Read Shughni مرقس 14 Bible Online

مرقس 14 - Shughni bible

مرقس 14

¹ڎو مېٿ تَر اَیوْم فِصَح اَت اَیوْم فِطیر رېڎجِن څه ڤُد، غُلأ خَلیفه اَت مُلایېن یَهودَند وېڤ دِل ڤُد عیسی قَرارَٿ گیر کِنېن خو زینېن.

²وأڎېن لوْد: «اِکَم کار اَیوْم مېٿَند مأسوْد دِجأت مَردُم غَلمَغال ته اَندیزد.»

³وَختی عیسی تَر قِشلاق بَیت عنیا شَمعوْن اِدی وی لَقَب جَزوْمی څه ڤُد، وی چیدَند دَستارخوْن تی نوسچِن ڤُد ات یی ږِنِک مِڎُست یی بوتَل قیمَتی از عطری خالِص اَت تَر عیسی خېز دېد خو وی یی ڤِرُښت. اَت وی عطری وی کألَرد مالت.

⁴یِلأڤېنېن یَمَند څه ڤَد وېڤ قأر سَفید ات تَر یَکدِگرېن لوْد: «دی عطری چیزَرد یِد ږِنِک دِسگه اَدَر چود؟

⁵وَم ږِنِکېن وَم کار قَتی پُښېموْن چود اَت لوْدېن: وی عطری بَی از یی سال معاش لَپ دی، بیدی سُڎجَت وی پول غَریبېنَرد دأک چوږج.

⁶اَما عیسی یی لوْد: «تَمَند پی وَم کار چیر؟ یٲ یی بَشٲند کار مُرد چوږج.

⁷نادارېنېن مُدوْم تَمه خېزَند، هر وَخت دېڤَرد یاردَم څه کِنېت ڤأرڎیېت اَما وُزُم مُدوْم تَمه خېزَند نِست.

⁸از وَم ڎُست هر چیز څه یَت مُردی حُرمَت چود اَما وُز فأمُم مو میداو قَریب سُڎج دِجٲتی مُردی عطری مالت.

⁹بَشٲند وِزوْنېت تَر هر جای دِنیا مویده خایی خُڎای پادښاهی ته څه ڎېن هر چیر یَم ږِنِک مُرد څه چود نَقلی ته کِنېن.»

¹⁰بعد از وی یَهودای اِسخِریوطی، ییو از وی دوازده ښاگِردی ناطِق څه ڤُد، تَر غُلأ خَلیفه یېن خېز سُت تا عیسی وېڤَرد سِپارت.

¹¹وَختی وأڎېن دِسگه از وی څه ښُد لَپ خُشېن سَت اَت وِردېن پول وعده ڎاد. یَهودا یی بَشٲند وَخت خُرد ښِکود تا عیسی وېڤَرد سِپارت.

¹²اَوَل مېٿ اَیوْم فِصَح، وَختَند وأرگېن قُربوْنی یېن څه چود، اَصحابېنېن عیسی ره لوْد: «تو دِل تَر کأ اَیوْم فِصَح تُرد تَیارأم؟»

¹³عیسی یی ڎو نَفَر از خو اَصحاب باښت اَت وېڤَردی لوْد: «تَر ښأر سېت اَت تَرَم ته یی چارِک وِنېت کُزه قَتی ښَڅ یێست. وی دأم تی سېت.

¹⁴اَت تَر هر جاه یو څه دېڎد تَمه مِس وی قَتی دېڎېت اَت صاحب چیدَرد لوْڤېت: اُستاد ته لوْڤد یو کوتأ چِدوْم خو اَصحابېن قَتی تَرَم اَیوْم فِصَح گَرڎٲ خأم؟

¹⁵یو ته غُلأ بالا خوْنه تَمَرد دِڤېست، فُک چیزی وی دَرون تَیار ڤُد. یَمَند فُک چیز مأشَرد تَیار کِنېت.»

¹⁶وی ڎو اَصحابېن تَر ښأر تاید اَت هر چیز یو څه لوْد وأڎېن اِکوی تی چود. اَت دِسگه یېن خو تَیاری اَنجوڤد.

¹⁷وَختی ښأب څه سُت عیسی وېڤ خو دوازده اَصحاب قَتی تَرَم فِریپت.

¹⁸وَختی وأڎېن دَستارخوْن تی نیسڅِن اَت گَرڎٲ خیدَندېن څه ڤَد عیسی یی وېڤَرد لوْد: «خُب بَشٲند وِزوْنېت ییو از تَمه ته مو قَتی نُر گَرڎٲ څه خیرت، مو ته سِپارت.»

¹⁹وأڎېن خَفه سَت اَت هر چِدوْمېن از وی پېښست: «وُزُم اِکو یا؟»

²⁰عیسی لوْد: «یو ییو از تَمه دوازده نَفَر مو قَتی خو ڎُست اَر مَم کاسه څه یێست.»

²¹پَیغَمبَرېن کِتابَند دِسگه نِڤِشچ سُڎج، آدَم پُڅَند ته اِکوی تی میرت. اَما وُز تَمَرد لوْم: وای بَحال وی نَفَر اِدی آدَم پُڅ ته خو مِڎُست څه سِپارت. اِکوی نَفَر از نأن څه نَسُڎجَت بیدی ڤُڎجَت.»

²²وَختی ښوْم گَرڎٲ یېن څه خود عیسی گَرڎٲ زاښت اَت خُڎای شُکرَتی چود اَت وی یی کأند چود ات خو ښاگِردېنَردی دأک چود خو وېڤَردی لوْد: «زېت یَم مو جوْن.»

²³اَت ناشِکن ندی یی اَنگورڎ ښُڅ زاښت اَت شُکرَتی چود خو وېڤَردی دأک چود اَت فُکَٿېن از وَمَند بِراښت.

²⁴عیسی یی لوْد: «یَم مو خون، نِښوْنی وعده اَت پَیموْن بَین خُڎای اَت مَردُم اَت لَپ نَفَرَرد ته وېڤ نِجات جأت تِس سوْد.

²⁵بَشٲند فأمېت وُز ته هچگه از مَم اَنگورڎ ښُڅ نَبِرێزُم تا خُڎای پادښاهی یَند وَم ڤاگه بِرێزُم.»

²⁶وأڎېن قَصیده ښێید خو پی کوهی زیتوْنېن تاید.

²⁷عیسی یی خو ښاگِردېنَرد لوْد: «تَمه ته فُکَٿ از مو خو پیڅ گَرڎېنېت تا هر چیز کَلوْمی خُڎایَند نِڤِشچ څه سُڎج یو ته اِکوی تی عَمَل سوْد: چوپوْن ته دیُم اَت وی مالېن ته تِخیرم سېن.»

²⁸اَما بعد از وی ته ڤاگه زِنده څه سأم پِرا از تَمه ته تَر سَرزَمینی جَلیل سأم.»

²⁹پِطرس عیسی ره لوْد: «اَگه فُکَٿ تو څه لأکېن وُز ته تو نَلأکُم.»

³⁰عیسی یی وِرد لوْد: «بَشٲند فأم نُر ښأب ته پِرا از دی یِدی چُښ ڎو پیڎ قیود تو ته اَره پیڎ لوْڤی: وُز وی نه فأمُم.»

³¹اَما پِطرسی زارگی تی لوْد: «اَگه تو قَتی څه مَرُم وی وَختَند ته نَلوْم تو نَفأمُم.» اَت وأڎ هچگه یېنېن مِس دِسگه لوْد.

³²وَختی تَر جای به نوْم باغ جِتسیمانی یېن څه فِریپت، عیسی یی تَر خو اَصحابېنی لوْد: «وُز وَختی دعا څه کِنُم تَمه یوْدَند نِٿېت.»

³³اَت بعد پِطرس اَت یعقوب اَت یوحنا یی خو قَتی یاد اَت از قینی یی وېڤَرد لوْد:

³⁴«دِس قینُم قَریب مَرُم، تَمه یوْدَند ڤیېت اَت اَگأ رِسېت.»

³⁵عیسی اَزَمَند دوْندِک ڎَر دی سُت اَت زِمأڎ تی وێښت اَت دعای چود: «اَگه څه بافت اِکَم ساعت رَنج از مو ڎَر کِن.»

³⁶اَت لوْدی: «اې تأت آسموْنی، تو ته هر چیز ڤأرڎی یی. اِک مَم پیاله رَنج نُر از مو خېزَند ڎَر کی، اَما مو خُش تی نَی، ات خو خُش تی.»

³⁷وَختی عیسی تَر خو ښاگِردېن خېز څه یَت وینتی وأڎېن تَر خوڎم. اَت پِطر‍سَردی لوْد: «اې شَمعوْن، ښاڤجَتا؟ نَڤأرېت ڎادا یی ساعت مأښافڅېت؟

³⁸اَگأ ڤیېت اَت دعا کِنېت تا از وَسوَسه شَیطوْن ڎَر رِسېت. تَمه روح خواهِښ کِښت اَما تَمه جِسم ضعیف.»

³⁹عیسی توید اَت ڤاگه یی وَم دعای چود.

⁴⁰وَختی څه یَت ڤا یی وېڤ تَر خوڎم وینت، نَڤأرېن ڎاد خو څېمېن یېتېن. اَت نَفأمتېن چیز وِرد لوْڤېن.

⁴¹عیسی اَرَیُم پیڎ یَت اَت وېڤَردی لوْد: «غَلېت مِس ښېڤځ اَت تَر خوڎمېتا؟ بأس! ساعت فِریپتاو وِرد څه ڤُد فِریپت، شِچ ته آدَم پُڅ گُناکارېن مِڎُست سِپارچ سوْد.

⁴²اَندِځېت خو تایدأم. اِکو ته مو څه سِپارت شِچ ته یاڎد.»

⁴³وی وَختَند یو غَل گأپ څه ڎاد یَهودا، ییو از وی دوازده اَصحاب، فَنٲ مَردُم قَتی یَت اَت وېڤ جه شَمشېر اَت ڎارگ ڤُد. غُلأ خَلیفه یېن اَت مُلایېن شَریعت اَت غُلأ یېن قَومېنی مَردُم پَدَم باښچ.

⁴⁴اِسخِریوطی یی ییو از وی دوازده اَصحاب څه ڤُد وېڤَردی یی نِښوْنی لوْد: «هر چی بأ څه کِنُم اِکو نَفَر عیسی، وی دَسگیر کِنېت اَت عسکَرېن قَتی وی یاسېت.»

⁴⁵وَختی یَهودا پی عیسی خېز څه فِریپت وِردی لوْد: «اې اُستاد» اَت وی یی بأ چود.

⁴⁶وأڎېن عیسی اَنجوڤد اَت دَسگیرېن وی چود.

⁴⁷ییو از وېڤ نَفَرېن عیسی قَتی یَمَند څه ڤُد خو شَمشېری زِواست اَت وی غُلأ خَلیفه ندی وی نوکَر غوْږی ښِچُښت.

⁴⁸عیسی یی لوْد: «وُزُم بَغېر وحشی تَمه خو شَمشېر اَت ڎارگ قَتی مو دَسگیرېت؟

⁴⁹هر مېٿُم تَر خوْنه خُڎای تَمه پِراندی تعلیم ڎاد اَت مُیېت دَسگیر نَچود دِجأت هر چیزېن وأڎ پَیغَمبَرېن څه لوْڤج یو بایَد تَکمیل سوْد.»

⁵⁰اَصحابېن فُکَٿ وی لأک چود اَت اَزَمَندېن رِڅاست.

⁵¹یی جَووْن وی دأم تی توید وی تَر دأم فَقَط یی چادَر پېچ ڎاڎج ڤُد اَت وَختی وَم چادَردېن څه اَنجوڤد یو از وَم نَږجید

⁵²اَت شِلَک شِپلتاق رِڅوست.

⁵³عیسی یېن تَر سَرغُله دی خَلیفه خېز یاد اَت فُکَٿ غُلأ خَلیفه یېن اَت غُلأ یېن قَوم اَت مُلایېن یَهودېن یَمَند جمع سِڅِن ڤَد.

⁵⁴پِطرس از ڎَر وی دأم تی توید اَت تَر غُلأ خَلیفه دَرگاه دېد. یَمَند نوکَرېن پألِندی نوست اَت خو یی یاڅ خېزَند کَش چود.

⁵⁵غُلأ خَلیفه یېن اَت شورایېنی یَهودَند فُکَٿَند وېڤ دِل ڤُد بَر ضِدی عیسی شاهِدی ڤِرېن تا وی زینېن. اَما نَڤأرېن ڎاد.

⁵⁶فَنٲ یېن بَر ضِدی وی شاهِدی از بَری خو ڎاد اَت وېڤ شاهِدی یَکدِگه قَتی بَرابَر نه یَت.

⁵⁷یِلأڤېن اَنداید اَت از بَری خو یېن شاهِدی ڎاد اَت لوْدېن:

⁵⁸«مأشأم از وی ښُد څه لوْدی: خوْنه خُڎای یِدی اِنسوْن مِڎُست یٲ میزج څه سِڅ وُز ته وَم ته وِروْننُم اَت اَره مېٿ تی ته ڤاگه وَم مازُم اِدی اِنسوْن مِڎُست میزج مأ ڤِد.»

⁵⁹اَت ڤا مِس وېڤ شاهِدی ڎێداو ییوَٿ نَڤُد.

⁶⁰غُلأ خَلیفه اَندوید اَت فُکَٿ پِراندی یی از عیسی پېښست: «دأڎ تو تی دی دوْند توْمَت څه کِنېن، تو یی چیز نَلوْڤِیا؟»

⁶¹اَما عیسی قَرار ڤُد اَت یی چیزی نَلوْد. ڤا یی غُلأ خَلیفه از وی پېښست: «تُت مَسیح، خُڎای بِزُرگ پُڅا؟»

⁶²عیسی یی لوْد: «یَستُم. اَت تَمه ته آدَم پُڅ وِنېت یو ته خُڎای بِزُرگَند از وی خېز طَرَف نوسچِن دِجأت از وی طَرَف جای قُدرَت اَت حُرمَت وِرد دأک چوږج سوْد. اَت یو ته آسموْن اَبرېن تی یاڎد.»

⁶³غُلأ خَلیفه یی از قٲر خو گِرېبوْن څُغ ڎاد اَت لوْدی: «مأشَرد هچگه شاهِدی دَر کار نِست.

⁶⁴می کُفرېت تَمه مِس ښُدا چیز رای ته ڎېت؟» فُکَٿېن تَر وی زیداو خُش ڤَد.

⁶⁵یِلأڤېنېن وی پیڅَرد تُفت اَت وی څېمېنېن ڤوست اَت مُت قَتی یېن وی ڎاد اَت لوْدېن: «غَیبی لوْ چأی تو ڎاد؟» اَت نوکَرېنېن مِس وی ڎاد.

⁶⁶پِطرس غَل اَر دَرگاه یی خو کَش چود اَت ییو از غُلأ خَلیفه کَنیز یَت،

⁶⁷اَت وی یی وینت، یو خو کَش کِښت. تَر وی یی چوښت اَت لوْدی: «تُت مِس عیسی یی ناصری قَتی ڤُد!»

⁶⁸پِطرس مُنکِر سُت اَت لوْدی: «وُز هچٿ وی نَوِزوْنُم اَت نَفأمُم تو ته چیز لوْڤی.» بعد از وی یو تَر دِڤی خېز توید اَت وی وَختَند چُښی مِس قیود.

⁶⁹یٲ کَنیزی ڤاگه وی وینت اَت خو همراه یېنَردی مِس لوْد: «یَم مِس ییو از وېڤ.»

⁷⁰پِطرس ڤاگه مُنکِر سُت. دوْندَٿ غَل نه نَږجید ات یِلأڤېن از وېڤ نَفَرېنېن پِطرسَرد لوْد: «تُت اُکمَندَٿ ییو از وېڤ، دِجأت از جَلیل اَت.»

⁷¹اَما یو یی قَسَم خود اَت لوْدی: «خُڎای چوْن وُز هچٿ دی نَفَر نَفأمُم تَمه ته چیز لوْڤېت.»

⁷²وی وَختَند ڤاگه یی چُښ قیود اَت پِطرس بَیاڎ ڎاد عیسی وِرد لوْڤج ڤُد: «نُر ښأب پِرا از دی ڎو پیڎ چُښ قیود تو ته اَره پیڎ لوْڤی: وُز وی نه فأمُم.» اَت پِطرس خو جوْن به دِلی نیود.