Read Shughni مرقس 2 Bible Online

مرقس 2 - Shughni bible

مرقس 2

¹څوْند مېٿ نَږجأد ات عیسی ڤاگه تَر قَریه یی کَپِرناحوم یَت اَت مَردُمېنېن فأمت یو تَر چید.

²لَپ مَردُمېنېن یَمَند جمع سَت، دِسگه اِدی وی چید دِڤی یَند هَچَٿ جای نَڤُد. اَت عیسی یی وېڤَرد مویده خایی خُڎای وعظ چود.

³څَڤار نَفَرېن یی شیل چارِک زاښت اَت تَر وی خېزېن ڤود.

⁴اَما دوْندَرد بیروبار ڤُد وأڎ وی هَمرایېنېن نَڤأرڎاد وی تَر عیسی خېز ویڎېن. عیسی تَر وی چید څه ڤُد دوْند جایېن وی چید دِشید پَت چود اَت وی شیل چارِکېن بالَښ قتی هر وی خېز وېڎد.

⁵اَت وَختی عیسی یی وېڤ اېموْن څه وینت وی شیل چارِکَردی لوْد: «اې جوْن، تو گُناه یېنېن تُرد بَښخِښ سَت.»

⁶څوْند نَفَرېن از مُلایېن یَهود یَمَند نیسڅِنېن ڤَد ات تَر خو ېن لوْد:

⁷«یِد کافِر چیزَرد دِسگه لوْڤد؟ بَغَیر از خُڎای ته یِچأیَٿ نَڤأرڎید گُناه بَښخِښ کِښت.»

⁸عیسی روح تېزَٿ فأمت چیز چُرت وېڤ زارڎَند. اَت وېڤَرد لوْد: «چیزَرد دِسگه چُرتېن خو زارڎَند جای ڎېت؟

⁹اِکدِسگه آسوْندی نِس نه څه لوْم: تو گُناه یېن بَښخِښ سَت، دِجٲت یی چأی ته نَوینت سَتېن یا نَسَتېن. اَت یِد مُښکِل دی څه لوْم: اَندِځ ات خو بالَښ زی خو سه تویدَت، دِجٲت فُکَٿ ته وِنېت.

¹⁰اَما وُز ته تَمَرد دِڤېسُم آدَم پُڅَند اَر زِمأڎ قُدرَت اَت اِختیاری بَښخِښ گُنایېن یَست.» تأمی عیسی وی شیل چارِکَرد لوْد:

¹¹«تُرد ته لوْم: اَندِځ خو بالَښ زی خو سه تَر خو چید.»

¹²یو اَندوید اَت تېزَٿی خو بالَښ زاښت اَت فُکَٿ څېمېن پِراندی نَښتوید. فُکَٿ مَردُمېنېن لَپ حَیرَت رېد اَت خُڎایَردېن شُکرَت چود اَت لوْدېن: «مأشأم تا شِچېڅ غَل دِسگه هَچَٿ نه وینچ.»

¹³ڤاگه عیسی تَر جَلیل قوْل لأڤ توید، ات مَردُمېنېن تَر وی خېز یَت اَت یو وېڤَرد تعلیم دَرَو ڎێد سُت.

¹⁴اَت وَختی څه توید لاوی حَلفی پُڅی وینت اِدی تَر جای اِدی مالیه یېن څه زاښت یَمَند نوسچِن ڤُد اَت عیسی یی وِرد لوْد: «مو ڎأم تی یه.» لاوی اَندوید اَت وی ڎأم تی توید.

¹⁵بعد عیسی تَر لاوی چید دَستارخوْن تی نوسچِن څه ڤُد فَنٲ از مالیه گیرېن اَت گُناکارېن وی اَصحابېن قَتی گَرڎٲ خود، دی جأت لَپ از وېڤېن وی پَیرَووْن ڤَد.

¹⁶وَختی یِلأڤ از مُلایېن شَریعت فِریسی یېنېن څه ڤَد وی یېن وینت مالیه گیرېن اَت گُناکارېن قَتی خُراک خیرت از عیسی اَصحابېنېن پېښست: «چیزَرد یو مالیه گیرېن اَت گُناکارېن قَتی خُراک خیرت؟»

¹⁷عیسی یی وېڤ گأپ ښُد اَت وېڤَردی لوْد: «هر تأم خُب څه ڤِد وِرد طَبیب دَر کار نِست، اَما ناجورېنَرد طَبیب دَر کار. وُزُم یَٿچ تا گُناکارېن دعوَت کِنُم تا راه راستی تی تیېن، نه بې گُناه یېن.»

¹⁸یی وَخت یحیی ښاگِردېن اَت پَیرَوېن فِرقه یی فِریسی ېن روزه ېن څه ڤَد، یِلأڤېنېن تَر عیسی خېز یَت اَت پِښستېن: «چیزَرد یحیی ښاگِردېن اَت پَیرووْنی فِرقه فِریسی روزه اَنجېن، اَت تو ښاگِردېن روزه نه اَنجېن؟»

¹⁹عیسی یی وېڤَرد لوْد: «ڤأرڎی یېت ښوْنچی رَفیقېنَرد وَختی خُشَندی لوْڤېت تَمه روزه اَنجېت؟ نأی، تا وَختی یِدی ښوْنچی وېڤ قَتی څه وأڎ ته نَڤأرڎېن روزه اَنجېن.

²⁰اَما یی وَخت ته یاڎد اِدی ښوْنچی ته از وېڤ پَرجوڤج سوْد، اَت اِکوی وَخت ته وأڎ ڤأرڎیېن روزه اَنجېن.

²¹یی چأی ته کوْنه لُق تی نَو پِسون نه ڎید. اَگه دِسگه څه کِښت یو پِسون ته تَر پألی سوْد. ات وی جای ته غُلأ دی اَت بَتَردی سوْد.

²²اَت یی چأی ته تازه اَنگورڎ ښُڅ اَر کوْنه مَشکوله خالی نه کِښت. اَگه دِسگه څه کِښت اَنگورڎ ښُڅ ته مَشکوله ښِچېفت اَت مَشکوله اَت اَنگورڎ ښُڅ ته ڤأرٿ از بَین تیېن. تازه اَنگورڎ ښُڅ اَر نَو مَشکوله حُکمَندَٿ خالی کِښت.»

²³اَت شَنبه مېٿ عیسی ژِندَم ڤه نَږجید اَت وی ښاگِردېنېن وی دأم تی پوْند تاید اَت راږځېن دَرَو پِتِد سَت.

²⁴فِریسېنېن وِرد لوْد: «چِس، تو ښاگِردېن بَر ضِدی مأش مَذهَب کار کِنېن، شَنبه مېٿَند کار خُب نِست.»

²⁵عیسی یی لوْد: «تَمه یېت کِتابی آسموْنی یَند نَښێیجا، وَختی داود پادښاه اَت وی رَفیقېنېن مَږځوْنج څه رېد یو یی چیر چود؟

²⁶وَخت اِدی اَبیاتَر غُلأ خَلیفه څه ڤُد، تَر خوْنه خُڎای دېد اَت گَرڎٲ یِدی بَنوْمی خُڎای څه ڤُد یو یی وی خود، اَما وی وَختَند بَغَیر از وېڤ خَلیفه یېنَند یِچِردَٿ اِجازه یی خیداو نَڤُد، اَما یو یی خود اَت خو همرایېنَرد مِس ڎاد.»

²⁷اَت وېڤَردی لوْد: «خُڎای مَردُم فایدٲ جأت امر چوږج شَنبه مېٿ بایَد کار مأکېت، اَت مېٿ فایدٲ جأت نَی.

²⁸اَت دِجأت اِنسوْن پُڅ صاحب اِختیار شَنبه مېٿ یَست.»