Read Shughni مرقس 6 Bible Online

مرقس 6 - Shughni bible

مرقس 6

¹عیسی از وی ښاڎ تَر خو قَریه ناصِره توید، اَت وی ښاگِردېنېن مِس وی دأم تی تاید.

²شَنبه مېٿ عیسی تَر عبادَتگاه یَهودېن تعلیم دَرَو سُت. لَپ مَردُمېنېن وی گأپېنېن ښُد اَت مَبادَٿېن رېد اَت لوْدېن: «یِد چارِکی دېڤ گأپېنی از کأ یاڎ چوږج؟ یِد څَرأنگ فأمچازی یِدی وِرد ڎاڎج سُڎج، اَت ڤأرڎید خو ڎُستېن قَتی مُجزه یېن دِڤېست؟

³یِد اِکو نَجار، مَریَم پُڅ اَت یعقوب، یوسِف اَت یَهودا اَت شَمعوْن ڤِراد اَت وی یَخځِنېنېن مأش مِڎېندرَد څه.» اَت وأڎ مَردُمېنېن خو پیڅ از وی گَرڎېنت.

⁴عیسی یی وېڤَرد لوْد: «یی پَیغَمبَر ته تَر فُکَٿ جا حُرمَت سوْد اَما خو جَمعتېن اَت خو قَومېن خېزَند ته حُرمَت نَسوْد.»

⁵از ناخاطِری وېڤی یو فَقَط څوْند نَفَری شِفا ڎاد اَما هچگه مُجزه یی نَڤأرڎاد وېڤَرد دِڤېست.

⁶اَت از وېڤ بې اېموْنی یی لَپ حَیرَت رېد. <h>عیسی یی خو اَصحابېن باښت</h> عیسی مَردُمېنَرد تعلیم جأت تَر فُکَٿ قِشلاقېن گَرگِنوښه توید.

⁷اَت خو دوازده اَصحابی تَر خو خېز تِلأپت اَت وېڤی ڎُیوْن ڎُیوْن باښت اَت قُدرَت وېڤَرد ڎاد تا بَر جِنیات غالِب سېن.

⁸اَت وېڤی رهنمایی چود: «تَر پوْند څه ڎېت غَیر از یی ماٿ هچگه یی چیز تَمه جه مأڤِد، نه گَرڎٲ اَت نه خِرجین اَت نه پَیسه تَمه تَر میڎ ڤِد.

⁹تَمه تَنأندی یی سَندیل کأند اَت یی لُق ڤِد، بأس.»

¹⁰اَت عیسی یی وېڤَرد لوْد: «تَر وی چیدېت دی دېد تا وَختی یَت یَمَند څه نِٿېت تا تَر هچگه قَریه یَت څه نَتیڅ.

¹¹اَت هر جایَند اِدی تَمه قَبول څه نَکِنېن یا تَمه گأپېن څه نه نِغوْږېن، تَمه اَزَمَند نَښتیېت اَت خو پاڎېن تَخ تا وېڤَرد پِند سوْد.»

¹²اَت وأڎېن تَر پوْند ڎاد اَت تَر فُکَٿ جایېنېن وعظ چود اَت لوْدېن: «مَردُمېن توبه کِنېت.»

¹³وأڎېن لَپ جِنیات زِواست اَت ناجورېنېن چأرڤ چود اَت شِفایېن ڎاد.

¹⁴عیسی کارېنېن تَر هیرودیس پادښاه غوْږ فِریپت، دِجأت عیسی نوْم تَر فُکَٿ جای نَښتوید. یِلأڤېنېن لوْد: «یحیی یی غوْط ڎأڎیج زِنده سُڎج دِجأت از وی غُلأ مُجزه یېن وینچ سېن.»

¹⁵یِلأڤېن لوْد: «یو اِلیاس پَیغَمبَر.» اَت یِلأڤېنېن گه لوْد: «یو هچگه پَیغَمبَرېن مِغوند.»

¹⁶اَما وَختی هیرودیس وېڤ گأپېن څه ښُد لوْدی: «یَم اِکو یحیی یِدی وُزُم وی کأل څه زاښت، یو زِنده سُڎج.»

¹⁷پِرداکی یی هیرودیس خو ږِن هیرودیا جأتی از یحیی یی غوْط ڎأڎیج گیر چود اَت وی ڎُست اَت پاڎی ڤوست خو وی یی اَر بَندی خوْنه پِتێود. هیرودیا پِراکی فیلیپُس ڎُستَند ڤَد. اَت فِلیپُس هیرودیس ڤِراد ڤُد. یٲ از فیلیپُس نَښتاید اَت هیرودیسی وَم اَنجوڤد.

¹⁸یحیی هیرودیسَرد لوْڤج ڤُد: «خُب نِست تو خو ڤِراد ږِن اَنجأڤی.»

¹⁹اِکو گأپ هیرودیا زارڎَند رېڎجِن ڤُد. ات وَم دِل ڤُد وی زینت اَما نَڤأری ڎادی

²⁰دِجأت هیرودیس از یحیی یی ښاج ڎوید. یو یی وِزېنت یو یی چارِک راستکار اَت روحوْنی. اَت دی جأتی یو مُدوْم از وی یی نِگٲبوْنی چود. هر وَخت وی گأپېن څه نِغُښت، حَیرَت اَت پِرېښوْن رېد اَما از وی گأپېن نغښتاو خُش ڤُد.

²¹آخِر هیرودیا خُرد وَخت ڤِرود. هیرودیس خو تَوَلُدَندی مِهموْنی اَنجوڤد، اَت فُکَٿ غُلأ یېن اَت اَمیرېن اَت اَشرافېن از مَنطِقه جَلیل مِس یَمَند ڤَد،

²²اَت هیرودیا رِزین تَر مَردُم خېز دېد اَت دَرَو رَقاصی سَت. هیرودیس اَت وی مِهموْنېنَرد وَم رَقاصی لَپ خُش یَت. پادښاه وَم غأڅَرد لوْد: «هر چیز از مو څه تِلأبی تُرد ته دأکُم.»

²³اَت قَسَم خود اَت لوْدی وَمَرد: «حَتا نِصف خو مَملَکَت تُرد دأکُم.»

²⁴یٲ غأڅ تَر دَرگاه نَښتاید اَت خو نأنَرد لوْد: «چیز تِلأبُم؟» وَم نأن لوْد: «یحیی یی غوْط ڎأڎیج کأل.»

²⁵یٲ غأڅ تېزَٿ تَر پادښاه خېز سَت اَت لوْدی: «وُز از تو اِکمَم ساعتَند یحیی یی غوْط ڎأڎیج کأل یی پَطنوس تی تِلأبُم.»

²⁶پادښاه لَپ خَفه سُت، اَما خو قَسَم جأت اَت حُرمَت خو مِهموْنېنی نَڤأرڎاد وَم گأپ مأ زێزد.

²⁷اَت تېزَٿ وی قَصاب باښت اَت امر چود یحیی کأل ڤیرت. قَصاب اَر بَندی خوْنه سُت وی کأل زاښت.

²⁸اَت وی یی پَطنوس تی ڤود اَت وَم غأڅَردی دأک چود اَت یٲ غأڅی وی خو نأنَرد دأک چود.

²⁹وَختی یحیا ښاگِردېنېن اِکدی خَبَر څه ښُد فِریپتېن اَت وی مُرڎه یېن زاښت خو یادېن گوْرېن چود.

³⁰اَصحابېن ڤاگه تَر عیسی خېز گَښت چود اَت هر چیزېن څه چود اَت تعلیمېن اَت دَرسېن څه ڎاد فُکَٿېن وِرد لوْد.

³¹دېد اَت نَښتید مَردُم دِس لَپ ڤُد وأڎېن نَڤأرڎاد گَرڎٲ خېن. اَت عیسی یی وېڤَرد لوْد: «طاقٲ مو قَتی یَدېت اَت تَر یَگوْن جای سأوُم ات دأم خو ڎېت.»

³²وأڎېن وَم کِشتی قَتی تَر یی پَناگی تاید.

³³اَما فَنٲ مَردُمېنېن وېڤ وینت وأڎېن اَزَمَند څه تاید. هر تأمَٿی وېڤ څه وِزوْنت از فُک قَریه یېنېن ژێښت تا پِرا از وی خو فِرێپېن.

³⁴وَختی عیسی تَر قاقی فِریپت، فَنٲ مَردُمېنی وینت اَت وی زارڎ وېڤ تی لَپ ٿُد، دِجأت وأڎېن رَمه بې چوپوْن مِغوندېن ڤَد. وېڤَردی دَرَو تعلیم سُت اَت فَنٲ گأپېنی وېڤَرد لوْد.

³⁵خیر نیست قَتی ېن وی ښاگِردېنېن تَر وی خېز یَت اَت لوْدېن: «یوْدَند یی چوله یی بیابوْن یی بیابوْن اَت یَم مېٿ مِس نَږجٲد.

³⁶دېڤ مَردُمېنَرد رُخصَت ڎه سېن خُرد یی چیز خَریتېن از مَزرعه یېن اَت قِشلاقېن گَرگِنوښه.»

³⁷اَما یو یی لوْد: «خُبَٿ وېڤَرد خَرچ ڎېت.» وأڎېن لوْد: «تُت ژیوج مأش سأوُم اَت دو صَد دینارَرد گَرڎٲ خَریتأم ات وېڤَرد ڎأڎأما؟»

³⁸عیسی یی از وېڤ پېښڅت: «څوْندِک گَرڎأ تَمَند یَست؟ سېت اَت چِسېت.» وی اصحابېنېن بَشٲند چوښت اَت لوْدېن: «مأشَند پینځ گَرڎٲ اَت ڎو مایی.»

³⁹عیسی یی خو ښاگِردېنَرد لوْد مَردُم یِلأڤ، یِلأڤ سأڤزه تی نێڎېن.

⁴⁰مَردُمېنېن صَد نَفَر اَت پِنجاه نَفَر زِمأڎ تی نێڎد.

⁴¹اَت عیسی پینځ گَرڎأ یَت ڎو مایی زاښت خو پیڅی پی آسموْن چود اَت خُڎایَردی دَرَو شُکرَت سُت اَت وېڤ گَرڎأ یېنی کأند چود اَت خو ښاگِردېنَردی دأک چود تا وأڎ مَردُمېنَرد بأښېن. اَت یو یی وېڤ ڎو مایی مِس وېڤ مِڎېنَرد بأښ چود.

⁴²فُکَٿېن خود اَت سېرېن سَت.

⁴³اَت ښاگِردېنېن دوازده څِمود وېڤ بېښڎاڎج مایی اَت گَرڎٲ ڎوڤد.

⁴⁴وېڤ مِڎېنَرد پینځ هَزار چارِک گَرڎأ خارېج ڤُد.

⁴⁵عیسی یی خو ښاگِردېنَرد لوْد کِښتی تی سَوار سېن اَت تَر وی رویه جَلیل قوْل تَر وی طَرَفی بَیت صَیدا سېن تا خُبَٿ مَردُمَرد رُخصَت ڎید.

⁴⁶وَختی عیسی یی مَردُم قَتی پَناه به خُڎایی څه چود، دعا جأت پی کوه سِفید.

⁴⁷وَختی ښأب سُت، کِښتی وی ښاگِردېن قَتی تَر جَلیل قوْل مأڎېن فِریپت اَت عیسی اِکوی وَخت تَر قاقی طاقٲ ڤُد.

⁴⁸یو یی وینت وی ښاگِردېنېن طوفوْنَند بَند رېڎج اَت به یی قینی یېن خو پار چی وېڎد. اَت ساعت بَینی سه اَت شَشی سحرکی ڤُد، اَت یو ښَڅ پیڅ تی پوْند تَر وېڤ خېز توید. اَت وی دِل ڤُد وېڤ پألی ڤه نَږجیست.

⁴⁹وَختی وی ښاگِردېنېن وینت یو ښَڅ پیڅ تی پوْند تیزد وأڎېن لوْد: «یِد بَغېر یی روح ڤِد اَت جێغېن ڎاد.»

⁵⁰اَما فُکَٿېن وی وینت اَت ښاجېن ڎوید. اَت عیسی یی وېڤ قَتی گأپ ڎاد اَت لوْدی: «خو وُښ تَر خو کِنېت وُزُم، ښاج مأ ڎێرېت.»

⁵¹اَت کِښتی تی سَوار سُت اَت ښوځ قَرار چود وأڎېن لَپ حَیرَت رېد

⁵²دِجٲت وأڎېن از وی مُجزه گَرڎأ ڎێد نَفأمت. وېڤ اېموْن کأم ڤُد.

⁵³وأڎېن از جَلیل قوْل نَږجأد اَت تَر مَنطِقه جِنیسارَتېن فِریپت اَت تَرَمېن خو کِښتی وِرېمت.

⁵⁴وَختی از کِښتی یَندېن څه نَښتاید، مَردُمېنېن تېزَٿېن عیسی وِزوْنت.

⁵⁵اَت از فُک مَنطِقه یېن تَرَم تېزَٿ یَت اَت اِک تَرَم یو نوسڅِن څه ڤُد وأڎېن خو بېمارېنېن تُشَک تی تَر وی خېز ڤود.

⁵⁶از ښأر اَت قِشلاق اَت مَزرعه یِدی عیسی څه نَږجید مَردُمېن خو بېمارېن تَرَم یاد اَت وی پوْند تی یېن لأک چود. مَردُمېنېن از عیسی تِلأپت: «دوْند اِجازه ڎه مأش بېمارېن تو چَپأن زیمبه څێپېن.» اَت هر تأم از بېمارېن وی لُق څه څێپت خُب سُت.