Read Shughni مرقس 4 Bible Online

مرقس 4 - Shughni bible

مرقس 4

¹عیسی ڤاگه جَلیل قوْل لأڤ ڤه مَردُمَرد دَرَو تعلیم سُت. لَپ مَردُمېنېن وی گَرگِنوښه جمع سَت، اَت یو دِس پی جوْنَک سُت کِښتی یِدی اَر ښَڅ څه ڤَد وَم تی سَوار سُت. مَردُمېنېن جَلیل قوْل لأڤ ڤه وِریڤځِنېن څه ڤَد.

²اَت یو یی لَپ مَتَلېن قَتی وېڤَرد تعلیم ڎاد. اَت تعلیم قَتی یی وېڤَرد لوْد:

³«نِغوْږېت، دِهقوْن توْغم وېڎداو جأت تَر زِمڅ توید.

⁴وَختی توْغمېن دَرَو وېڎد څه ڤُد یِلأڤ از وېڤېن پوْندَرد وێښت اَت وِڎِچېنېن یَت اَت وېڤېن خود.

⁵اَت یِلأڤ از وېڤ توْغمېنېن ښایستینَرد وێښت دوْنجٲت سِت وېڤ تی نه ڤُد، جألدَٿېن نَښتاید.

⁶اَما وَختی کَش کَش خیر وېڤ تی پَل څه چود وأڎېن فُکَٿ ٿُد دوْنجٲت وېڤَند وِیێش نَڤُد اَت جألدَٿېن قاق سَت.

⁷یِلأڤ از وېڤ توْغمېن شوڎ مِڎېنَرد وێښت اَت شوڎېنېن قأد چود اَت وېڤ تَرَکېنېن خو پی بیر ڎاد اَت وېڤ تَرَکېنېنی قأد چیداو نه لأک چود.

⁸اَت یِلأڤ از وېڤ توْغمېنېن بَشٲند سِت دَرون وێښت اَت سأڤځېن چود. اَت قأدېن چود اَت بأرېن ڎاد اَت وېڤ حاصِل سی بَرابَر شَصت بَرابَر اَت صَد بَرابَر ڤُد.»

⁹اَت عیسی لوْد: «هر چِند وی غوْږ څه ښینت خُب بَشٲند خو وُښ اَنجیڤد.»

¹⁰وَختی عیسی طاقَٿ څه رېد، هر تأم وی گَرگِنوښه جمع څه ڤُد وېڤ دوازده اَصحاب قَتی معنای مېڤ مَتَلېن از وی پېښست.

¹¹یو یی جَواب ڎاد: «تا شِچېڅ فأمتاو رازی خُڎای پادښاهی از تَمه پِنهوْن ڤُد اَما شِچ خُڎای تَمَرد وی دأک چوږج. اَت هچگه یېنَرد ته مَتَل جِناو لوْڤج سوْد.

¹²یِد یی پېښبینی یی پَیغَمبَر ڤُد اَت اِک دی تی عَمَل سُت: «چِسېن اَت یِچیزَٿ مأوِنېن، رَد به رَد ښِنېن اَت یِچیزَٿ مأفأمېن، دِجأت اَگه څه ښِنېن اَت څه وِنېن پی خُڎای خېز ته گأرڎېن اَت بَښخِښ ته سېن.»»

¹³پَسوْنی عیسی وېڤَرد لوْد: «اَگه تَمه اِکمی معنی مَتَل څه نَفأمېت، هچگه مَتَلېن ته څَرأنگ فأمېت؟

¹⁴دِهقوْن ته کَلوْم خُڎای توْغم جِناو پَخش کِښت،

¹⁵توْغمېن اِدی پوْندَرد څه واښېن اِک وېڤ مَردُمېن جِناو اِدی کَلوْم خُڎای څه ښِنېن اَت کَلوْم اِدی وېڤ زارڎَند جای څه اَنجَفست شَیطوْن ته تېزَٿ یاڎد اَت وی کَلوْم ته از وېڤ زارڎَند زێزد.

¹⁶توْغمېن اِدی ښایستینَرد څه واښېن، اِک وېڤ مَردُمېن جِناو اِدی کَلوْم خُڎای ته خو خُشی تی قَبول څه کِنېن

¹⁷اَما کَلوْم ته وېڤ زارڎَند وِیێش نه اَنجیڤد اَت دَووْم دار ته نه رِست. وَختی کَلوْم خُڎای جأت یی زَحمَت څه وِنېن جَلدَٿ از کَلوْمی خُڎای خو پیڅ گَرڎېنېن.

¹⁸وأڎ توْغمېن اِدی شوڎ مِڎېندَرد څه وێښت اِک وېڤ مَردُمېن جِناو اِدی کَلوْم خُڎای ته ښِنېن

¹⁹اَما هر چیز تَشویش ته کِنېن اَت مال ژیوج کِنېن اَت هَوا اَت هَوَس اَت هچگه چیزېن ته هر وی زارڎ دېڎد اَت دِسگه ته کَلوْم خُڎای خَفک سوْد ات وی ته بې ثَمَر کِنېن.

²⁰اَت توْغمَندی بَشٲند سِتَند څه واښېن اِک وېڤ مَردُمېن جِناو اِدی کَلوْم څه ښِنېن اَت از وی ته اِستِقبال کِنېن اَت سی بَرابَر اَت شَصت بَرابَر اَت صَد بَرابَر ته خو زِنده‌گی یَند بأرٲ ڎېن.»

²¹عیسی یی وېڤَرد لوْد «یی چأی ته څِراو ڤیرت خو وَم تأس یا تأخت پِبیر رِبیزدا؟ نأی، وَم ته ڤیرت خو چِراغ پایه تی رِبیزد.

²²هر چیز جای چوږج څه ڤِد آخِر ته آښکار سوْد اَت هر چیز پوښیده څه ڤِد از وی پیڅ تی ته پَرڎه زاښچ سوْد.

²³هر چِند وی غوْږ ښِنیج څه ڤِد ښِنېت.»

²⁴عیسی یی وېڤَرد لوْد: «هر چیز څه ښِنېت بَشٲند خو وُښ اَنجېت دِجأت ښِداوی کَلوْمی خُڎای دِسگه: هر څوْند څه ښِنېت به وی اَندازه ته وِزوْنېت.

²⁵هر چِند فأمچازی څه یَست وِرد ته بېښدی دأک چوږج سوْد اَت هر چِند فأمچازی څه نَڤِد اَت دوْندِکَٿ مِس وَمَند څه ڤِد از وی ته پَرجوڤج سوْد.»

²⁶عیسی یی لوْد: «خُڎای پادښاهی چارِک جِناو اِدی خو زِمڅېنَرد توْغم څه ږیپت.

²⁷اَگه ښأب تَر خوڎم ڤِد یا مېٿِن اَگأ، یو توْغم ته خُبَٿ سأڤځ سوْد اَت روْی ته ڎید، یِد څَرأنگ؟ یو ته نه وِزېنت.

²⁸زِمأڎ ته خُبَٿ خو تَیار کِښت ته روْی ڎېد اَت بأره ته ڎید. سَر پِرا ته سأڤځ کِښت بعد ته راږځ سوْد اَت راږځ دَرون ته کَښت سوْد.

²⁹وَختی څاوَرد څه فِراپت یو ته خو ڎێرڤ زێزد اَت پی کار ته سوْد، دِجأت وَختی څاو فِریپچ.»

³⁰عیسی یی لوْد: «خُڎای پادښاهی ته مأش چیز جِناو وِزوْنأم؟ اَت چِدوْم مَتَل جِناو وی تَمَرد لوْم؟

³¹خُڎای پادښاهی لأتاک توْغم جِناو اِدی اَر زِمأڎ وېڎج څه سوْد. زِمأڎ تی لأتاک توْغم از هچگه توْغمېن سَر ځُلک،

³²اَما وَختی وېڎج څه سوْد از فُکَٿ بُته یېن باغَند یو غُلأ دی سوْد اَت وِڎِچېن ته وی سایأندی خُرد یێٿ مازېن.»

³³عیسی یی لَپ مَتَلېن قَتی وېڤَرد فأموْنت تا اَندازه یِدی څه ڤأرېن ڎاد فأمېن.

³⁴یو یی بَغَیر از مَتَلېن مَردُمَرد یی چیزَٿ گه نه لوْد، اَت وَختی طاقٲ خو ښاگِردېن قَتی څه رېد وېڤَردی فُک چیز لوْد.

³⁵یِد مېٿ ڤېگَکی سُت ات عیسی یی خو ښاگِردېنَرد لوْد: «تَر وی رویه جَلیل قوْل سأوأم.»

³⁶وأڎېن وېڤ مَردُمېن لأک چود اَت اِکوَم کِښتی قَتی یِدی اَر وَم یو نوسچِن څه ڤُد یادېن اَت هچگه کِښتی یېنېن مِس خو قَتی یاد.

³⁷طوفوْن لَپ خَښ اَندوید اَت جوْښ پی کِښتی ڎاد اَت وېڤ کِښتی آسته، آسته از ښَڅ لَپ سَت.

³⁸عیسی از کِښتی زِبا یی خو کأل تَکیه تی رِبوږج اَت ښاڤجِن ڤُد. اَگأیېن وی چود اَت وِردېن لوْد: «اې اُستاد، تُت هچٿ مأش قِصه ندی نِستا؟ نَزدیک اِدی غَرق سأوأم!»

³⁹یو تېزَٿ اَندوید اَت ښوځ اَت ښَڅ تی یی امر چود: «قَرار اَت آروْم سېت.» ښوځ اَت ښَڅ ېن قَرار چود اَت یِد آروْمی یی فُکه جای اَنجوڤد.

⁴⁰بعد عیسی یی وېڤَرد لوْد: «چیزَردېت دِس ښاج ڎوید؟ تَمَند غَلَٿ اېموْن نِستا؟»

⁴¹وأڎېن لَپ خَښ ښاج ڎوید اَت تَر یَکدِگه یېن لوْد: «یَم چأی یِدی ښوځ اَت ښَڅ مِس از می اِطاعت څه کِنېن؟»