Read Shughni مرقس 7 Bible Online

مرقس 7 - Shughni bible

مرقس 7

¹یِلأڤ پَیرَووْنېن فِرقه یی فِریسی اَت مُلایېن یَهود از اورشلیمېن یَٿچِن څه ڤَد عیسی گَرگِنوښه یېن جمع سَت.

²وأڎېن وینت یِلأڤ از وی ښاگِردېنېن ناڎُست زِنێد گَرڎأ خود.

³رَسم اَت رَواج یهودِیېن اَت فِریسیېن دِس ڤُد اِدی تا یېن خو ڎُستېنېن څه نه زِناد گَرڎأېن نَخود.

⁴اَت وَختی از بازارېن څه یَت تا یېن خو ڎُستېن څه نه زِناد، یی چیزېن نه خود. اَت بېښدی یېن از هچگه رُسوم مِس چود، پیاله اَت دېک اَت کاسه یېن زِناد اَت دېڤ کارېنېن پېښ یاد.

⁵اَت فِریسیېن اَت مُلایېن یَهود از عیسی یېن پېښڅت: «چیزَرد تو ښاگِردېن از خو اَجداد رَسم اَت رَواج نَکِنېن اَت ناڎُست زِنێد گَرڎأ خېن؟»

⁶عیسی وېڤَرد لوْد: «اَشعیا پَیغَمبَر تَمه مُنافِقی جأت راست پېښ بینی چود اَت وی وَختی لوْد: «مأڎ مَردُمېن ته خو زِڤ تی حُرمَت کِنېن اَت وېڤ زارڎېن از مو ڎَر.

⁷وېڤ عبادَت بې فایدٲ دِجأت وأڎېن خُڎای فَرموْن لٲک چوږج اَت خو رَسم اَت رَواجېن مَردُم تی تَکمیل چود.»

⁸تَمه یېت خُڎای تعلیم لأک چوږج اَت خو تعلیم پېښ یاسېت.»

⁹اَت عیسی یی وېڤَرد لوْد: «تَمه یېت خُڎای فَرموْن لأک چوږج ات خو رَسم اَت رَواج کِنېت.»

¹⁰مِثال موسی پَیغَمبَر لوْڤج ڤُد: «خو داد اَت نأنَرد حُرمَت کِنېت اَما هر چأی یِدی خو داد اَت نأن نِموْ څه کِښت زیڎج سوْد.

¹¹اَما تَمه لوْڤېت هَچَٿ پَروا نِست اَگه هر چأی خو داد اَت نأنَرد یاردَم نَکِښت اَت لوْڤد: نَڤأرڎیم تَمَرد یاردَم کِنُم، دِجأت هر چیز تَمَرد دأک چیداوَرد څه ڤُد وی یَم خُڎای یَرد صَدَقه ڎاد.

¹²هچگه ته مَردُمَرد اِجازه نه ڎېت خو داد اَت نأنَرد یاردَم کِنېن.

¹³دِسگه رَسم اَت رَواج قَتی ته از خُڎای خو پیڅ گَرڎېنېت اَت دِسگه کارېن گه ېن مِس فَنٲ تَمَند.»

¹⁴عیسی ڤا یی مَردُم تَر خو خېز تِلأپت اَت وېڤَردی لوْد: «فُکَٿ تَر مو نِغوْږېت اَت فأمېت.

¹⁵یی چیزی اِدی آدَم خو غێڤ قَتی څه خیرت یو ته وی نَجِس نه کِښت. اَما هر چیز آدَم زارڎَند څه ڤِد اَت یو اَزَمَند څه نَښتیزد یو ته وی نَجِس کِښت.»

¹⁷وَختی عیسی از مَردُم خېزَند تَر چید څه توید وی ښاگِردېنېن وَم مَتَل معنا از وی پېښست.

¹⁸وېڤَردی لوْد: «تَمه یېت مِس هچگه یېن مِغوند نافأما؟ هر چیز غێڤ قتی څه خېت یو ته نه ڤأرڎید تَمه نَجِس کِښت.

¹⁹اَت اَر وی زارڎ ته نَسوْد، اَما هر چیز ته اَر معده څه سوْد اَزَمَند ته نَښتیزد.» اَت می گأپ قَتی عیسی فُکَٿ گَرڎٲ پاک مَعرفی چود.

²⁰عیسی یی خو گأپېن دَووْم ڎاد: «هر چیز ته از آدَم زارڎَند څه نَښتیزد یو ته وی نَجِس کِښت.

²¹دِجأت ته از وی زارڎَند یاڎد یعنی ناپاک فِکرېن، فِساد جِنسی، څِفتاو، آدَم زید،

²²کاته گَری، هَوَس، خیوْنَت، فأند ڎێداو، عیاشی، بَخیلی، توْمَت، خُد خواهی اَت لَودَگی.

²³مأڎ ته فُکَٿ از آدَم زارڎَند نَښتیېن اَت وی ته نَجِس کِنېن.

²⁴عیسی اَزَمَند نَښتوید اَت هر مَنطِقه صور اَت صَیدون توید. اَت تَر یی چید دَرون دېد. وی خُش نَڤُد یِچأی وِزېنت یو یَمَند، اَما نه ڤأری ڎاد جای خو کِښت.

²⁵یی ږِنِک اِدی وَم رِزین وایمه دار څه ڤَد، یٲ تېزَٿ از وی ڤِداو یَمَند خَبَر سَت. اَت یَت خو عیسی پاڎېنَردی خو پِتێود.

²⁶یٲ ږِنِک یونوْنی اَت از مَردُم فینیقیه سوریه ڤَد. اَت از عیسی یی خواهِښ چود وَم رِزین وایمه بِنێست.

²⁷عیسی یی وَمَرد لوْد: «لأکی سَرپِرا مأڎ یَهود اَولادېن خو سېر کِنېن، خُب نِست اَولادېن گَرڎأ زېم اَت کَدېنَرد پِتېم.»

²⁸یٲ ږِنِکی لوْد: «اې آقا، راست لوْڤی. اَما چید کَدېن مِس از بحث چوږج اَولادېن گَرڎأ تی خېن.»

²⁹عیسی یی لوْد: «سه، دېڤ تو گأپېن جأت یو جِن از وَم غأڅ نَښتوید.»

³⁰وَختی یٲ ږِنِک تَر خو چید څه فِریپت چوښتی وَم رِزین تأخت تی ښێڤځ اَت جِن از وَمَند نَښتویج.

³¹عیسی از مَنطِقه صور گَښت چود اَت از راه صَیدون اَت دِکاپولِس تَر جَلیل قوْل توید.

³²یَمَندېن یی چارِک تَر وی خېز ڤود یو گوْل اَت چون ڤُد. از وی یېن خواهِښ چود خو ڎُست وی چارِک تی رِبیزد.

³³عیسی یی وی چارِک از مَردُم پألی ڎَری یاد. اَت خو اَنگِښتېنی وی غوْږېن تی رِبود. اَت خو اَنگِښتېنی شَفع ڎاد اَت وی زِڤی څێپت.

³⁴اَت پی آسموْنی چوښت خو آی سَری ڎاد اَت لوْدی: «اِفَتَح» یعنی «یېت سېت»

³⁵تېزَٿ وی چارِک غوْږېنېن یېت سُت اَت وی زِڤ گوْلی مِس بېد اَت بَشٲند دَرَو گأپ ڎێد سُت.

³⁶عیسی یی وېڤَرد مَردُمېنَرد لوْد از می مو کار یی چِردَٿ مأ لوْڤېت. اَما هر څوْندی وېڤَرد څه لوْد وأڎېن بېښدی لوْد.

³⁷مَردُمېنېن لَپ حَیرَت ڤَد اَت لوْدېن: «یو فُکَٿ کار بَشٲند چود: چونېن دَرَو ښُد اَت گوْلېنېن دَرَو گأپ ڎێد سَت.»