Read Shughni مرقس 5 Bible Online

مرقس 5 - Shughni bible

مرقس 5

¹عیسی اَت وی ښاگِردېنېن تَر وی رویه جَلیل قوْل، تَر سَرزَمین جَدَریوْن تاید.

²یوْدَندی عیسی خو پاڎ قاقی تی رِبود اَت چارِک اِدی وایمه دار څه ڤُد از قأبرېن تی اَندوید اَت تَر وی خېز یَت.

³یو یی قأبرېن بَینَرد زِنده‌گی چود اَت یی چأی یی نَڤأرڎاد ږِنځېل قَتی وی اَنجیڤد.

⁴مُدوْمېن وی ږِنځېل قَتی ڤیست، اَما یو یی وېڤ ږِنځېلېن زِدُښت اَت یی چأی یی نَڤأرڎاد وی آروْم کِښت.

⁵یو ښأب اَت مېٿ قأبرېن اَت بُقېنَردی نێږد اَت مُدوْم قیود اَت خو یی ژیر قَتی زَخمی چود.

⁶وَختی عیسی یی از ڎَرَند څه وینت، تَر وی خېزی ژێښت ات وی بَراستی خو کأل خَمبېنت.

⁷اَت خُب خَښی قیود: «اې عیسی روح الله خُڎای متعال پُڅ، تُند پی مو چیر؟ تو وِزوْنت خُڎای عذاب مو مأ ڎه.»

⁸دِجأت عیسی پِگادی وِرد لوْڤج ڤُد: «اې جِنیات از می چارِک نَښتی.»

⁹عیسی یی از وی پېښست: «تو نوْم چیز؟» یویی لوْد: «مو نوْم «لِښکَر»، دوْند جأت مأشأم لَپ.»

¹⁰اَت وأڎ جِنیاتېن عیسی ره لَپ زارگی چود اِک از وی جایَند ڎَر دی وېڤ مأ بېزد.

¹¹اَت وی وَختَند یی گِلأ یی خوگ یَمَند ڤُد وېڤ بُقېنَردېن چَرا چود.

¹²جِنیات وِرد زارگی چود اَت لوْدېن: «مأش اَر خوگېن دَرون باز تا پی وېڤ یار سأوُم.»

¹³عیسی یی وېڤَرد اِجازه ڎاد اَت جِنیاتېن از وی چارِک نَښتاید اَت پی خوگېنېن یار سَت اَت رَمه یِدی تقریبٲ دو هَزار خوگېن څه ڤَد ژێښتېن از تیر اَر تَگاڤ جَلیل قوْلېن وێښت اَت غَرقېن سَت.

¹⁴خوگ بوْنېنېن رِڅاست اَت اِک دی کارېن تَر ښأر اَت ښأر گَرگِنوښه یېن مِس لوْد. مَردُمېنېن از ښأر نَښتاید تا هر چیز څه سُڎج وی وِنېن.

¹⁵وأڎېن عیسی خېز یَت اَت وی چارِکېن وینت، وِند جِنیات څه ڤُد، پوښاک پِنویج اَت عقلی سالِم قَتی یَمَند نوسچِن ڤُد ات وأڎېن لَپ ښاجېن از وی ڎوید.

¹⁶مَردُمېنېن یَمَند شاهِد اِکدی کارېن څه ڤَد، هر چیز اِدی وایمه دار چارِکَرد اَت خوگېنَرد سُڎج څه ڤُد مَردُمَردېن لوْد.

¹⁷اَت اِکِد مَردُمی از عیسی خواهِښ چود از وېڤ جایَند نَښتیزد.

¹⁸وَختی عیسی اَر کِښتی سَوار څه سُت یو پِراکی چارِک وایمه دار څه ڤُد، از عیسی یی خواهِښ چود تا اِجازه ڎید وی قَتی تیزد.

¹⁹اَما عیسی یی وی خو قَتی نه لأک چود اَت وِردی لوْد: «تَر خو چید جَمعت خېز سه اَت هر چیز اِدی خُڎای دَر حَق تو یی څه چود وېڤَرد نَقلی کی دِجأت خُڎای تو تی رحم چود.»

²⁰یو چارِک توید اَت هر چیز عیسی وِرد څه چود تَر مَنطِقه دِکاپولِس دی تِخیرم چود اَت فُکَٿ مَردُمېنېن حَیرَت رېد.

²¹وَختی عیسی ڤاگه کِښتی قَتی تَر وی رویه جَلیل قوْل څه توید، فَنٲ مَردُم جَلیل قوْل لأڤ ڤه عیسی گَرگِنوښه جمع سَت.

²²تَرَم یی عبادَتگاه یَهودېن ڤُد اَت وی سَرپَرَست نوْم یایروس ڤُد اَت یو تَر عیسی خېز یَت. اَت وَختی عیسی یی څه وینت وی پاڎېنَردی خو پِتێود.

²³اَت زارگی قَتی یی وِرد لوْد: «مو رِزین ته شِچ میرت، عُزری تُرد کِنُم، یه اَت خو ڎُست وَم تی رِبی یٲ خُب سوْد اَت زِنده رِست.»

²⁴عیسی وی قَتی توید. فَنٲ مَردُم گه مِس وی دأم تی توید. مَردُمېنېن وی گَرگِنوښه جمع سَت.

²⁵اِکدی وَختَند یی ږِنِک یَمَند پېڎا سَت وَمَند دوازده سالَند خونرېزی ڤُد.

²⁶اَت یٲ یی لَپ طَبیبی خُرد چود اَت هچٿ خُب نه سَت اَت یٲ طَبیبېن مِڎُست لَپ قینی اَت معنَتی وینت اَت خو فُکَٿ خَزوْنه یی اِکدی تی بِنێست.

²⁷ات دَرباره عیسی لَپ گٲپېن ښُد. از مَردُم زِبا سَت اَت وی لُقېن څێپت.

²⁸ات یٲ یی تَر خو لوْد: «اَگه مو ڎُست تَر وی لُق څه اَنگَخست، خُب ته سأم.»

²⁹تېزَٿ وَم خونرېزی بَند سُت اَت فأمتی خُب سَت.

³⁰اَت عیسی یی تېزَٿ فأمت دوْندَٿ وی قُدرَت از وی نَښتوید. اَت خو پیڅی تَر مَردُم چود اَت پېښڅتی: «چأی مو لُقېن څێپت؟»

³¹وی ښاگِردېنېن وِرد لوْد: «می بَرغه ڎێدک قتی تو چیز مأش پېښڅی: مو لُق چأی څێپت؟»

³²عیسی څَڤار جاڤه چوښت تا وینت دی کار چأی چوږج.

³³یٲ ږِنِک فأمت خُب سَت. بعد از ښاج لَږزه تی ڎاد اَت عیسی پاڎېنَردی خو پِتێود اَت هر چیز څه ڤُد لوْدی.

³⁴عیسی یی وَمَرد لوْد: «اې رِزین، تو اېموْنی تُرد شِفا ڎاڎج، آروْمَٿ شِچ سه اَت مُدوْم سَلوْمَت ڤی از دی مَریضی.»

³⁵عیسی غَل خو گأپېن خَلاص نَچود اَت مَردُمېنېن از یایروس چید یَت اَت لوْدېن: «تو رِزین ماد. اُستاد هچگه قین مأک.»

³⁶اَما عیسی یی وېڤ گأپېن ښُد اَت یایروسَردی لوْد: «ښاج مأ ڎێر اَت اېموْن تُند ڤِد.»

³⁷عیسی یی بَغَیر از پِطرس اَت یعقوب اَت وی ڤِراد یوحنا هچگه خو قَتی نه لأک چود تا تَر یایروس چید سېن.

³⁸وَختی وأڎېن تَر یایروس چیدېن څه فِریپت فُکَٿ مَردُم یَمَندی وأغد.

³⁹عیسی تَر چید دېد اَت وېڤَردی لوْد: «چیزَرد وُل وُل کِنېت؟ چیزَرد وأغېت؟ یِد غأڅ نه میږځ، یِد تَر خوڎم ڎاڅ.»

⁴⁰اَما وأڎېن ریشخَند وی چود. عیسی یی فُکَٿ از چیدَند زِواست اَت وَم داد اَت نأن اَت وېڤ خو اَرَی اَصحاب قَتی تَر وَم غأڅ خېز توید.

⁴¹عیسی یی وَم ڎُست اَنجوڤد اَت لوْدی: «طَلیتا قَومی» دی معنا «اې غأڅ، تُرد ته لوْم اَندِځ.»

⁴²تېزَٿ یٲ غأڅ اَنداید اَت دَرَو پوْند تید سَت (یٲ دوازده ساله ڤَد). وأڎېن لَپ حَیرَت سَت،

⁴³اَما عیسی وېڤ تی امر چود می کار یی چِردَٿ مأ لوْڤېن اَت وېڤَردی لوْد وَمَرد گَرڎأ ڎېن.