Read Shughni مرقس 16 Bible Online

مرقس 16 - Shughni bible

مرقس 16

¹وَختی شَنبه مېٿ څه نَږجأد مَریَم مَجدِلیه، مَریَم یعقوب نأن اَت سالومه مَساله یِدی وَمَند بَشٲند دُخ څه ڤُد خَریتېن چود تا سېن عیسی تَنٲ تی وی رِبیېن.

²اَت سحرکی یَکشَنبی مېٿ، وَختَٿېن اَنداید خو پِرا از خیر پَلېن تَر وی قأبر سَت.

³وأڎېن تَر یَکدِگه لوْد: «چأی ته وَم ژیر مأشَرد از وی قأبر غێڤ تی زێزد؟»

⁴وَختی خُبَٿېن وینت یٲ غُلأ یَکی ژیر از وی قأبر غێڤ تی تَر پألی سِڅ

⁵اَت وأڎېن تَر قأبر دَرون دېد تَرَمېن یی جَووْن چارِک وینت از خېز طَرَف نوسچِن ڤُد اَت سَفېد دَرازَکی لُقېن وی پی تَنٲ ڤُد. اَت وأڎېن ښاج ڎوید.

⁶اَما یو یی وېڤَرد لوْد: «ښاج مأڎێرېت، تَمه ته عیسی ناصری ښِکَرېتا یو پی صَلیب مېخ څه سُت؟ یو ڤاگه زِنده سُت اَت هچگه یوْدَند نِست. چِسېت یوْدَندېن وی رِبود.

⁷شِچ سېت اَت وی اَصحابېنَرد اَت خُصوصاً پِطرسَرد لوْڤېت: یو ته پِرا از تَمه تَر مَنطِقه یی جَلیل سوْد اَت اِکوی جِناوی خُبَٿ تَمَرد څه لوْد وی ته تَرَم وِنېت.»

⁸وأڎېن از قأبرَند حَیروْن اَت لَږزه تی نَښتاید اَت اَزَمَندېن رِڅاست. اَت یی چِردېن یِچیزَٿ نَلوْد دِجأت از ښاجېن ریږزد اَت حَیروْنېن رېد.

⁹[عیسی یی بعد از خو زِنده سِتاو سحرکی یَکشَنبی مېٿ پِرا از فُکَٿ، مَریَم مَجدِلیه را خو دِڤِښت. یو یی ووڤد جِنیات پِرا از خو میداو از وَم زِواست.

¹⁰وی ښاگِردېنېن لَپ قین ڤَد اَت نیودېن مَریَم سَت اَت می خَبَر وېڤَرد ڎاد.

¹¹اَما وأڎېن باوَر نَچود عیسی ڤاگه زِنده سُڎج اَت مَریَمَردی خو دِڤِښت.

¹²وَختی ڎُیوْن از وی ښاگِردېنېن تَر قِشلاق څه تاید عیسی یی وېڤَرد خو یی یِگه چِهره تی وېڤَرد دِڤِښت.

¹³وأڎېن پَس گَښت اَت هچگه یېنَردېن لوْد، اَما وأڎېن وېڤ گأپ باوَر نَچود.

¹⁴وی یازده ښاگِردېنېن دَستارخوْن ته نیسڅِن څه ڤَد، عیسی یی وېڤَرد خو دِڤِښت. از وی زِنده سِتاو وېڤَند باوَرَښ څه نَڤُد وېڤېڅ دَرَو لوْڤد سُت

¹⁵اَت وېڤَردی لوْد: «فُکَٿ دِنیا ناږېت اَت می خُش خَبَری فُکَٿَرد لوْڤېت.

¹⁶هر تأم اېموْن څه ڤیرت اَت غوْط ڎاڎج څه سوْد نِجات ته ڤِرېد. اَما هر تأم اېموْن څه نَڤیرت یو ته خُڎای خېز مُدوْم خو جِزا وینت.

¹⁷هر تأم مُرد اېموْن څه ڤیرت وی نِښوْنېن دِسگه: مو نوْم لوْڤداو قَتی ته جِنیات زِوێڎد اَت هر زَبان قَتی ته ڤأرڎید گأپ ڎید

¹⁸اَت اَگه دِڤوسکېن څه اَنجېن یا زأر څه خېن وېڤَرد ته نُقص نَسوْد اَت خو ڎُست ناجورېن تی څه رِبی یېن وأڎ ته شِفا ڤری یېن.»

¹⁹مأش بادار عیسی مَسیح یی خو گأپېن خَلاص څه چود، پی خُڎای خېز پی آسموْن یاڎج سُت اَت خُڎای یَند از وی خېز طَرَف نوست.

²⁰اَت وی ښاگِردېنېن تاید اَت فُکه جایېن خُش خَبَری وعظ چود. اَت خُڎای وېڤ کارېنَرد بَرَکَت ڎاد اَت وېڤ مویده خایی مُجزه یېن قَتی راست دِڤِښت.]