَیتوْن اَت اورشلیم څه ڤَد، تَرَمېن فِریپت. اِکوی وَختَندی عیسی ڎو نَفَر از خو اَصحابېنی باښت

²اَت وېڤَردی دِسگه لوْد: «وی قِشلاق بَراست سېت. وَختی تَرَمېت دی فِریپت جَووْن مَرکأب ته یَمَند ڤیسچِن وِنېت، غَل یی چأیَٿ وی تی سَوار نَسُڎج. وی یېتېت خو تروْ وی ڤېت.

³اَگه یی چأیی څه پېښڅت: چیزَرد وی یېتېت؟ لوْڤېت مأش اُستادَرد دَر کار» اَت یو ته وی بېزد.

⁴وأڎ ڎو نَفَرېن تاید اَت خو پوْندَردېن وینت یی جَووْن مَرکأب ڤوشچِن ڤُد، وی یېن یېت چود.

⁵یِلأڤېن یَمَند وِریڤځِن څه ڤَد تَر وېڤېن لوْد: «چیزَرد دی جَووْن مَرکأب یېتېت؟»

⁶هر چیزی عیسی وېڤَرد څه لوْڤج ڤُد وأڎېن اِکوی لوْد وېڤ مَردُمېنَرد اَت یی چأی یی پی وېڤ نَریفت.

⁷وی جَووْن مَرکأبېن تَر عیسی خېز ڤود اَت خو جېلَکېنېن وی تی پِتێود خو وی یېن وی تی سَوار چود.

⁸لَپ مَردُمېنېن خو جېلَکېن عیسی پوْند تی پِتێود اَت یِلأڤېن کِشتزار ڤه خېښچَک ښِچُښت اَت وی پوْند تی یېن فَرش چود.

⁹هر تأم از پِرا مِس څه توید خُب خَښَٿی قیود اَت هر تأم از زِبا څه ڤُد یو یی مِس قیود: «حَمد و ثنا، اِک وِرد خُش آمَدی ڤِد یو اِدی بَنوْم خُڎای څه یاڎد.

¹⁰خُڎایَرد شُکر ڤِد پادښاهی مأش تأت داود ڤا گه یاڎد. حَمد و ثنا ڤِد اِکوی خُڎایَرد اِدی هر بِهښت یو پادښاهی څه کِښت.»

¹¹عیسی پی ښأری اورشلیم فِریپت اَت تَر خوْنه خُڎای سُت. اَت تَرَمی فُکَٿ چیزی چوښت. اَما ښوْم سُت اَت عیسی خو دوازده اَصحاب قَتی اَر قِشلاق بَیت عنیا توید.

¹²هچگه مېٿ وأڎېن از قِشلاق بَیت عنیایېن نَښتاید اَت عیسی پوْندَرد مَږځوْنج سُت.

¹³از ڎَرَندی اَنجیر درَخت پأرک دار وینت اَت سُت تا ییوَٿ اَنجیر وَم تی پېڎا کِښت. اَما وَختی تَر وَم خېز څه فِریپت بَغَیر از پأرک یی چیزی نه وینت دِجأت اَنجیر وَخت نَڤُد.

¹⁴اَت وَم اَنجیر دِرَختی زوْغ چود: «تو جوْن خوْښ اَت تو سُم سَبیل.» اَت وی اَصحابېن وی گأپ ښُد.

¹⁵وأڎېن پی اورشلیم یَت اَت عیسی تَر خوْنه خُڎای دېد اَت پَرڎأڎیجېن اَت خَریت گأرېنی از خوْنه خُڎای دَرَو زِوێست سُت. صَرافېنَند وېڤ مېزېن اَت چِبوْد پَرڎأڎیجېنَند وېڤ چَوکی یېن دَرَو پِتێود سُت.

¹⁶اَت یِچی یی نَلأک چود خو سَوداېن زێزېن اَت از خوْنه خُڎای دَرگاندی یاسېن.

¹⁷یو یی مَردُمېنَرد تعلیم ڎاد اَت لوْدی: «نِڤِشچ سُڎج: مو چید دعا چیداو جأت فُکَٿ مَردُمېنی جَهوْنَرد ڤِد اَما تَمه یېت می جای دُزدېنَرد میزج.»

¹⁸غُلأ خَلیفه یېن اَت مُلایېن یَهودېنېن اِکوی گأپ څه ښُد پوْندېن ښِکود تا عیسی زینېن. وأڎېن از وی زیداو ښاج ڎوید دِجأت فُکَٿ مَردُمېنېن از وی تعلیم ڎێد حَیرَت رېد.

¹⁹ښوْم سُت اَت عیسی خو اَصحابېن قَتی از وی ښأر نَښتوید.

²⁰سحرکی یېن وی پوْند ڤه نَږجأد اَت وینتېن یٲ اَنجیر درَخت از خو وِیېشَند قاق سِڅ.

²¹پِطرس عیسی گأپ خو بَیاڎ ڤود اَت لوْدی: «اې اُستاد، چِس دَم اَنجیر درَختَت زوْغ څه چود قاق سَت.»

²²عیسی یی وېڤَرد لوْد: «خُڎایَرد اېموْن تَمَند ڤِد.

²³اَت دی مِس بَشٲند فأمېت اَگه ییو از تَمه تَرَمی کوه څه لوْڤد: اَندِځ خو سه اَر ښَڅ واښ یو ته حُکمَدَٿ واښت. اَت تَمه زارڎَند شَک مأ ڤِد اَما اېموْن تَمَند ڤِد اَت هر چیز څه لوْڤېت یو ته حُکمَدَٿ سوْد.

²⁴دِجأت تَمَرد ته لوْم: خُب بَشٲند فأمېت هر چیز ته دعاندی اېموْن قَتی څه تِلأبېت وی ته ڤِریېت اَت تَمَرد ته ڎاڎج سوْد.

²⁵۲۵‏-۲۶ وَختی دعا چیداوَند څه وِرأفڅېت اَگه از یی چی یېت بَدی څه وینچ وِرد بَښخِښ کِنېت تا تَمه داد آسموْنی مِس تَمه گُناه یېن تَمَرد بَښخِښ کِښت. اَما اَگه تَمه هچگه یېنَرد بَښخِښ څه نه کِنېت تَمه داد آسموْنی ته مِس تَمَرد بَښخِښ نَکِښت.

²⁷وأڎېن ڤاگه پی اورشلیم تاید. وَختی عیسی یی خوْنه خُڎای ڤه نێږد غُلأ خَلیفه یېن اَت مُلایېن اَت کَتأنکېنی یَهودېن تَر وی خېز یَت.

²⁸اَت از وی یېن پېښست: اِکدی صَلایَت چأی تُرد ڎاڎج تو دی څه کِنی؟ چأی تُرد دِسگه صَلایَتی مېڤ کارېن چیداو ڎاڎج؟»

²⁹عیسی یی وېڤَرد لوْد: «مُند مِس یی سَوال از تَمه اَگه جَواب څه ڎېت، تَمَرد ته لوْم چِدوْم صَلایَت قَتی ته مېڤ کارېن کِنُم.

³⁰یحیی غوْط څه ڎاد اِختیاری خُڎای ڤُد یا اِختیاری مَردُم؟ مُرد لوْڤېت!»

³¹وأڎېن خو خېزَند بحث دَرَو سَت اَت لوْدېن: «اَگه لوْڤأم از طَرَف خُڎای ڤُد یو ته لوْڤد: چیزَردېت وِرد اېموْن نه ڤود؟

³²اَما مأش نَڤٲرڎېم لوْڤأم اِختیاری مَردُم ڤُد.» وأڎېن از مَردُم ښاج ڎوید، دِجأت فُکَٿېن یحیی پَیغَمبَر فأمت.

³³می جأتېن عیسی یَرد لوْد: «مأش نه فأمأم.» تأمی عیسی وېڤَرد لوْد: «خو وُز مِس تَمَرد نه لوْم چِدوْم صَلایَت قَتی مېڤ کارېن کِنُم.»