Read Shughni مرقس 3 Bible Online

مرقس 3 - Shughni bible

مرقس 3

¹عیسی ڤاگه تَر عبادَتگاه یَهودېن توید. تَرَم یی چارِک ڤُد ات وی ڎُست خُښک ڤُد.

²پَیرَووْن فِرقه یی فِریسی یېن تَر عیسی چوښت، کو یو ته شَنبه مېٿند وی چارِک شِفا ڎید یا نَی تا بَر ضِدی وی یی توْمَت پېڎا کِنېن.

³عیسی یی وی چارِک خُښک ڎُستَرد لوْد: «یه مأش مِڎېندَرد نِٿ.»

⁴اَت وېڤَردی لوْد: «شَنبه مېٿَند چِدوْم کار بیدی، بَشأندی یا آلَکی؟ نِجات ڎێداو یا زیداو؟» وأڎېن قَرار ڤَد.

⁵عیسی قأر سِفید اَت تَر وېڤ چوښت، دِچأت وأڎېن لَپ سَر سَخت ڤَد اَت از دی یېن قَبول نَچود. اَت وی خُښک ڎُست چارِک تی یی امر چود: «خو ڎُست اَٿێر.» یویی خو ڎُست اَٿێرت اَت پِراکی مِغوند وی ڎُست خُب سُت.

⁶فِریسیېن تېزَٿ اَزَمَند نَښتاید اَت سِتېن اَر طَرَفدارېنی هیرودیس پادښاه خېز تا وېڤ قَتی نَقشه تأژېن څَرأنگ عیسی زینېن.

⁷عیسی خو ښاگِردېن قَتی تَر جَلیل قوْل لأڤ توید. اَت فَنٲ مَردُمېنېن وی دأم تی تاید. فُکَٿ از مَنطِقه یېن جَلیل اَت یَهودیه

⁸اَت از ښأری اورشلیم اَت از مَنطِقه اِدومیه اَت از وی طَرَف دَریای اُردُن اَت از ښأرېن صور اَت صَیدونېن یَٿچ ڤَد. اِکِد دأڎ مَردُمېنېن از وی کارېن ښُڎج اَت یَٿچېن تا وِنېن وی.

⁹دِس لَپ مَردُم ڤُد اَت یو یی از دَستی مَردُم وُڅتاو نَڤأرڎاد اَت دِجأتی تَر خو ښاگِردېن لوْد: «کِشتی تَیار کِنېت تا از مَردُم ڎَر دی ڤیم.»

¹⁰وَم مېٿَند فَنٲ مَردُمېنی شِفا ڎاڎج سُت اَت وأڎېن لَپ دی تَر عیسی خېز بَرغه ڎێدک چود اَت تَر وی دی یېن سَت تا وی لُق څێپېن اَت شِفا ڤِریېن.

¹¹وَختی وایمه دارېنېن وی څه وینت وی پِرایَردېن وێښت اَت از وی وایمه دار دَرونَند صَدای وأغَست نَښتوید: «تُت خُڎای پُڅ.»

¹²عیسی یی وېڤ جِنیات تی امر چود دی یِچِرد مأ لوْڤېن.

¹³بعد از وی عیسی پی کوه تیر سِفید اَت وېڤ خو ښاگِردېنی پی خو خېزی تِلأپت. اَت وأڎېن پی وی خېز سِفأد.

¹⁴یویی دوازده اَصحاب خُرد څه سرُد تا وی خېزَند ڤیېن اَت وېڤی باښت تا وأڎ وعظ کِنېن

¹⁵اَت وېڤَند اِکِد قُدرَت زِوێستاو جِنیات مِس ڤَد.

¹⁶دوازده اَصحاب خُرد څه سرُد وأڎېن ڤَد: شَمعوْن اِدی عیسی وی پِطرس نوْم ڎاد،

¹⁷یعقوب زَبَدی پُڅ اَت وی ڤِراد یوحنا یِدی وېڤَردی «بوانیرگِس» نوْم څه ڎاد دی یعنی باغَیرَت.

¹⁸اَت اَندریاس اَت فیلیپُس اَت بَرتولما اَت مَتی اَت توما اَت یعقوب حَلفی پُڅ اَت تَدی اَت شَمعوْن فِدایی،

¹⁹اَت یَهودای اِسخِریوطی یِدی پَسوْنی از عیسی څه سِپارت تا وی زینېن.

²⁰عیسی اَت وی ښاگِردېنېن تَر چید تاید. وأڎېن نَڤأرڎاد خُراک خېن دِجأت لَپ مَردُم تَر وی خېز جمع ڤُد.

²¹وَختی وی جَمعتېنېن څه ښُد، یَتېن تا عیسی خو قَتی یاسېن، دِجأت یِلأڤېنېن لوْد: «یو ڎېوِن سُڎج.»

²²مُلایېن یَهودېن از اورشلیم یَٿچِن څه ڤَد از عیسی یېن لوْد: «یِد شَیطوْن وېڤ جِنیاتَند رَیس. اَت شَیطوْنی دی دَرونی جای اَنجوڤج اَت دِجأت یو ته ڤأرڎید شَیطوْن قُدرَت قَتی از مَردُم وایمه دار وېڤ جِنیات زِوێڎد.»

²³بعد عیسی از مَردُم خواهِښ چود تَر وی خېز یَدېن اَت وېڤَرد مَتَلېن ڤود اَت لوْدی: «شَیطوْن ته نه ڤأرڎید خو لِښکَر زِوێڎد،

²⁴دِجأت اَگه یی حُکومَت ته بأښ څه سوْد اُکمَندَٿ ته وَیروْن سوْد.

²⁵اَت اَگه جَمعت دَرون نِفاق څه واښت وأڎ جَمعتېن ته نه ڤأرڎیېن تِفاق ڤیېن.

²⁶اَگه شَیطوْن خو حُکومَت وَیروْن څه کِښت حُکمَندَٿ ته یی تَفرِقه واښت، اَت هچگه ته نه ڤأرڎېن دَووْم کِنېن اَت وی پادښاهی ته به آخِر فِراپت.

²⁷یی چأی ته نه ڤأرڎید تَر یی زوراوَر چارِک چید دېڎد اَت وی کاچار څِفت. سَرپِرا ته وی ڤیست ات تأم ته وی کاچار یێست.

²⁸بَراستی تَمَرد لوْم هر رأنگأج گُناه اَت کُفری اِنسوْن مُرتَکِب سُڎجِن څه ڤِد یو ته بَښخِښ سوْد.

²⁹اَما هر چٲی خُڎای روح اَرد کُفری څه لوْڤد هچٿ ته وِرد بَښخِښ نَسوْد نه تَر مَم دِنیا اَت نه اَر آخِرَت.»

³⁰عیسی یی مَم گٲپ ڎاد دی جأت یِلأڤېنېن لوْد: «پی دی جِن یار.»

³¹عیسی نأن اَت ڤِرادأرېن یَت اَت تَر دَرگاه یېن ناست. اَت وی یېن تِلأپت تَر وېڤ خېز نَښتیزد.

³²لَپ مَردُمېنېن وی گَرگِنوښه نیسڅِن ڤَد اَت وِردېن لوْد: «تو نأن اَت ڤِرادأر اَت تو یَخځِنېنېن تَر ڤَج وِریڤځِن اَت تو تِلأبېن.»

³³عیسی جَواب وېڤَرد دِسگه ڤُد: «چِدوْم رَقَم مَردُمېن ته وُز خو نأن اَت ڤِرادأرېن لوْڤُم؟»

³⁴اَت اِک وأڎېن وی گَرگِنوښه نیسڅِن څه ڤَد تَر وېڤی چوښت اَت لوْدی: «مأڎېن مو نأن اَت مو ڤِرادأر.

³⁵هر تأم اِراده خُڎای تی ته څه کِښت مُند یو مو یَخ اَت مو نأن اَت مو ڤِراد.»