Read Shughni مرقس 12 Bible Online

مرقس 12 - Shughni bible

مرقس 12

¹عیسی یی خو گأپېن دَووْم ڎاد اَت مَتَل قَتی یی وېڤَرد لوْد: «چارِک باغچه از اَنگورڎ میزد اَت وی گَرگِنوښه یی دېوال ڎاد. اَنگورڎ ښُڅ زِوێستاو جأتی وی دَرون یی قوْلَک میزد اَت یی بُرجی اَلایده یی میزد تا ښأب اَزَم تی پَیره کِښت. اَت وی یی باغبوْنېنَرد سِپارت اَت خُبَٿ تَر سَفَر توید.

²وَختی اَنگورڎ څه فِریپت یو یی خو نوکَر تَر وېڤ خېز باښت تا خو بأښ اَنگورڎ از وېڤ زێزد.

³اَما وأڎېن وی نوکَر اَنجوڤد اَت خُبېن وی ڎاد اَت وی یېن خالِیَٿ باښت.

⁴صاحب باغ یِگه نوکَر خُند تَر وېڤ خېز باښت. اَت وأڎېن وی فَرقَرد ڎاد ات نِموْ اَت بې حُرمَتی قَتی یېن وی زِواست.

⁵ڤا یی اچگه نوکَر خُند تَر وېڤ خېز باښت، اَت وی یېن ڎاد اَت زیدېن وی. تأم اِکدی تی یېن فَنٲ ښیڤد اَت زیدېن.

⁶صاحب باغَند فَقَط یی نَفَر گه ڤُد تا وی تَرَم بېزد، یو وی نازیوْن پُڅ ڤُد. آخِر وی باښت اَت لوْدی: «وأڎ ته بَغېر مو پُڅَرد حُرمَت کِنېن.»

⁷اَما باغبوْنېنېن وَختی وی پُڅ څه وینت، تَر یَکدِگه یېن لوْد: «یِد وارِثی اِکمی باغ یَدېت دی زینأم اَت یَم مأشَند سوْد.»

⁸اَت وی غِڎأ یېن اَنجوڤد اَت زیدېن وی اَت از باغېن وی تَر ڤَج پِتێود.

⁹تأم تَشت صاحب باغ وېڤ قَتی چیر کِښت؟ یو ته یاڎد اَت وېڤ باغبوْنېن ته زینت اَت وی باغ اَنگورڎزار ته هچگه یېنَرد دأکِښت.

¹⁰دَم کَلوْم خُڎای یېت نه ښێیجا؟ وَم ژیرېن وأڎ وُستاڎېنېن قَبول څه نَچود یٲ از هچگه ژیرېن کَده با اَرزِش دی سَت.

¹¹اِکِد کار از طَرَف خُڎای سُڎج اَما مأشَرد واجگونه دِڤېست.»

¹²کَتأنکېنی یَهودَند وېڤ دِل ڤُد عیسی دَستگیر کِنېن، دِجأت فأمتېن وی گأپېنېن وېڤ تاره ڤُد. اَما وأڎ کَتأنکېنېن از مَردُم ښاج ڎوید، وی یېن لأک چود خو تایدېن.

¹³یِلأڤېن از پَیرووْنی فِرقه یی فِریسی اَت طَرَفدارېن هیرودیس تَر عیسی خېز باښچ سَت تا خو سَوالېن قَتی از وی گأپ زېن.

¹⁴وأڎېن تَر وی خېز یَت اَت لوْدېن: «اې اُستاد، وِزوْنأم تُت یی نَفَری راستکار اَت طَرَفداری ته از یی چی نه کِنی. تو ته مَردُمَند وی ظاهِر نه چِسی اَت به راستی ته رای خُڎای مَردُمېنَرد تعلیم کِنی. مالیات امپراطور رومَرد دأک چیداو رَوا یَستا نَی؟ مالیات دأکأم یا نَی؟»

¹⁵عیسی یی وېڤ دورویه یی فأمت اَت لوْدی: «چیزَرد تَمه مو آزمود کِنېت؟ یی سِکه یی نُقره ڤېت اَت چِسأم.»

¹⁶وأڎېن سِکه ڤود اَت یو یی از وېڤ پېښست: «صورَت اَت نوْمی چی یو تی؟» جَوابېن ڎاد: «صورَت اَت نوْمی امپراطور.»

¹⁷عیسی یی لوْد: «خُب، هر چیز از امپراطور څه امپراطورَرد دأکېت اَت هر چیز خُڎای یَند څه خُڎایَرد دأکېت.» اَت وأڎېن از وی گأپېن حَیرَت رېد.

¹⁸بعد پَیرووْنی فِرقه یی صَدوقېنېن تَر وی خېز یَت. اَت می فِرقه یَند به دی باوَر ڤُد اِدی بعد از میداو ڤاگه زِنده سِتاو مُمکِن نِست. وأڎېن از عیسی پېښست:

¹⁹«اې اُستاد، موسی پَیغَمبَری مأشَرد نِڤِشت اَگه چارِک څه میرت اَت وی ږِن بې اَولاد څه رِست وی ڤِراد مَجبور وَم وی ږِن اَنجیڤد تا وِرد اَولاد ڤیرت.

²⁰ووڤد ڤِرادأرېن ڤَد سَر غُلأ یی ږِن اَنجوڤد اَت بې اَولاد مود،

²¹یو پِس وِیَٿی وَم ږِنِک اَنجوڤد اَت یو مِس بې اَولاد مود. دِسگه یو اَریُم ڤِرادی وَم اَنجوڤد،

²²اَت اِک دی تی هر ووڤد ڤِرادأرېن ماد اَت یِچِندَٿ اَولاد نه سُت. زِبا از وېڤ یٲ ږِنِک مِس ماد.

²³وَختی قیوْمَت مېٿ څه فِراپت اَت وأڎ ته ڤاگه زِنده څه سېن یٲ ږِنِک ته چِدوْم ییو از وېڤَند سوْد؟ دِجأت یٲ یی فُکَٿَرد چار چود.»

²⁴عیسی یی وېڤ جَوابَرد لوْد: «تَمه یېت ره گُم سِڅ از کَلوْم اَت قُدرَتی خُڎای یی چیزَٿ نه فأمېت.

²⁵وَختی اِنسوْن ڤاگه زِنده څه سوْد ږِن اَنجیڤد اَت چار چیداو نِست دِجأت فرښته گوْن آسموْنی جِناو سېن.

²⁶ڤاگه بعد از قیوْمَت زِنده سِتاو جأت کِتاب موسی پَیغَمبَرَند نِڤِشچ سُڎج، اَت تَمه یېت اِک وَم قِصه یِدی از څوڎمَند یاڅ څه نَښتوید نه ښێیجا؟ خُڎای یاڅ جِناو ظاهِر سُت اَت موسی پَیغَمبَری لوْد: «وُزُم خُڎای ابراهیم اَت خُڎای اِسحاق اَت خُڎای یعقوبُم.

²⁷خُڎای، خُڎای میږځِنېن نِست اَما خُڎای زِنده گوْن. تَمه یېت خَښ ره گُم.»

²⁸ییو از مُلایېن یَهود تَر پِرا یَت اَت وېڤ گأپی ښُد اَت فأمتی عیسی یی وېڤَرد بَشٲند جَواب ڎاد، اَت از عیسی یی پېښست: «چِدوْم حُکم خُڎای مُهِم دی؟»

²⁹عیسی یی جَواب ڎاد: «اَوَل یَم: اې اِسرایل ښِن، خُداوَند، خُڎای مأش، یَکتا اَت یَگوْنه

³⁰اَت خُداوَند، خو خُڎای، از خو تَموْمی دِل اَت خو تَموْم جوْن اَت خو تَموْم ذېن اَت خو تَموْم قُدرَت قَتی ژیوج کِن.

³¹اَت یَم دوُم وَم پِراکی جِناو: خو اَقارِب خو مِغوند ژیوج کی. از مېڤ ڎو حُکم هچگه غُلأ دی نِست.»

³²یو چارِکی وِرد لوْد: «اې اُستاد، تُت راست لوْد، حَقیقَتَت لوْد خُڎای ییوَٿ اَت غَیر از وی خُڎای گه نِست.

³³اَت وی ژیوج چید از تَموْم دِل اَت تَموْم عقلی اَت تَموْم قُدرَت اَت ژیوج چیداو خو اَقارِب خو جِناو از دېڤ فُکَٿ سُمغاتېن اَت قُربوْنی یېن کَده بیدی.»

³⁴وَختی عیسی یی ښُد یو چارِکی عاقِلوْنه جَواب ڎاد وِردی لوْد: «تُت از خُڎای پادښاهی ڎَر نِست.» بعد از وی یی هچگه یِچأیَٿ زأره نَچود از وی سَوال کِښت.

³⁵وَختی عیسی یی خوْنه یی خُڎای یَند تعلیم څه چود دِسگه یی سَوال پېښست: «مُلایېن یَهود څَرأنگ ڤأرڎیېن لوْڤېن: مَسیح، از نطفه داود؟

³⁶داود پَیغَمبَر خُبَٿی اَلهوْم اَت وحی خُڎای روح قَتی لوْد: «خُداوَندی مو بادارَرد لوْد: مو خېز ڎُست تی نِٿ تا تو دُښمَنېن تو پاڎ پی بیر پِتېم.»

³⁷وَختی داود پَیغَمبَر خُبَٿ وی بادار څه لوْد، څَرأنگ بافت یو داود پَیغَمبَر پُڅ ڤِد؟» فَنٲ مَردُمېنېن از خُشی وی گأپېن نِغُښت.

³⁸عیسی یی تعلیم ڎاد اَت وېڤَردی لوْد: «از مُلایېن شَریعت ڎَری کِنېت، وأڎېن ژیوج دَراز چَپأنېن قَتی کَلوْنکاری کِنېن. از وېڤ خو احتیاط کِنېت، وأڎېن ژیوج تَمه بازارَرد اَت هچگه جای یېنَرد وېڤَرد سَلوْمی ڎېت.

³⁹اَت وأڎېن ژیوج تَر عبادتگاهېن یَهود پِرا از فُکَٿ نِٿېن اَت تَر سورېنېن ژیوج تیر از فُکَٿ ڤیېن.

⁴⁰بېوه یېنَند ته وېڤ مال خېن اَت مَردُم پِراندی ته دعایی دُرویه یی کِنېن. وېڤ جِزا ته از هچگه یېن خَښ دی سوْد.»

⁴¹عیسی تَر خوْنه یی خُڎای وَم چاښدوْن بَیتالمال روپَرو نوسچِن ڤُد. اَت چوښتی څَرأنگ مَردُم اَر وَم چاښدوْن پول پِتېن. هر تأم بای څه ڤُد یو یی لَپ دی پول پِتێود.

⁴²یی بېوه ږِنِک بېچاره یَت اَت ڎو روپیه یېن وَمَند څه ڤَد وېڤی اَر وَم چاښدوْن پِتێود.

⁴³عیسی یی خو اَصحابېن تَر خو خېز قیود ات لوْدی: «خُب بَشٲند فأمېت اِکوْدَندېن فُکَٿ څه اِکأ بېوه ږِنِک بېچاره یی از دېڤ فُکَٿ لَپ دی پول پِتێود.

⁴⁴دِجأت وأڎېن از خو پَسَنداز تی دأک چود اَت یٲ یی خو فُکَٿ دارایی اَرَم پِتێود.»