Read Shughni مرقس 15 Bible Online

مرقس 15 - Shughni bible

مرقس 15

¹وَختی سحرکی څه سُت غُلأ خَلیفه یېن اَت غُلأ یېن قَوم اَت مُلایېن یَهود شورا قَتی یېن تېزَٿ تَصمیم اَنجوڤد. وأڎېن عیسی ږِنځېل قَتی ڤوست اَت پیلاطُس، والی رومی مَنطِقه یَهودېن څه ڤُد، وِردېن وی سِپارت.

²پیلاطُس از وی پېښست: «پادښاه یی یَهودَتا؟» عیسی یی لوْد: «دِسگه یَست تو څه لوْڤی.»

³غُلأ خَلیفه یېنېن فَنٲ توْمَت وی تی چود.

⁴پیلاطُس ڤاگه یی از وی پېښست: «گأپ تُند نِستا؟ چِس څَرأنگ فَنٲ توْمَت تو تی کِنېن.»

⁵اَما عیسی یی یِچیزَٿ نَلوْد اَت پیلاطُس حَیرَت رېد.

⁶هر اَیوْم فِصَح یَند پیلاطُس مَردُم خُش تی یی از بَندی خوْنه ییو یېت چود.

⁷وی وَختَند یی چارِک نوْمدار بَنوْمی «باراباس» ڤُد. یو اِنقلابی ڤُد اَت ڎێد گَرېن قَتی یی ڎێدَند ییو زید خو وی یېن تَر بَندی خوْنه پِتێود.

⁸مَردُمېن تَر پیلاطُس خېز مُدوْم جِناو سَت اَت از وی یېن خواهِښ چود می کار وېڤَرد کِښت.

⁹پیلاطُس از وېڤ پېښست: «تَمه دِل یَهودېن پادښاه تَمَرد یېت کِنُما؟»

¹⁰دِجأت یو یی فأمت غُلأ خَلیفه یېنېن از خو بَغیتی عیسی سِپارت.

¹¹اَما غُلأ خَلیفه یېنېن از مَردُم تېز تېز چود تا از پیلاطُس خواهِښ کِنېن باراباس مَردُمَرد یېت کِښت.

¹²پیلاطُس ڤاگه یی لوْد: «تَمه لوْڤېت می یَهودېن پادښاه قَتی چیرُم؟»

¹³وأڎېن خَښَٿ لوْد: «وی پی صَلیب مېخ کِن!»

¹⁴پیلاطُس پېښست: «چیزَرد؟ یَمی چیر چوږج؟» اَما وأڎېن خَښدی قیود: «وی پی صَلیب مېخ کِن!»

¹⁵اَت پیلاطُس دِل ڤُد مَردُم از وی خُش ڤِد، باراباسی وېڤَرد یېت چود اَت امر ڎاد: «عیسی خُب بَشٲند قَمچی ڎېت اَت پی صَلیب وی مېخېت.»

¹⁶وی وَخت پیلاطُس عسکَرېنېن عیسی تَر قَصر والی یاد اَت فُکَٿ عسکَرېنېن مِس وی گَرگِنوښه جمع سَت.

¹⁷وأڎېن چَپأنی پادښاهی وِرد پِنوید اَت یی کأل بَندَکېن از شوڎ ویفت ات وی کأل تی یېن رِبود.

¹⁸اَت وِردېن مَسقَره گَری قَتی سَلوْمی ڎاد: «سَلوْم، اې یَهودېن پادښاه.»

¹⁹اَت ڎارگ قَتی یېن وی کألَرد ڎاد اَت وی پیڅَردېن تُفت. اَت وی پِراندی یېن چی زوْن خو ڎاد اَت حُرمَتېن چود.

²⁰وَختی وېڤ مَسقَره گَری خَلاص څه سُت وأڎېن چَپأنی پادښاهی از وی وېڎد اَت ڤاگه یېن وی لُقېنېن وِرد پِنوید اَت وی یېن تَر ڤَج یاد تا پی صَلیب وی مېخ ڎېن.

²¹اِسکَندر اَت روفُس تأت شَمعوْن ڤُد خو خُبَٿ از اهلی قَیرَووْن، از قِشلاق پی ښأر یَت. اَت وَختی وی جای ڤه چی نَږجید سُت وأڎېن وی تی ظُلمی چود اَت عیسی صَلیبېن وی تی ڎاد اَت یو یی وی یاد.

²²وأڎېن عیسی تَر یی جای اِدی وی نوْم «جُلجُتا» ات وی معنی «کاسه کأل» څه ڤُد، پَدأمېن وی یاد.

²³یی دَوا یَند وی نوْم مَر ڤُد اَت وأڎېن شَراب قَتی وی گَد چود اَت وِردېن وی دأرڎ جأت چی ڎێد سَت اَما یو یی وی نَچېمت.

²⁴بعد وی یېن صَلیب تی مېخ ڎاد اَت وی لُقېنېن خو مِڎېندَرد بأښ چود اَت وی لُقېن تی یېن قوره کَشی دَرَو سَت اَت لوْدېن کو چأی ته یێست.

²⁵سحرکی نَو بَجه ڤُد وی یېن پی صَلیب مېخ چود.

²⁶وی کأل تی یېن یی وَرَق تی وی اَعمال نوْمه نِڤِشت: «یَهودېن پادښاه.»

²⁷ڎو نَفَر دُزدېنېن مِس وی قَتی پی صَلیب مېخ سَت، ییو از وی خېز ڎُست اَت یِگه از چأپ وِرد ڤُد. [

²⁸اَت اِکوی مِغوندېن پَیغَمبَرېنېن څه نِڤِشت اِکوی تی سُت: «یو از گُناکارېن لوْڤج سُت.» آخِر اِکوی تی سُت.]

²⁹هر تأم یَم ڤه څه نَږجید خو کأل جُمبېنت اَت توعین قَتی یی تَر عیسی لوْد: «یِد اِکو یِدی خواهِښ څه چود خوْنه خُڎای وېروْن کِښت اَت اَره مېٿ تی ڤاگه وَم مازد،

³⁰شِچ از صَلیب اَر تَگاڤ یه اَت خو نِجات ڎه.»

³¹غُلأ خَلیفه یېن اَت مُلایېن یَهودېن مِس وی مَسقَره چود اَت تَر یَکدِگه یېن لوْد: «هچگه یېنی نِجات ڎاد اَما خو نِجات ڎێداو نڤأرڎېد.

³²کو مَسیح اِسرایل پادښاه، از صَلیب تی اَر تَگاڤ یه تا مأش وِنأم اَت تُرد اېموْن ڤأرأم.» اَت اِک وأڎېن وی قَتی پی صَلیب مېخ څه سَت وأڎېن مِس وی مَسقَره چود.

³³از مَڎار تا سه بَجه، فُکه جا اِکوی سَرزَمینی تارِکی اَنجوڤد.

³⁴سه بَجه ڤُد عیسی یی خَښَٿ لوْد: «اېلی، اېلی لَما سَبَقتَنی.» یعنی «مو خُڎای، مو خُڎای، چیزَردَت مو لأک چود؟»

³⁵وَختی یِلأڤېنېن یَمَند څه ڤَد دی یېن ښُد اَت لوْدېن: «چِسېت یو ته اِلیاس پَیغَمبَر قیود.»

³⁶ییو از وېڤ عسکَرېنی ژێښت اَت ڎارگ تی یی اِسفَنج خَښ چود خو اَر شَراب سِرکه یی وی ڎاد اَت وِردی دأک چود تا یو بِرێزد. اَت لوْدی: «لأکېت چِسأم اِلیاس پَیغَمبَر ته یاڎد اَت وی اَر تَگاڤ خَمبېنت.»

³⁷عیسی یی خَښَٿ قیود اَت وی جوْن نَښتوید.

³⁸پَرڎٲ یِدی خوْنه خُڎای یَند څه ڤُد از تیر تا تَگاڤ څُغ سُت.

³⁹یَمَند یی مَنصَب دار رومی عیسی بَراست وِروڤجِن څه ڤُد وینتی یو څَرأنگ مود، اَت لوْدی: «به راستی یِد چارِک خُڎای پُڅ ڤُد.»

⁴⁰یَمَندېن یِلأڤ ږِنِکېن مِس ڤَد از ڎَرَندېن چوښت. اَت وېڤ قاتَرد مَریَم مَجدِلیه اَت مَریَم، ځُلک یعقوب اَت یوشا نأن اَت سالومه یَمَندېن ڤَد.

⁴¹وَختی عیسی تَر مَنطِقه یی جَلیل څه ڤَد مأڎ ږِنِکېنېن از وی پَیرَوی چود اَت وِردېن یاردَم فِرێپت. فَنٲ از هچگه ږِنِکېنېن وی قَتی پی اورشلیم څه یَت وأڎېن مِس یَمَند ڤَد.

⁴²خیر نیست وَم مېٿ خو فُکَٿ تَیاری یېن اَنجوڤد دوْنجٲت وی سحرکی شَنبه مېٿ ڤُد وېڤَند رُخصَتی سُت اَت وَم شَنبه مېٿَندېن هچٿ کار نَچود.

⁴³یوسِف از اهلی رامه ییو از اَعضای محتَرَم شورای یَهود څه ڤُد یو مُنتَظِر ظُهور چیداو خُڎای پادښاهی ڤُد. به جراعت تَر پیلاطُس خېز سُت اَت عیسی مُرڎه یی از وی تِلأپت.

⁴⁴پیلاطُس باوَر نَچود عیسی دِس جألدَٿ مود. بعدی یو مَنصَب دارَرد مامور صَلیب چیداوی عیسی څه ڤُد وی یی قیود اَت از وی یی پېښست: «یو دِس جألد مودا؟»

⁴⁵وَختی پیلاطُس از مَنصَب دار ښُد یو موږج وی دِل پُر سُت اَت اِجازه ڎاد یوسِف وی جِنازه یێست.

⁴⁶یوسِفی، عیسی مُرڎه جأت تافته خَریت چود اَت وی یی اَزَم تی خَمبېنت خو وی قاتَندی وی ڎاد. اَت یی قأبر بای جِناو کوه تی از ژیر تېښچِن څه ڤُد وی یی اَرَم وېڎد اَت وَم ژیری وی قأبر غێڤ تی رِبود.

⁴⁷مَریَم مَجدِلیه اَت مَریَم یوشا نأنېن وینت عیسی مُرڎه یېن اَر کأ لأک چود.