Read Shughni مرقس 8 Bible Online

مرقس 8 - Shughni bible

مرقس 8

¹اِک وېڤ مېٿېنَند ڤاگه مِس لَپ مَردُم عیسی گَرگِنوښه جمع سَت اَت گَرڎأ نَڤُد وأڎ وی خېن. اَت عیسی یی خو ښاگِردېن قیود اَت وېڤَردی لوْد:

²«مو زارڎ مېڤ مَردُم تی لَپ ٿوْد. اَره مېٿ سوْد اِدی وأڎېن مو قَتی اَت یی چیز نِست وأڎ خېن.

³یِلأڤ از مېڤېن از ڎَرېن یَٿچ. شِچ څرأنگ بافت مَږځوْنج مېڤ تَر چید بازُم پوْندَرد ته توتَک مېڤ ڎید.»

⁴ښاگِردېنېن وی جَواب لوْد: «څَرأنگ ڤأرڎِیأم تَر می چوله یی بیابوْن یی بیابوْن دېڤَرد څرأنگ گَرڎأ پېڎایَم؟»

⁵عیسی یی پېښڅت: «څوْندِک گَرڎأ تَمه جه؟» وأڎېن لوْد: «ووڤد گَرڎأ.»

⁶اَت عیسی یی مَردُمَرد لوْد «زِمأڎ تی نِٿېت.» اَت وېڤ ووڤد گَرڎأ یی زاښت خو خُڎای شُکرَت دَرَو سُت خو وېڤی کأند چود. اَت خو ښاگِردېنَردی دأک چود تا وأڎ مَردُمَرد بأښېن.

⁷اَت یِلأڤ ریزگَک مایی مِس وېڤ جه ڤُد. عیسی یی وېڤ مایی یېن مِس زاښت اَت دَرَو شُکرَت سُت اَت لوْدی: «دېڤ مِس بأښېت.»

⁸فُکَٿېن خود اَت سېرېن سَت. اَت ووڤد غُلأ څِمود لَپ دی بېښڎاڎج گَرڎأ یېن ڎوڤد.

⁹وأڎېن څَڤار هَزار نَفَر ڤَد اَت عیسی یی وېڤ رُخصَت چود.

¹⁰اَت تېزَٿ خو ښاگِردېن قَتی اَر کِښتی نوست اَت تَر وی رویه جَلیل قوْل تَر مَنطِقه یی دَلمانوتا توید.

¹¹یِلأڤ از فِرقه یی فِریسی یېنېن تَر عیسی خېز یَت اَت وی قَتی یېن دَرَو قین اَت قال سَت. اَت وېڤ دِل ڤُد وی اِمتِحوْن کِنېن یو مُجزه دِڤېست ات ثابِت سوْد یو خُڎای باښچِن.

¹²عیسی یی آی سَر تیژد اَت لوْدی: «چیزَرد اِکمی وَخت مَردُم مُجزه دأم تی ناږد؟ تَمه دِل پُر ڤِد وېڤَرد ته مُجزه دِڤِښچ نَسوْد.»

¹³اَت عیسی یی وېڤ لأک چود اَت ڤاگه اَر کِشتی نوست خو تَر یِگه طَرَف جَلیل قوْل توید.

¹⁴ښاگِردېنېن رِنوښت گَرڎأ خو قَتی یاسېن، اَت اَر کِښتی از یی گَرڎأ وېڤَند لَپ نه ڤُد.

¹⁵عیسی یی وېڤَرد لوْد: «از خَمیر مایی فِرقه یی فِریسیېن اَت خَمیر مایی هیرودیس ڎَر ڤیېت اَت اتیاط کِنېت.»

¹⁶ښاگِردېنېن خو بَینَرد غَلمَغال چود اَت لوْدېن: «مأشأم گَرڎأ څه نه ڤوږج، یو ته دی دِجأت لوْڤد.»

¹⁷عیسی یی وِزېنت وأڎ ته یَکدِگه قَتی چیز لوْڤېن. اَت وېڤَردی لوْد: «چیزَرد گَرڎأ جأت یَکدِگه قَتی غَلمَغال کِنېت؟ څَرأنگ تَمه غَل دَرک نه کِنېت اَت نه فأمېت؟ تَمه زارڎ اَت عقلی غَل قَبول نَکِښتا؟

¹⁸تَمَند هم څېم اَت هم غوْږ، اَت نه وِنېت اَت نه ښِنېتا؟ رِنوښچېتا؟

¹⁹څَرأنگُم وېڤ پینځ گَرڎأ، پینځ هَزار چارِکَرد بأښ چود؟ وی وَختَندېت څوْند څِمود بېښڎاڎج گَرڎأ ڎوڤد؟» لوْدېن: «دوازده څِمود.»

²⁰عیسی یی پېښڅت: «وَختی ووڤد گَرڎأیُم څَڤار هَزار نَفَرَرد بأښ څه چود څوْند څِمود بېښڎاڎج گرڎأېت ڎوڤد؟» لوْدېن: «ووڤد څِمود.»

²¹اَت عیسی وېڤَرد لوْد: ڤاگه مِس نه فأمېتا؟»

²²عیسی اَت وی ښاگِردېنېن تَر قِشلاق بَیت صَیدا فِریپت. تَرَمېن یی سِبُت چارِک تَر وی خېز ڤود اَت از وی یېن خواهِښ چود خو ڎُست وی سِبُت تی رِبیزد.

²³یو یی وی سِبُت چارِک ڎُست زاښت خو از وی قِشلاق ڎَر دی توید. وی څېمېنَردی خو شَفع مالت اَت خو ڎُستېنی وی تی رِبود اَت پېښڅتی: «یی چیز وِنِیا؟»

²⁴یو یی پی تیر چوښت اَت لوْدی: «وی تَر څېمېن مَردُمېنېن درَخت جِناو خُب لَپ خیره دِڤِښت وأڎ تیېن.»

²⁵عیسی یی ڤاگه خو ڎُستېن وی څېمېن تی رِبود اَت یو چارِکی خُب بَشٲند چوښت اَت ساز سُت. اَت فُکَٿ چیزی یی به بَشأندی وینت.

²⁶عیسی وی چارِک تَر وی چید رِماد اَت وِردی لوْد: «تَر خو چید څه سأوی قِشلاق ڤه مأسه.»

²⁷عیسی اَت وی ښاگِردېنېن ښأر قَیصَریه فیلیپُسېن گَرگِنوښه تاید. پوْندَرد عیسی یی از خو ښاگِردېن پېښڅت: «مَردُم ته چیز لوْڤد وزُم چأی؟»

²⁸وأڎېن لوْد: «یِلأڤ ته لوْڤېن تُت یحیا یی غوْط ڎأڎیج، یِلأڤ ته لوْڤېن تُت اِلیاس پَیغَمبَر اَت یِلأڤ ته لوْڤېن تُت از هچگه پَیغَمبَرېن.»

²⁹اَت از وېڤی پېښست: «تَمه چیز لوْڤېت وُزُم چأی؟» پِطرسی لوْد: «تُت مَسیح، خُڎای باښچِن.»

³⁰اَت عیسی وېڤ تی امر چود: «مَردُمَرد مأ لوْڤېت وزُم چأی.»

³¹عیسی دَرَو تعلیم سُت اَت وېڤَردی لوْد: «آدَم پُڅ ته لَپ محنَت وینت اَت کَتَنَکېن اَت غُلأ خَلیفه یېن اَت مُلایېن یَهود ته وی قَبول نَکِنېن اَت وی ته زینېن اَت اَره مېٿ بعد ته ڤاگه زِنده سوْد.»

³²عیسی یی اِکدی گأپ خُب بَشٲند وېڤَرد فأموْنت. اَت پِطرس وی تَر کِناره یاد اَت لوْدی وی یېڅ.

³³اَما عیسی تَر خو اَصحابېن خېز وِژیڤد تَر وېڤی چوښت اَت پِطرسېڅی لوْد: «از مو خېزَند ڎَر سه، شَیطوْن! تُند تو فِکری اِنسوْن جِناو اَت نه خُڎایی جِناو.»

³⁴اَت عیسی یی مَردُمېن خو اَصحابېن قَتی تَر خو خېز قیود اَت وېڤَردی لوْد: «هر تأم مو پَیرَووْن څه ڤِد از خو رِنێست اَت هر مېٿ قینی اَت قَیصَری صَلیب جِناو زێزد اَت مو دأم تی یاڎد.

³⁵هر چِرد څه فارت خو جوْن از ڎُست مأ ڎید، وی ته از ڎُست ڎید. اَت هر چأی مو یَت مویده خایی کَلوْم خُڎای جأت خو جوْن فِدا څه کِښت یو ته نِجات ڤِرېد.

³⁶چیز بَکار آدَم فُکَٿ دِنیا څه یېست اَما وی جوْن از خُڎای مُدوْم ڎَر ڤِد.

³⁷آدَم څَرأنگ ڤأرڎید ڤاگه خو جوْن مِڎُست ڤیرت؟

³⁸اِکمی گُناه اَت فِساد وَختَند هر تأم از مو یَت از مو گأپېن خو پیڅ څه گَرڎېنت، وَم مېٿ ڤا آدَم پُڅ خو تأت جَلال اَت فرښته گوْن مُقدَس قَتی ته څه یاڎد از وی ته خو پیڅ گَرڎېنت.»